СИДІК СУРЫҒЛАРНЫ ПӦГЕРІНЕҢЕР ЧӦПТЕСКЕННЕР
19.08.2016
Хабарлар
Пу кӱннерде Псков облазында Россия регионнарының социально-экономическай тилізі хоостыра улуғ чыылығ полған. Аны иртірген Россия Федерациязының правительство кнезі Дмитрий Медведев. Ол чыылығда араласхан Хакас Республиканың пазы Виктор Зимин.
Правительство кнезі Дмитрий Медведев таныхтаан, амғы экономика саринаң сидік тустарда Россия Правительствозы кӧп ӧдістіг регионнарға полызарға кӱстенче. Че олох туста регионнарда устағӌылар тӱзімніг тоғынарға кӱстензіннер, бюджетті толдырарға оңдай тілезіннер, экономиканы тилідер ӧӧн чолларда прай кӱстерін салзыннар.
Чыылығ тузында постарының чӧптерінең чоох тутханнар хай пірее регионнарның устағӌылары. Олар прайзы даа чоохтанғаннар, налог законнары алыс парғанда, бюджетте кӧрілбеен хорадығлар пол парчатханнаңар. Ідӧк федеральнай ӱлгӱдең субъекттерге полномочиелерні хозыбысчалар, че ахча хоза пирілбинче. Аннаңар регионнар устағӌыларына, хоза тоғыстарын толдырар ӱчӱн, кредиттер аларға килісче.
Хакасия пазы Виктор Зимин, ол чыылығдаң киліп, салтарларынаңар искірген:
- Чыылығда регионнар устағҷылары постарының сидік сурығларынаңар чоохтааннар паза оларны хайди пӧгерінеңер чӧптескеннер. Регионнарның кӧбізіне, ахча чидіспин, кредиттерге кірерге килісче. Пістің республика хомай нимес ахча тоғынып алча, чыл сай 13 процентке ӧзіс, че піс 2012 чылдох пол парған дефицит ахчазын чаап полбинчабыс. Алюминийге паза хара тасха ахча паазы илееде тӱс парғанда, налог ахчазын ідӧк ал полбаабыс. Ағаа хоза, піске музей паза перинатальнай кінні пӱдірерге федеральнай ахчаа хоза позыбыстың ахчазын пирерге килісчеткен. Пу объекттер республикаа уғаа киректер, аннаңар оларны табырах пӱдірібізерге кӱстенербіс.
Псков городта полған улуғ чыылығ соонда, сағынчам, піске федеральнай ахчадаң полызығ пирілер.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы