АНЫМҶОХ, РИО-ДЕ-ЖАНЕЙРО!.. ИЗЕН, ТОКИО!
23.08.2016
Хабарлар
Хайдағ даа чахсы алай хомай ниме хаҷан полза тоозыладыр. Андағох оңдайнаң Рио-де-Жанейрода ирткен чайғыдағы XXXI Олимп ойыннарынаң анымҷохтазар тус читкен.
Пiстiң азнаның командазын пӱкӱлее алып алза, ниик атлетиканаң айғасчатхан спортсменнерні тилекейдегі спорт пайрамына позытпин салғаны прайзыбысты тың хомзындырча. Олимп ойыннары тузында даа пістің спортсменнерге хайығ тың на чылығ полбаанын таныхтап турғаннар.
Андағ даа полза, Олимп ойыннары чир ӱстӱндегі чуртағҷыларға спорт ӱлукӱнін, ӧрініс кӱннерін сыйлап пирді. Хайди чарлалған Рио-де-Жанейрода Олимпиада азылчатханда, мында иртчеткен марығларны тилекейде ӱс миллиард артиинаң кізі кӱннің сай кӧр турар. Хайди искірілген полған, Бразилиязар чир ӱстӱндегі 207 аймах хазнаның командалары чыылысханнар.
Россияның піріктірілген командазы толдыра полбаза даа, кӧзідімнері хомай ла нимес. Іди гандбол ойнапчатхан ипчілернің командазы пастағызын на Олимп ойыннарының чиңісчілері полыбысты. Спорттың хай пірее кӧрімнерінде марығлазып, ибзер медальлығ айланған ползалар, ирткен 30 - 40 чыл аразында сыйыхтығ орынға сых полбин турғаннар. Андағ чидіглерге ӧрінерге ле кирек.
Рио-де-Жанейрода ирткен чайғыдағы XXXI Олимп ойыннарында араласхан хазналар аразында орыннар піди ӱлестіріл парғаннар.
Пастағы орында США, аның алтын 46 медаль, кӱмӱс 37 медаль, хола 38 медаль.
Ікінҷі орында Великобритания, аның алтын 27 медаль, кӱмӱс 23 медаль, хола 17 медаль.
Ӱзінҷі орында Хыдат, аның алтын 26 медаль, кӱмӱс 18 медаль, хола 26 медаль.
Россия тӧртінҷі орында, пістіңнернің алтын 19 медаль, кӱмӱс 18 медаль, хола 19 медаль.
Пизінҷі орында Германия, аның алтын 17 медаль, кӱмӱс 10 медаль, хола 15 медаль.
Хайди кӧрчебіс, Россия паза Германия алтын медальлар тиң утып алтырлар, че кӱмӱс паза хола медальлар пістіңнерни артых. Аннаңар тӧртінҷі орын Россияа пирілген.
Оңарылыстығ, спорттың хайдағ даа кӧрімінде, сыйыхтығ орынға сығып алар, уламох чиңіс тудар ӱчӱн, пар-чох кӱс салыл турған. Олимп ойыннары - ол Олимп ойыннары. Аннаңар ізенген кізілерібістің піреелері тың хомзындырғаннар. Пілдістіг, мында чоох парча якут кӱресчі Виктор Лебедевтеңер. Россия чемпионадында кӧмес ікінҷілестіг чиңіс тутхан даа полза, Олимп ойыннарында позын чахсы саринаң кӧзіт пирерге кирек полған. Че ол, чиңіс тудар орнына, сыйыхтығ орынға даа сых полбин халған.
Оріністер паза хомзыныстар соонда халдылар, аның чидіглері тилекейдегі спорт тархынына кір пардылар. Че чуртас ағыны тохтабинча. Теестегі Олимп ойыннары 2020 чылда Токиода иртер. Аннаңар прайзы даа пір ӱннең теен полбас па: «Анымҷох, Рио-де-Жанейро!.. Изен, Токио!»
Автор :
Тимнеен Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы