АЭРОПОРТ РЕСПУБЛИКАА НАА ЧОЛЛАР АСЧА
21.06.2016
Хабарлар
Ыраххы чорыхтарға самолётнаң тузаланминчатхан кізілер аэропортха даа улуғ хайығ салбинчалар. Піреезі пис чыл алында республикадағы "Ағбан" аэропорт хайдағ кӧрімніг полғанын сағысха даа кир полбас. Кӧрімі чох, пора тура кізі хайиин даа тартпинчатхан. Пӱӱнгі кӱнде аэропорт наа чуртасха кірібіскен. Аның тиліпчеткеніне чахсы киречі полча аэропорттың нааҷылалған туразы. Ол чазағлығ кӧрімінең ырахтынох кізі кӧрізін тартыпча. Пу, тізең, аэропортта чалғыс ла алызығ нимес.
Хакасия пазы Виктор Зимин ирткен неделяда республика правительствозы кізілерінең хада аэропортта пол килген. Халғанҷы чылларның тоғыс салтарларын пос хараанаң кӧрерге, оларны паалирға паза ам даа ниме идерге киректелчеткенін пӧгінге турғызары - тоғыс чорығының ӧӧн пӧгіннері.
Улуғ аалҷыларны аэропорттың ӧӧн директоры Александр Попов удурлаан. Аэропорттың чирі улуғ, аннаңар, автобустарға одырып, саай-арачылағ станциязынзар читкебіс. Наа пӱдіріг пу наада ла тимге сыххан. Мында ӧрт ӱзірҷең техникаа ӱс орын кӧріл парған. Арачылағҷылар мындох турчалар. Виктор Михайлович оларнаң полғанынаң на изеннескен. Аэропорт устағҷызы республика пазына паза правительство кізілеріне станцияны тиксі кӧзіткен. Ікі хадыллығ турада арачылағҷыларға истіг тоғынар оңдайлар тӧстелген. Мында тынанҷаң, азыранҷаң, ӱгренҷең пӧліктер пар. Пуох тураның ікінҷі хадылында диспетчерскай орныхча. Аның кӧзенектерінең самолёттар учуғар-одырар прай чоллар кӧрінчелер.
Аэропорт туразы хыринда ӧнетін техника кӧзідіге сығарылған. Оларның иң не иргізі самолёттар учуғар-одырар чолларны арығлаҷаң машина полған. Аның тасты нинҷе-нинҷе хадыл сырлалған сарығ ӧңніг сырны кӧре ле тиирге чарир: хайдағ ол иргі. Че тӱрчедең ағаа даа теес чидер - ол нааға алыстырылар. Илееде наа техника кӧрінче. Оларның пірсін пӱӱл алғаннар - самолёттарға сыхталарға паза пусталарға пирбинчеткен машина, деайсер, республика полызиинаң лизингке алылған. Авиакомпанияларны пістің аэропортсар тартып алар ӱчӱн амғы тусха килістіре техника, чоллар, чарытхы сигналлары поларға кирек.
Пассажирлерге чорыхтары ниик полар ӱчӱн, ідӧк чахсы оңдайлар тӧстирге киректелче. Ол тоғыс "Ағбан" аэропортта ідӧк апарылча. Республика пазы килер кӱн алнында ла аэропортта пассажирлерге рейстеріне иртчең сыныхтағ орны паза сағыҷаң зал нааҷылалған. Залның кӧрімі хай-хай алыс парған. Анда ағылах, чарых, кӧп одырчыхтар. Залны паза сыныхтағ орнын хоостығ сӱлейке стене чарча. Стенеде тағлар, ибіҷектер паза аттар хоосталған.
Наа залда Хакасия пазы Виктор Зимин чыылығ иртірген. Аның тоғызында республиканың транспорт паза чол хонии, финанстар, экономика, ис-пай паза чир хайызығларының министрлері араласханнар. Мындох Н.Ф.Катановтың адынаң Хакас хазна университедінің ректоры Татьяна Краснова полған.
- Аэропорт республиканың кии хаалхазы паза визитнай карточказы полча, - таныхтаан Виктор Зимин. - Пӱӱн аның кӧрімі хай-хай артых мының алнындағызынаң. Тиктең нимес піс аэропорттың пары респуликаа тилiс пирчеткенiн тӧремiл таныхтапчабыс. Аның тилізі ӱчӱн улуғ алғыс читірерге сағынчам Хакасияның транспорт паза чол хонии министрi Александр Егоровха, экономика министрі полған, амды Н.Ф. Катановтың адынаң ХГУ ректоры Татьяна Красноваа паза аэропорттың ӧӧн директоры Александр Поповха. Аэропорт ікінҷі чылы парыс ағылча, улуғ даа полбаза - парыс.
Пӱӱнгі кӱнде аэропортта кӧп ниме иділ парған даа полза, итчен, тоғыс ам даа кӧп. Пӱӱнгі чидіглер ӱчӱн ідӧк Россия президенты, правительствозын паза авиацияны алғыстирға кирек. Федеральнай бюджетте сидіксіністер пары республика аэропортың инвестиция программаларында тударға пip дее харығ полбаан.
Олох туста хазнадағы экономика сидіксіністері аэропорт тоғызына теелбин полбинча. Кӧзідімге, пассажирлер саны хызырылча. Че пу сидік сурығ тиксі хазнадағы кии порттарында пар. "Ағбан" аэропорттың ӧӧн директоры Александр Поповтың искіриинең, аэропорт ікінҷі чылы парыстығ тоғынча. Анзы істіндегі сурығларны пӧгерге хабасча. Сағам аэропортнаң нинҷе-де авиакомпания тоғынча. Олар Москвазар, Томсксар, Хызылчарзар, Иркутсксар, Новосибирсксер паза Маньчжуриязар рейстер тутчалар. Аннаң пасха, аэропорт пасха рейстерні, хайзыларын республика чуртағҷылары киректепчелер, азарынҷа тоғыс апарча. Ӧӧн директор пасха даа сурығларға хайығ салған. Тиксі алза, аэропорт тилізі іле кӧрінче. Мында ідӧк Хакасия ӱлгӱлерінің хозымын таныхтирға кирек. Республика бюджедінең пирілген субсидияа аэровокзал туразының тасты нааҷылалған паза даа пасха тоғыстар иділген.
Хакасияның транспорт паза чол хонии министрі Александр Егоров республика пазына 2018 чылға теере чарытхы сигналларын алыстырары кӧрілчеткеннеңер искірген. Амды проект-смета пічіктері тимнелче. Ідӧк вокзал хырин иптирінҷе проект тимде. Аны хоостыра аэровокзалның ибіркі чирі наа кӧрімніг пол парар. Проектте автомобильлерні сыныхтап турғысчаң орыннар кӧріл парған. Виктор Зимин ибіркі чирлерні иптирін пӱӱлӧк тоозарға чахаан.
Орта таныхтаан республика пазы, аэропортта ам даа кӧп иділбеен тоғыс пар. Устағ-пастағ пу чағында vip-залны тиксі тыхтирға пӧгінче. Аннаң пасха, аэропорттың администрация туразын істі-тастынаң нааҷылирға киректелче, ідӧк ӧнетін техниканы нааҷылиры узарадылар.
Хакасия пазы Виктор Зимин аэропорт тоғынҷыларын ізестіг паза турыстыра тоғыстары ӱчӱн алғыстаан. Александр Попов Хакасия правительствозының Аарластығ пічиин алған, аның орынҷызы Виктор Плынин - "Трудовая доблесть Хакасии" медальны. Ідӧк ікі тоғынҷы Хакасия правительствозының Аарластығ пічиине турысхан, Хакасия пазының алғыстазына - пис тоғынҷы. Мындағ чапсых сыйыхтарны читірген соонаң чыылығ тоозылған. Пазағы тоғазығ кӱскӱзін иртеріне ізенче республика пазы, андада аэропорт аалҷыларны иптелген ибіркі чирінең удурлирға кирек.
Автор :
Наталья СУБРАКОВА Сомнар Татьяна ТЮТЮБЕЕВАНИ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы