ХАКАСИЯНЫ САБЛАНДЫРАРҒА КИРЕК
12.08.2016
Хабарлар
Ағбандағы олимп резерв училищезінің туразында Физкультурник кӱніне чарыдылған ӱлӱкӱн ирткен. Прайзы даа Хакасия пазы Виктор Зимин килерін чидікпин сағаан. Республиканы тиксі сабландырчатхан спортсменнерге, оларның тренерлеріне сыйыхтарны ол читірерге кирек. Губернаторның холынаң алған сыйых кемге дее уламох аарлығ пілдірче нооза.
Че ӱлӱкӱннің ӧӧн чардығы пасталар алнында, РУСАЛ пірігістің адынаң Ағбандағы олимп резерві училищезіне чахсы автобус сыйлап пиргеннер. Клӱсті пу училищенің ӧрт ӱзірҷеңнер паза арачылағҷылар пӧлиинің ӱгренӌізі Дарья Базанға читіргеннер. Ӱзінӌі курста ӱгренчеткен хыстың ӧрінізі оңнығ нимес. Амды чииттерге узах чорыхтарға сых турар, марығларға парар чахсы оңдай табылды.
Піреезі сағынча полар, ноға автобус клӱзі пу хыстың холына пирілген? Анзы тиктең нимес. 2015 чылда, Хакасияда хазыр ӧрттер полғанда, пу училищенің ӱгренӌілері аны ӱзірерге кӧп хати чӧргеннер. Дарья Базан, тізең, махачы хылии ӱчӱн, хазна сыйиина турысхан - «Ӧрт тузында кізілерні арачылааны» медальнаң таныхталған.
Хакасияның пазы Виктор Зимин, аның орынҷызы Владимир Крафт, республиканың спорт министрі Валерий Денщиков паза даа пасха устағ-пастағлар городтағы олимп резерві училищезінің фойезінде тимнелген уғаа чапсых кӧзідігнең хынып танысханнар, спортсменнерге, оларның тренерлеріне аймах сурығлар пир турғаннар. Хакасияны тиксі махтаға сығарчатхан оол-хыстарның илеедезін Виктор Михайлович чахсы таныпча, изеннезіп, паарсах хуҷахтабысча. Анаң пірдең пірге дее чоохтаза халча.
- Сірернің чиңістеріңе ӧрініп, уламох тӱзімніг тоғынар сағыс тӧріпче, - чӱреен пазын полбин салған губернатор чииттер алнында.
Пайрамның ӧӧн чардығы училищенің актовай залында ирткен. Пастап Хакасияның спорт министрі Валерий Денщиков 2015 чылның салтарларынаңар чоох апарған, пу чылға алылған пӧгіннер хайди толдырылчатханынаң хысхаҷахти таныстырған. Валерий Васильевичтің искіриинде кӧп аймах саннар кӧзідімге алыл турғаннар, чапсых тиңнестіріглер полғаннар. Оларның пірсіне ӧрін тее парғам - сынап 2014 чылда Хакасиядаң Россияның піріктірілген командазында 34 спортсмен саналған полза, амды ол кӧзідім 41 кізее чит партыр. Пірдең, олар спорттың аймах-пасха кӧрімнерінең айғасчалар. Анзы таңдағы кӱнге маңат ізеніс пирче тиирге чарир. Хакасияны мыннаң мындар сабландырҷаң чиит тӧл ӧсче.
- Пӱӱнгі кӱнде пістің республикада спорттың 34 кӧрімі тӱзімніг тиліпче, 17 муң кізі оларның секцияларына чӧрче, улуғ-кічіг марығларда араласча, чиңістер тутча, - таныхтаан позының чооғында спорт министрi Валерий Денщиков.
Прайзыбыс чахсы пілчебіс Тӧӧ пазындағы саналығ чӱгӱрҷең спорткомплекстi. Аны уламох тилідеріне федеральнай ахча кӧп хорадылча. Пістің дее республика асхынах нимес ахча хосча. Аннаңар даа Россияның піріктірілген командазына кірчеткен саблығ спортсменнер чоннар аразындағы улуғ марығларға мында тимненчелер.
Физкультурник кӱні алнында кӧп чон араласчатхан марығларны хайди адабас. Хакасияның муңарлап чуртағҷылары «Лыжня России», «Кросс нации» паза даа пасха марығларда ӧткін араласчалар, ГТО комплексінің нормативтерін толдырчалар. Аннаңар Валерий Васильевич ааллардағы паза городтардағы школаларның физкультура ӱгретчілеріне алынӌа алғызын читірчеткенін таныхтаан.
Пайрамға хығыртылған Хакасияның аймахтар паза городтар пастарынзар айланып, спорт министрi орындағы муниципальнай пӱдістер аразындағы спартакиадалар хайди чылдаң чылға ӧзіп одырчатханын, марығлар хазырдаң хазыр иртчеткенін, чиңіс тудары сидіктең сидік полчатханын таныхтаан. Физкультуранаң айғасчатхан устағӌы спорт тилізіне хаӌан даа улуғ хайығ айландырар. Амды тиксі махтаға сыхчатхан оол-хыстарның піреелері ыраххы ааллардаңнар, улуғ спортсар пастағы хаалағны анда иткеннер.
Пайрамға чыылысхан улусты Физкультурник кӱнінең алғыстирға, иң артыхтарына аймах сыйыхтар читірерге Хакасияның пазы Виктор Зимин хығыртылғанда, ол Рио-де-Жанейрода иртчеткен чайғыдағы XXXI Олимп ойыннарында полчатхан киректерге теелген. Анаң нанӌы-арғыстары аразында одырчатхан Вадим Труновты кӧр тапхан, аның кӧңнін кӧдірерге харасхан. Ниик атлетикаҷа чоннар аразындағы класстығ спорт узы Вадим Трунов Бразилияда иртер Паралимпийскай ойыннарға парарға кирек полған. Чир-суғӌыбыс Россияның піріктірілген командазына алылғаннаңар пӱӱл часхызынох искірілген. Че МОК (Чоннар аразындағы Олимпиада комитеді) Россияның командазын Паралимпийскай ойыннарға кирбестеңер чарадығ алыбысхан. Че Вадим Трунов ізеніс чідірбинчеткен осхас, марығларға тимненіп, кӱннің сай тренировкалар иртірче. Андағ пик сындырлығ кізіні хайди улуғлабассың, хайди ағаа поғдархабассың.
Мына ахчалығ сыйыхтарға турысхан оол-хыстар Виктор Михайловичтің холынаң конверттер алчалар. Иң пурун чон алнынзар сыхча бокснаң айғасчатхан Саяна Сагатаева. Аның соонда Вадим Трунов сценада кӧріне тӱскен. Кізілер пик сындырлығ оолны хазыр айа сабызынаң удурлааннар. Хакасияның пазы, тізең, аны паарсах хучахтабысхан, ахчалығ конверт пирчедіп, чылығ сӧстер чоохтанған.
Ахчалығ сыйыхтар алған чахсы спортсменнер санында полғаннар Мария Тюмерекова, Дмитрий Сычев, Анжелика Федорова паза даа пасхалары. Ідӧк ахчалығ сыйыхтар алғаннар оларның тренерлері.
Хакасияның спорт министерствозында илееде ӱр чыллар тоғынған Артём Асочаков республиканың иң аарлығ орденіне турысхан - Виктор Михайлович аның кӧксіне «За заслуги перед Хакасией» орден хазап пирген. Артём Никитич, позының тоғызын іди пӧзік паалаан ӱчӱн, Хакасияның правительствозына, Ӧӧркі Чӧбіне улуғ алғызын читірген.
«Хакас Республиканың физическай культураӌа паза спортча саблығ тоғынҷызы» аарластығ атха турысханнар Марат Кичеев паза Игорь Бадагов. Марат Семёнович олаңай кӱресче Россияның саблығ тренері полча. Че, тӱзімніг тоғызы ӱчӱн, тӧреен чирінде аарластығ атха турысхалах полған. Ам пирілген сыйых аны ӧріндірче.
Хакасия правительствозының Аарластығ грамотазынаң таныхталған кізілер санында полған Николай Денисов. Николай Николаевич республиканың спорт министрінің советнигі полып тоғынча. Олаңай сӧстернең чоохтаза, спорт министерствозынын, пресс-службазынаң устапча. Піске, хабарӌыларға, уғаа кирек кізі. Пасха-пасха марығларда аралазып, сыйыхтығ орыннарға сығып алған чир-суғӌыларыбыстаңар искіріглерні ол таратча нооза. Пӧзік сыйыхха турыстығ кізі.
- Сірер, аарлығ спортсменнер, аймах марығларда матап аралазыңар, чиңістер тудыңар, Хакасияны сабландырыңар. Піс, устағӌылар, сірерге полызарбыс, чидіглеріңе ӧрінербіс. Анзы республикабысты мыннаң мындар тилідеріне полызар, - алғыстаан чииттерні Хакасияның пазы Виктор Зимин Физкультурник кӱніне чарыдылған пайрамда.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы