Тоғыс оңдайлары алысча
23.11.2020
Хабарлар
Ағбандағы ковидче амбулатория кiнiнiң чоннаң тоғынӌаң оңдайлары алыс парды. Амды ағырыбысхан кiзiлерге андар учреждениенiң диспетчерi хығыртии соонаң на, алай 8(3902)306-003 телефонӌа сығдырадып, азынада пазын салған кӱнге паза часха ла орта килерге чарадылча.
Паза пу кiннiң специалисттерiнзер öкпе сыныхтаӌаң кiнде пол килген пациенттер кiр полар оңдайлығлар, че оларның COVID-19 ағырығ iлезiне сыххан полза паза оларға сыныхтаан имӌiлерi кiнзер парар тусты постары таныхтап салған ползалар.
Ковидче амбулатория кiнiнзер iдöк электроннай почта пастыра пазын саларға чарир. Адрес мындағ: covid19@mb19.
Пiчiкте хайди даа хайдағ сурығны пöк полбинчатханнаңар пас саларға кирек.
Мындағ алызығлар тиктең не кирiлбинчелер. Амбулатория кiнi тоғынып пастаанаң, андар чуғынӌах ағырығ сығыспаан даа кiзiлер айланғаннар. Андағ киректер, тiзең, улуғ хорғыс ағылчалар - оларға коронавирус сынап чух парарға айабас. Аннаңар чарадығның пöгiнi хазых чонны арачылиры полча.
Ағбандағы имнег туразының ööн имӌiзiнiң орынӌызы Ирина Ягодкина iдöк федеральнай кiннең килген имнер Хакасияның ööн городындағы ковидче амбулатория кiнiнде хайди пирiлчеткеннеңер чоохтап пирген:
- Пӱӱнгi кӱнде республиказар кирек имнер прай килгеннер, "Гриппфероннаң" пасха. Ол сала соонаң читiрiлер. Тудығ пу имнi сығарчатхан завод маңнанминчатханынаң палғалыстығ.
Имнер хайди паза кемге пирiлчелер? Оларны диспетчер хығыртии соонаң кiнзер килген кiзiлер алар оңдайлығлар. Че ағырыбысханнарны, иң пастап, андағы специалисттер сыныхтабызарға киректер. Кiзi ағырыға сынап хаптырт салғаны iлезiне сығысса, имӌi ағаа имнернi сах андох пас пирче. Анаң ол рецепт хоостыра орындағы фармацевт имнернi холға пирче. Паза пу кiннең сығара имнернi ибде имненчеткеннерге читiрчелер. Iдöк имӌi изерiстiре пас пирген рецепт хоостыра. Ол тоғысты волонтерлар толдырчалар.
25 ноябрьдаң сығара,тiзең, Ағбандағы СКТ (öкпелер сыныхтаӌаң) кiнiнде пневмонияа, ковидке сыныхтағлар иртiбiскеннернiң аразында öкпелерi 25% соохха алдырт салған, алай öкпелерi арығ, олох туста коронавирусха тест иртiбiскен, че салтарларын ам даа пiлбинчеткен кiзiлерге дее имнер пирiлерi кöрiлче. Мындағ пациенттердеңер искiрiглер, оларны аннаң андар имнир пöгiннең, Ағбандағы ковидче амбулатория кiнiнзер ызыл турарлар. Имнер андох пирiлерлер.
Автор :
Александра Карамчакова
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде