ААЛ-ГОРОДТАРНЫҢ КӦРІМІН ӦҢНЕНДІРЧЕТКЕН КІЗІЛЕР
12.08.2016
Хабарлар
РОССИЯДА АВГУСТТЫҢ ІКІНӋІ ПОЗЫРАҒЫҢДА ПӰДІРІГӋІЛЕР КӰНІ ТАНЫХТАЛЧА. ПАСТАҒЫЗЫН АНЫ 1956 ЧЫЛДА ӰЛӰКӰННЕЕННЕР. ПӰДІРІГӋІ ПРОФЕССИЯЗЫ АМҒЫ ТУСТА ИҢ КИРЕКТЕЛЧЕТКЕН ПРОФЕССИЯЛАРНЫҢ САНЫНДА. ПУ КИРЕКНЕҢ АЙҒАСЧАТХАННАРНЫҢ ТОҒЫЗЫ ААР ПАЗА НАНДЫРЫҒЛЫҒ. ОЛАРНЫҢ КӰЗІНЕҢ ХАЗНАБЫСТЫҢ ААЛ-ГОРОДТАРЫ КӰННЕҢ КӰНГЕ ӦҢНЕНІП ОДЫРЧАЛАР, ОЛАРНЫҢ КӦРІМІ ЧАХСЫ САРИНЗАР АЛЫСЧА. КИБІРЛИ ПӰДІРІГӋІЛЕР КӰНІНЕ НАА ОБЪЕКТТЕР ТУЗАЛАНЫСХА КИРІЛЧЕЛЕР: ИМНЕГ ТУРАЛАРЫ, ШКОЛАЛАР, ТАХТАЛАР. ІДӦК АҒАА ЧАРЫДЫЛҒАН ПАЙРАМНЫҒ ТОҒАЗЫҒЛАР, КОНЦЕРТТЕР ИРТЧЕЛЕР, ПӰДІРІГӋІЛЕРНІҢ ИҢ АРТЫХТАРЫН, АЛҒЫСТАС ПІЧІКТЕРІНЕҢ ТАНЫХТАП, ЧЕЕСТЕПЧЕЛЕР. АНДАҒ КІЗІЛЕРНІҢ ПІРСІ ПОЛЧА ГЕННАДИЙ МИСТРИКОВ. ОЛ ПӰДІРІГ КИРЕЕНДЕ ОТЫС ЧЫЛ АЗЫРА ІСТЕН ПАРИР.
Геннадий Константинович Пии аймааның Чоғархы Киндірліг аалында 1960 чылда тӧреен. Пасталығ класстарны тӧреен аалында тоозып, 5-ӌі классха Бондаревтегі ортымах школада ӱгренген. Школа соонаң армияа парған, радиотелеграфист полып, пастап Москва облазында служить полған, анан, аны Одесса облазынзар ысханнар. Армиядаң айланғанда, аалда тоғынған. Анаң 1983 чылда Ағбанзар тоғынарға килібіскен. 1984 чылда ӱгредіг комбинадынзар кіріп алған, мында чиит оол пӱдірігҷі специальнозына ӱгренген. Амғы туста Геннадий Константинович позын пасха тоғыста кӧрбинче дее. Кӧп чыллар пӱдірігде тоғынып, ол узын кӧдірген, пілізін алғыт турған. Пӱдірігҷі чалғызан тоғынминча, аннаңар ағаа пасха кізілернең чоохтас пілерге, пірге тоғыс апар поларға кирек. Мынзында Г.К.Мистриковтың сидіксіністер чоғыл тізе, саба полбас.
Пӱӱнгі кӱнде Геннадий Константинович «Пирамида» СК ООО-да плотник-бетонщик полып тоғынча. Пӱдіріг компания предприятиелернең, идінӌектернең паза пос туразын пӱдірерге сағынчатханнарнаң тоғынча. Пу организация пӱдірген объекттернің санында «Арена» садығ туразы, Щетинкин паза Киров орамалар пірікчеткен чирдегі тураға, кондитерскай фабрикаа паза ит комбинадына хоза пӱдіріглер. Ідӧк олар «Фестиваль» садығ туразын пӱдіргеннер, аны Геннадий Мистриков бригадазы айғасхан пӱдіріглернің иң улии полар теен. Тӧстееннең пасти, тура істін иптирінҷе тоғыстарға теере прай олар иттірлер. Амды «Пирамида» СК ООО садығ паза кӧзідіглер иртірҷең тура пӱдір парча. Ол ікі хадыллығ полар паза алтында пір хадыл полары кӧрілче. Аны пӱдірерінҷе тоғыстар наа ла пасталыбысхан ползалар, тоғысчылар тураны наа чылға тоос саларға пӧгін тутчалар.
Тоғызыңарның ӧӧні ниме полча тіп сурғанымда, Геннадий Константинович нандырған: «Пӱдірігҷілер - уғаа кирек профессия. Пістің ӧӧн пӧгінібіс - чахсы паза кӧп чыллар пик турар туралар пӱдірері. Кізілерге оларда чуртирға, тоғынарға истіг ползын. Хайдағ даа тоғыс итчетсе, аның ӱчӱн хатығ нандырығ тударға тимде поларға кирек. Пістің устағҷыбыс Владимир Алексеевич Куюков тоғыс качествозына кӧп хайығ салча. Бригадада чахсы тоғысчылар чыылыс парған, олар прайзы - нандырығлығ, ізестіг кізілер».
Ағбанда Тимірчолӌылар ДК-зында ирткен Пӱдірігҷiлер кӱніне чарыдылған мероприятиеде Геннадий Мистриковты, чахсы, тӱзімніг тоғызы ӱчӱн, Аарластығ пічікнең таныхтааннар. Пӱдіріг компаниязының устағӌызы Владимир Куюков тоғысчызының істенчеткенін пӧзік паалапча: «Геннадий Константинович - нандырығлығ, пӧзік пілістіг тоғысчы. Пістің пӱдіріг компаниябыста ол он чылға чағын істен парир. Кӧп хайығ, иптіг, прай норма-правилоларҷа идерге киректелчеткен тоғысха аны хығырчабыс. Ідӧк ол - уғаа чахсы кізі, ізестіг нанҷы. Хада тоғынчатханнар аны улуғлапчалар, чӧптерін истіп, оларны хайыға аларға сіренчелер».
Оңдай полғанда, Геннадий Константиновичтi паза пу оой нимес тоғыста істенчеткен тоғысчыларны профессиональней ӱлукӱннерінең, Пӱдірігӌі кӱнінең, алғыстапчабыс. Хазыхтарың пик ползын, тоғыстарың тӱзімніг парзын.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы