«Целинное» ООО-ның ӧӧн директоры Владимир САННИКОВ хоныхтың хыраларында Хакасияның аал хонии предприятиелері дее, кресен-фермер хоныхтары даа, наа технологияларны чуртасха киріп, ас-тамах сығарызын ӧскіреріне кӧстег итчелер. Наа технологияларнаң тузаланчатхан аал хонии предприятиелерінің пірсі - «Целинное» ООО. Пӱӱл предприятиеде аммиакты пораналчатхан чирге газнаң кирчелер. Андағ оңдайнаң аммиак чирде табырах паза чахсы тарапчаттыр. 2-3 кӱн пазынаң чир минералларға пайып парча. Ағаа хоза газнаң кирілген аммиактың 5-6 % киизер парыбысча, пасхазы прай чирзер кирілче, ӧзімнер, тізең, аның тузазын 80-85% алчалар. Наа оңдайнаң удобрение 1000 гектарда кирілче, ӧӧнінде кукуруза одыртылар чирлерде.

- Мындағ оңдайнаң Россияда 2011 чылдаң сығара тузаланчалар, ӧӧнінде Краснодар, Ставрополь крайларында, ЫраххыВостокта, - чоохтапча аал хонии предприятиезінің ӧӧн агрономы Юрий Ребриков. - Кибірли удобрение гранулаларнаң кирілче, че аның тузазы 15 % -ке тиңнелче, газнаң кирілген удобрениенің тузазы ӱс-тӧрт хати пӧзік. Ағаа хоза, гранулалар газтығ удобрениедең сала аарлыға турчалар. Аннаңар піс наа технологиянаң тузаланарға чаратхабыс.

Кукуруза одыртылар хырада пір К-744 трактор тоғынча, аның тінін тутча механизатор Александр Шубаров. Ирен «Целинное» ООО-да пастағы ла чылы істенче, уламох мындағ технологиянаң. Кӱнде ол, удобрениені киріп, 50 гектар хыраны тартыбысча.

- Наа оңдайнаң кирілген удобрение чирні пайыдарына паза ӧзімнерге чахсы ӧзерге полызарына ізенчебіс, ол, тізең, таарылған чирде сығарысты ӧскірер, - таныхтаан предприятие устағҷызы Владимир Санников.