ӰН ПИРІСТӀҢ АЗЫНАДА САЛТАРЛАРЫ ИСКІРІЛГЕН
20.09.2016
Хабарлар
ИРТКЕН ПОЗЫРАХТА ПРАЙ РОССИЯДА ПІРГЕ ӰН ПИРҶЕҢ КӰН ИРТКЕН. ХАКАСИЯ ЧУРТАҒҶЫЛАРЫ ОЛ КӰН РОССИЯНЫҢ ХАЗНА ДУМАЗЫНЗАР ДЕГТУТАТТАРНЫ, ПАРТИЯЛАРНЫҢ ФЕДЕРАЛЬНАЙ СПИСОГЫ ХООСТЫРА ПАЗА 35 № ПІР МАНДАТТЫҒ ХАКАС ТАБЫҒ ОКРУГЫНҶА, ТАПХАННАР. ІДӦК РЕСПУБЛИКАНЫҢ ӦӦРКІ ЧӦБІНЗЕР 6 № (АҒБАН Г.) ПАЗА 11 № (САЯНОГОРСК Г.) ТАБЫҒ ОКРУГТАРЫНҶА ХОЗА ТАБЫҒЛАР, АҒБАН ПИЛТІРІАЙМААНЫҢ ПАЗЫНА ПАЗА ПІРЕЕ ПОС УСТАНЫС ОРГАННАРЫНЗАР ТАБЫҒЛАР ИРТКЕН.
КИҶЕЕ ХАКАСИЯНЫҢ ТАБЫҒ КОМИССИЯЗЫНЫҢ КНЕЗІ АЛЕКСАНДР ЧУМАНИН, ХАБАРҶЫЛАРНАҢ ТОҒАЗЫП, ИРТКЕН ТАБЫҒЛАРНЫҢ АЗЫНАДА САЛТАРЛАРЫН ИСКІР ПИРГЕН.
РЕСПУБЛИКАНЫҢ ТАБЫҒ КОМИССИЯЗЫ УСТАҒҶЫЗЫНЫҢ ИСКІРИИНЕҢ, ПУ ТАБЫҒЛАРДА ХАКАСИЯ ТАБЫҒҶЫЛАРЫНЫҢ 39,31 ПРОЦЕНТІ (155617 КІЗІ) АРАЛАСХАН. ТИКСІ РОССИЯНЫ АЛЗА, ТАБЫҒҶЫЛАРНЫҢ ӰН ПИРІСТЕ АРАЛАСХАНЫ ОРТЫМАХТИ АНДАҒОХ - 39 %. ХАЙДИ ТАНЫХТААН АЛЕКСАНДР ЧУМАНИН, ХАЗНА ДУМАЗЫНЗАР 35 № ПІР МАНДАТТЫҒ ХАКАС ТАБЫҒ ОКРУГЫНҶА ТАБЫҒЛАРДА 6 КАНДИДАТ АРАЛАСХАН.
ФЕДЕРАЛЬНАЙ СПИСОКТАРҶА КӰРЕЗІГ 14 ПАРТИЯ АРАЗЫНДА АПАРЫЛҒАН.
Че амды табығларның азынада салтарларынаңар... Россияның Хазна Думазынзар 35 № пір мандаттығ Хакас табығ округынҷа табығларда «Единая Россия» партия сығарған кандидат Надежда Максимова утып алған.
Хакасия табығҷыларының 33,95 проценті (52733 кізі) ӱнін ағаа пирген. Ікінҷі орында КПРФ-тың кандидаты Александр Семёнов - 31,61 % (49093 кізі). Анаң парчалар Дмитрий Буреев (ЛДПР) - 11,30 % (17552 кізі), Людмила Миндибекова («Справедливая Россия» партия) - 9,07 % (14087 кізі), Олег Иванов («Яблоко» партия) - 746 % (11582 кізі), Виктор Верьясов («Зеленые» партия) -2,75 % (4279 кізі).
Партияларның федеральнай списогынҷа ӱн пирісті алза, иң кӧп ӱн «Единая Россия» партия чыып алтыр. Ӱлгӱ партиязы ӱчӱн республикадағы табығңҷыларның 38,06 проценті (59357 кізі) ӱнін пиртір. Ікінҷі орында КПРФ - 20,90 % (32596 кізі), ӱзінҷізі ЛДПР - 19,52 % (30445 кізі).
Ідӧк Россияның Хазна Думазынзар иртчең пис проценттіг хырығны «Справедливая Россия» партия иртіп алтыр. Хакасияда пу партия 717 % табығҷы (11185 кізі) ӱнін чыып алған. Пасха партиялар 5 проценттең ас ӱн чыып алғаннар тіп искірген Хакасияның Табығ комиссиязының кнезі.
Хакасияның Ӧӧркі Чӧбінзер хоза табығларда 6 № табығ округынҷа (Ағбан г.) Сергей Толстихин, табығҷыларның 35,71 % ӱнін чыып, уттыр. 11 № табығ округынҷа (Саяногорск г.) - Александр Векшин (23,36 %). Ікізінең - «Единая Россияның» кандидаттары.
Ағбан пилтірі аймааның пазына табығларда азынада сананыстарнаң «Единая Россия» сығарған кандидадох Елена Егорова чиңіс туттыр. Аймахтағы табығҷыларның 36,89 проценті ағаа ӱнін пиртір.
Асхыс поселоктың пазы Сергей Энграф позының орнында халар. Асхыс станциязының 39,43 % табығҷызы ӱнін тоғынчатхан устағҷаа пирген. Аны ідӧк «Единая Россия» партия сығарған. Асхыс аймаандағох Бондарев аал пазына табығларда «Единая Россияныңох» кізізі Елена Корнева утып алған - 79,43 %. Боград аймаандағы Первомайскай аалның пазына Андрей Поляков («Единая Россия») табылған - 65,63 %. Орджоникидзе аймаандағы Копьев аал пазына табығларда Александр Коропов (пос позын сығарған) утхан - 3788 %. Олох аймахтың Хызыл Ӱӱс аалның пазына Виктор Ербягин (пос позын сығарған) табылған - 52,65 %. Ағбан пилтірі аймаандағы Расцвет аалның пазы Анна Мадисон (пос позын сығарған) полыбысхан - 53,51 %. Пуох аймахтағы Чарков аалнын, пазына табығларда Галина Дорохина (пос позын сығарған) утып алған - 62,12 %.
Шира аймаандағы Тоғызаас аалның пазына Валентина Кокова («Единая Россия») табылған, пу аалның 66,8 процент табығҷызы ӱнін ағаа пиртір.
Табығ комиссиязының кнезі Александр Чуманиннің чооғынаң, ӱн пирҷең кӱнде республиканың табығ комиссиязынзар 3 хоптығ айланыс кірген, орындағы табығ комиссияларынзар - 4 айланыс. Олар прайзы агитация материаллары закон хыйыстыра тарадылчатханынаң паза ӱн пирҷең оңдай сайбалчатханынаң палғалыстығ полған. Сыныхтағлар сайбағларны ілезіне сығарбаан тіп искірген Табығ комиссиязының кнезі. Че табығлар кӱні алнында, «сымзырых кӱнінде», сайбағлар ілезіне сығарылтыр - Ағбанда агитация плакаттары чапсырылған пірее автобустар тохтадылтыр. Хайди чарытхан Александр Чуманин, закон хоостыра «сымзырых кӱнінде» чӧрчеткен транспортта агитация рекламазы чох поларға кирек. Автобустар ээлеріне анзынаңар азынадох искірілтір. Че піреезі ол сизіндіріге хайбаан осхас. Салтарында полиция тоғынҷыларына андағ автобустарны тохтадарға килістір. Пыролығлар административнай нандырыға тартылар.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы