ЧИТІ ХАДЫЛҒА - ХАЙХАСТАР
23.04.2019
Хабарлар
Хоосчы-гримёр Наталья ЖУКОВА артист Алексей САГАТАЕВКЕ грим салча
Акция. Н.Г.Доможаковтың адынаң национальнай библиотекада тиксі Россиядағы «Библиотека хараазы» акция ирткен. Пӱӱл ол Театр чылына чарыдылған.
Библиотеказар килгенімде, пастап алаң даа ас парғам. Культура учреждениезінде XVII чӱс чыллардағы англия аристократтарына, клоуннарға, самурайларға хубул салған кізілер пас чӧрчелер. Полған на хадылда мастер-класстар паза марығлар парчалар, лингафоннай кабинетте сыбырағҷы, кізіні удурлап, тӧлке салча, конференц-залда, тізең, Хакасияның театрлары ойыннарының ӱзіктерін кӧзітчелер. «Библиотека хараазы» хайхастарға пай полтыр. Акцияның программазын хығырғанда, пір ле сурығ полған: «Хайди прай чирде маңнан халҷаң?»
Пастап абонемент залынзар чол тутхам. Тасхар соох кӱн, хар чаапча, мында сакура алҷасча, чахайахтар ӧңненче. Стеллажтарда япон чонның культуразына чарыдылған кинделерні, чірчелерні, ойнаҷахтарны кӧрерге чарир. Ідӧк стенеде библиотека тоғынҷылары гейшаның портредін хыс салғаннар. Постары абахайлар, япон чонның кип-азаана чазан салып, кӧрігҷілерні чылығ удурлааннар.
«Сакура алтында» ачыхтың программазында танка паза хокку чайирынҷа, суғҷа хоостирынҷа (ол техника эбру адалчаттыр) мастер-класстар полған. Ағаа хоза акция араласчыларына хоосчы-гримерның тоғызынаң танызып аларға оңдай полған. Наталья Жукова «Читіген» театрда істенче. Ол япон абахайлары састарын хайди иптіг салчатханнарын кӧзіткен. Анаң ус холлығ Наталья грим паза парик полызиинаң актер Алексей Сагатаевтің омазын саңай таныбас иде алыстырыбысхан. Кӧрігҷілернің алнында ам на чиит ирен одырған, нинҷе-де минута пазынаң - улуғ частығ апсах.
Ікінҷі хадылынзар сыхханда, улуғлар паза чииттер, актер узына чарыдылған мастер-класстарда аралазып, маң чохха тӱсчеткеннер. Кічіглер медиа-кінде «Робо-марафонда» кӱстерінең сынасчатханнар. Ӱзінҷі хадылының холлында афишалар кӧзідии хайхатхан. Минің кӧрізімнең, экс-позицияа чӱске чағын афиша сығарылған полар. Оларның чарымызы национальнай библиотеканың чыындызында хайраллалча, пасхазын библиотекадағылар театрларҷа чӧріп чыыптырлар. Иң иргі афиша 1939 чылнаң таныхталған. Анда артисттер «Проделки Скапена» спектакльны ойнирлар тіп искірілче.
Чоохтирға кирек, тиксі Россия чӧріміне удур библиотеканың ӧмезі он артиинаң кӧзідіг тимнеп салған. Кізілернің хайиин ӧӧнінде «Нымах» театрның кӧклӧлерінің экспозициязы паза «Таланты и поклонники» кӧзідіг тартханнар. Театр кӧклӧлерін чағыннаң кӧріп аларға хаҷан даа чапсых. Ойнаҷахтар тіріг осхастар, амох стеллажтардаң сегіріп, синнең чоох алызарлар, ӧріністерінең паза хомзыныстарынаң ӱлезерлер чіли пілдірче. «Таланты и поклонники» экспозицияны Евгения Жильцова тимнеен. Ол библиотекада периодика пӧлиинде істенче, чииттең сығара хазнабыстың саблығ артисттерінің сомнарын паза автографтарын чыыпча. Евгения Александровна - талааннығ кізі, ол Александр Домогаровха, Ирина Алфёроваа, Александр Абдуловха паза пасхазына даа хол салдыртып алтыр.
Сизінгенде, национальнай библиотеканың тоғынҷылары хынығ марығлар иртірерге кӱстер. 2017 чылда мағаа «Литература хараазы» чӧрімде поларға киліскен. Андада чоннаң Мария Пьянованың сурығларына нандыр полбин порастанғабыс. Пӱӱл хатап пілістерімні сыныхтабызарға чаратхам. Нинҷе-нинҷе марығдаң «Литературный ужин» викторинаны таллап алғам. Марығлазарға сағынчатханнарны ӱс ӧмее чарыбысханнар, полғанында ла - тӧрт кізі. Мағаа Софья, Екатерина паза Александра хыстарнаң хада ойнирға ӱлӱс тӱскен.
Библиотека тоғынҷылары, марығны иртіріп, чииске чарыдылған сурығлар пиргеннер. Піс Николай Гоголь «Мертвые души» поэмада помещиктернің омаларын на кӧзіт салған сағынғабыс, сынында анда ас-тамахтаңар илееде чоохталчаттыр. XIX чӱс чылларда квасты «кислые щи» адаҷаңнар, Страсбургтағы пирог сынында хас паарынаң паза идінең тимнелген паштет полтыр. Марығ тузында піс сарыннар толдырғабыс, кибелістер хығырғабыс, сиспектер тапхабыс. Кӱстенізібіс тикке парбаан, пістің ӧме чиңіс тутхан, че анзы даа ӧӧні нимес. Марығ соонда кізінің кинделерні хығырарға кӧңні пар.
«Библиотека хараазында» театр ӧмелері ӧткін араласханнар. Хакас драма театрының артисттері «Слияние музыки и строк» программанаң таныстырғаннар. Иван Салайдинов іскеркі поэттернің кибелістерін хығырған, Светлана Селигеева - «Албынңы» алыптығ нымахтың ӱзігін, чиит артист Митхас Абдин, тізең, концертке писатель Михаил Салтыков-Щедриннің чооғын таллап алтыр. Композитор Татьяна Шалгинова концерт тооза позынын произведениелерін толдырған.
Орыс драма театрының чайаачыларының ойыны Михаил Лермонтовтың тоғыстарынаң пӱткен. Чалахай иирнің халғанҷызынзар кӧрігҷілерні сіліг ырларнаң Хакас филармониязының артисттері ӧріндіргеннер.
Акция соонда ибзер нанчатханымда, Гогольның саблығ поэмазын хатап хығырыбызарға кирек тіп сағын салғам. Пасха оңдайнаң кемнер Чичиковты іди матап сыйлап, азырааннарын піліп албассың.
Автор :
Майя КИЛЬЧИЧАКОВА
| Пн | Вт | Ср | Чт | Пт | Сб | Вс |
| 26 | 27 | 28 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
