МАХАЛЫҒ МИКЕНЕҢ ТУЗАЛАНҒАНЫ
14.09.2016
Хабарлар
Тренернің ӧрінізін оңарарға чарир. Аның ӱгренҷізі, улуғ марығда аралазып, маңат тимненіс кӧзіткен, позының кӧдірімінде кӱмӱс медаль утыл апған. Кӱресчінің мындағ чидиинде аның тӱзімніг тоғызының салтары харахха кӧріндіре. Аннаңар Иркутск городта ирткен марығдаңар ол хынып чоохтапча, ӱгренҷізі хайди ізестіг харбасханын махтапча.
Виталий Михайлович Сірер пуох марығда чиңіс тутхан нимессер бе? - сурыбыстым самбоҷа спорт узы, тренер Виталий Михайлович Таскараковтаң.
- Чох, мин харбас чӧрчеткен туста Азия хазналарының чемпионады алынҷа иртчең полған. Улуғ марыға саналҷаң, - нандырча ол.
Аның сӧстерінең, амды Россияның іскеркі чардығының чемпионады, олар аны Азия чемпионады тіпчелер, иртірілчеткен осхас. Анда хазнабыстың 3 федеральнай округының кӱресчілері араласчалар: Уралдағы, Сибирьдегі паза Ыраххы Востоктағы командалар. Спортсменнер саны ідӧк кӧп поладыр. Арға-мӧрійде иреннер паза ипчілер араласчалар. Пӱӱл дее ӱс чӱске чағын кізі чыылыстыр.
- Полған на кӧдірімде пірее чибіргее чағын кӱресчі полған, - чоохха хозылча сым на одырчатхан Кай-гал Сайзан-оол.
Ортымах сыннығ, амыр хылыхтығ кӱресчі Виталий Михайловичтің ӱгренҷілері санында махтаға сыххалах полған. Аннаңар хонҷых Тувада тӧреен-ӧскен оол Хакасиязар хаҷан килгеннеңер сурыбысхам. Пастап Сайзан-оолдаңар истерге киліспеен полған.
- Писче чыл тренировкаа чӧр парир. Піссер ол дзюдо секциязынаң килген. Спорт узына кандидат полған. Дзюдода чи. Самбонаң айғас сыхханда, спорт узының нормативін табырах толдырыбысхан, - чоохтапча тренер.
Кайгал тӧреен-ӧскен чирінде, прай тиң частығлар чіли, олаңай кӱреснең айғазып пастаптыр. Че спорттың ол кӧрімі аның кӧңніне кірбиндір. Анаң дзюдонаң айғас сыхтыр. Пеер аны таныстары хығырып алған осхастар. Ағбанда дзюдо даа, самбо даа секциялары пар. Чиит кізі Виталий Михайловичтi тренеріне таллап алтыр. Сала даа хомзынминча. Пу тусха читіре удур-тӧдір чахсы пілісчелер.
- Хайдағ даа кӱрес кӧрімінең айғасчатхан ооллар чапчаң поларға киректер. Андағ полбаза, хайди харбазып аларзың. Кайгал пістің тӱрк чоннарның махалығ микелерінең тузаланарға тың хынча. Тиктең нимес, аның хынчатхан микелерінің пірсі нанға салып силері полча. Аны ол уғаа махалығ толдырча, - ӱгренҷізін махтапча Виталий Михайлович.
Иркутсксар чӧріп, Кайгал Сайзан-оол 57 кг кӧдірімде харбасхан. Аның кӧдірімінде 18 кӱресчі полтыр. Хайди тидірлер, пірсі пірсінең артых тимненістіг, аймах марығларның чиңісчілері алай сыйыхтығ орыннар алған алып-кӱлӱктер. Аннаңар тоғазығлар кибісте уғаа хазыр ирт турғаннар. Хакасиядаң парған кӱресчі, чиңіс соонаң чиңіс тудып, азах меетсер ізестіг хаалапчатхан.
Мына ол халғанҷы тоғазыға сығарға тимненче. Аның «ыырҷызы» - чир-суғҷызы, сағам Хызылчар крайы ӱчӱн харбасчатхан Артур Ондар. Часнаң улуғ арах. Самбоҷа чоннар аразындағы класстығ спорт узы, Европа чемпионы, тилекей мариинда сыйыхтығ орынға сыххан кӱресчі. Аннаңар даа кибісте уғаа сиргек паза кӧйтік тудынча. Тоғыртын кӧрчетсе, оңнығ ла чапчаң хайынминча, амох ла, пірее микенең тузаланып, «ыырҷызын» саңай сас ойда тастабысхадаға тӧӧй. Сынында аның кӧйтіктенгені полчатпас па. Ол пу марығ тузында чир-суғҷызы хайди маңат харбасчатханын, микелернең махалығ тузаланчатханын кӧрген нооза. Аннаңар чиит оолның кӧйтік сӱмезіне кір парарға іди чочынча.
- Алтын медаль ӱчӱн харбазығда мин аны, нанға кӧдіріп, матап учухтырыбысхам. Че мағаа тӧрт сан пирбин салғаннар, - хомзынча Кайгал.
- Ам даа чиитсің, чиңістерің полар, - часхарча аны тренері.
Пас мееттегі тоғазығ 3:2 саннаң тоозылған, Европа чемпионы чиңіс тутхан. Чиит кӱресчі кӱмӱс медаль утханы - махтағлығ чидіг.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы