ХОҒАЙ ААЛНЫҢ ТАҢДАҒЫЗЫ - ПӰӰН ӦСЧЕТКЕН ТӦЛ
20.07.2016
Хабарлар
ХАКАСИЯНЫҢ ИҢ АЛТЫНЗАРХЫ АЙМААНДА - ОРДЖОНИКИДЗЕ АЙМААНДА - ӰР ПОЛБААМ. ТОҒЫС ХООСТЫРА ЧОРЫХХА УДАА СЫХСАБЫС ТАА, МИН АНДАР ЧИТ ПОЛБИНЧАТХАМ. ПУ НААДА, ТІЗЕҢ, УЗАХ ЧОЛҒА СЫҒЫБЫСХАМ. ЧАЛҒЫСХАН НИМЕС, РЕСПУБЛИКАНЫҢ ХАБАРӋЫЛАРЫНАҢ ХАДА. ПІСТІ КОПЬЁВТА "ОРДЖОНИКИДЗЕВСКИЙ РАБОЧИЙ" ГАЗЕТАНЫҢ ӦӦН РЕДАКТОРЫ ЮЛИЯ ПЕРЕВОЗКИНА УДУРЛААН, АНАҢ ПІС АЙМАХ ПАЗЫ АЛЕКСЕЙ ПОПКОВНАҢ ТОҒАЗАРҒА ПАРҒАБЫС.
ОРЫНДАҒЫ ХАБАРӋЫЛАР АЛЕКСЕЙ ВИКТОРОВИЧТӀ МАХТАПЧАЛАР. ПІР ЧЫЛ ЧАРЫМ АРАЗЫНА, АЙМАХНАҢ УСТАП, ПОЗЫН СӦСКЕ ТУРЫСЧАТХАН, ХЫЙҒА, КӰСТЕНӋІК САРИНАҢ НА КӦЗІТКЕН. ПІСТІ АЛЕКСЕЙ ВИКТОРОВИЧ КӦНІ ЧООҒЫНАҢ, АЗЫХ ТУДЫНҒАНЫНАҢ, ЧАЛАХАЙ КӦҢНІНЕҢ АПТААН.
- Удурлапчабыс сірерні Хакасияның алтынзархы хаалхаларында! - айланған Орджоникидзе аймааның пазы хабарӌыларзар. - Пу чорыхта пiс сірерге республиканың алтынзархы аймаан наа саринаң кӧртіс пирербіс. Пістің чапсытчаң орыннарыбыс, Сибирь регионнарында сабланчатхан чирлерібіс илееде, че прайзы ла кӧрімінең ӧріндірбес, піреезі чочындырар даа. Андағ даа полза, піс ол орыннарға улуғ ізеніснең кӧрчебіс, нинӌе-де чыл пазынаң аалҷыларны хай-хай чахсы оңдайларда удурлирбыс сағынчам. Чорыхха сығар алнында, ӧрттер соонаң нааҷылалған Хоғай аалда пол килерге хығырчабыс.
(Орджоникидзе аймааның пазы Алексей ПОПКОВ Копьёвтағы Ровненскай ораманы кӧртісче.)
Аймах пазы піске Копьевтың поғдархазы пол парған Ровненскай ораманы кӧртіскен. Наа ораманың кистінде саңай ла чистектіг чазы полтыр. Позы орама даа олох чистектіг чирлерде тӧстелген. Улуғ нимес Копьёвха 2015 чылның апрельіндегі ӧрттерде чурт чох халғаннарға пӱдірілген туралардаң пӱткен орама орындағы "Рублёвка" пол парған. Наа туралар ораманың ікі саринда иптіг турыбысханнар. Полғанында ла "Мында часка чуртапча" пазыл парған ноған ӧңніг чардыҷах ілілік. Ирткен кӱскӱзін тураа кірген чуртағҷылар наа чуртас пастааннар. Ээлер хоза пӱдіріглер турғысчалар, ӱӱҷіктерін иптепчелер, хайзылары, тізең, тураларын алғытчалар. Ӧріністіг дее чонның кӱстенізін кӧрерге, улуғ хыйалға кіріп, чахсы чуртасха кӧңнілерін тӱзірбееннері морсындырча.
Чоохтирға кирек, пу орамада аймахтың ӧӧн аалындағыларға ла нимес, ідӧк Хоҷых аалдағыларға туралар пӱдірілген. Хоҷыхта ӧртте 70 тура кӧйген, тура ээлерінің чарымы аймах кінінзер кӧзерге чаратхан. Хорғыстығ ӧрт соонда Хоғай аалда ікі бе, ӱс пе пӱдіріг халған, че аалдағыларның пірдеезі чурт орнын алыстырарға ынабаан. Республика ӱлгӱлері аалда прай социальнай пӱдіріглерні нааҷылирға чаратханнар.
Іди пӱӱнгі кӱнде аалда ӱгретчі туразы, ФАП паза клуб пар. Аалда 57 тӱнӱк саналча. Орджоникидзе аймаа пазының орынҷызы Валерий Сулековтың чооғынаң, аалда "Копьевский" аал хонии кооперативi паза И.В. Вагнернің КФХ-зы тоғынча. Чуртағӌыларның ӧӧн чардығы "Копьевскийде" істенче. Кооператив 150 пас інек ӧскірче. Сӱт, саап, сатча. Аал Наа аал чӧбіне кірче, че Копьев оларға чағын орныхча - аалларның аразы 6 километр, аннаңар, сағынчам, чуртағӌыларға аймахтың ӧӧн аалынзар чӧрерге ниик ле.
Піс аалзар килгенде, школадағы олған площадказында олғаннар толдыра полған. Оларның аразында ӱс нанӌы Денис, Марик паза Дима ойнапчатханнар. Оолахтар школаа чӧрерге чит парирлар. Иң улии Денис полча, ағаа - алты час, Марикке паза Димаа - пис час. Килчеткен ӱгредіг чылында оолахтар школа алнындағы ӧмее чӧрерлер, 1-ғы классха парарға тимненерлер. Пос туста оолағастар харындас-туңмаларынаң хада тасхар чӱгӱріс чӧрерге хынчалар.
Кӧп пала ойнапчатханын хайда даа кӧрерге чапсых, кічіг аалда уламох. Аалның таңдағызы - ол пӱӱн ӧсчеткен тӧл, хайзын іҷе-пабалары кічіг чир-суғларын аарлирға ӱгретчелер. Хоғайдағы іӌе-пабалар прайзы пос чиріне хынча, аны аарлапча. Анзын піске киречілепче оларның ӧрт соонаң тӧреен аалларынаң кӧспеске чаратханнары.
Таныхтирға кирек, Хоғай аал республиканың кічіг паза ыраххы аалларын хайраллиры паза тилідері программаа кірче. Аннаңар аалға улуғ хайығ айландырылча. Ӧрттер соонаң аалда социальнай учреждениелердең пасха инфраструктура нааҷылалған. Чарытхы линиялары наазынаң тартылған, пу чағында аалдағы орамаларда асфальт тӧзелерге кирек. Андада чуртағҷыларға уламох ӧріністіг полар. Пос хониинаң айғазарға оларны маллар ӱчӱн тӧлеглер кӧстепчелер. Ӱлгӱ хабазии чох кічіг аалларның таңдағы чуртазы ікінҷілестіг, аннаңар республика пістің кічіг паза ыраххы аалларыбысха хабасчатханы ӧріністіг. Экономикада хайдағ даа сидіксіністер полза, хабазығ ӱзілбинче. Анзын паалап пілерге кирек.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде