ЧЕМПИОН ПОЛЫБЫЗАР ӰЧӰН КӦП КӰС САЛАРҒА КИРЕК
23.09.2016
Хабарлар
Сомда: В.ИСАЙЧЕНКОВ, В.СЕМЕНЕЦ, Т.ЛЕБЕДЕВА паза М.НЕСТРУЕВ
Пу неделяда Ағбандағы Н.Ф.Катановтың адынаң Хакас хазна университедінің студенттеріне улуғ часка тӱсті! 19 сентябрьда «Олимп ойыннарының саблығ кізілері - Россияның олғаннарына паза чииттеріне» программа хоостыра Хакасиязар килген Олимп ойыннарының чемпионнары ХГУ-ның студенттерінең паза спортсменнерінең тоғасханнар.
ХГУ-даң пасха 21 сентябрьда Олимп ойыннарының чемпионнары ідӧк ХТИ-ның паза Харатас городтың студенттерінең паза спортсменнерінең тоғазығ иртіргеннер. Оларнаң прайзынаң тоғазып алар ӱчӱн, ветераннар чарылып алғаннар. ХГУ-зар Олимп ойыннарының 3 чемпионы килген. Олар - таңма атарынҷа, ниик атлетикаҷа, вело-спортча Олимп ойыннарының чемпионнары Михаил Неструев, Татьяна Лебедева паза Владимир Семенец. Ідӧк оларнаң хада полған делегация устағҷызының орынҷызы Виктор Исайченков. Танызып алған соонаң, университеттің чииттері паза преподавательлері ветераннарға сурығлар пиргеннер.
- «Чемпион» атты ал чӧрерге сидік пе? - сурған ХГУ-ның 2-ҷі курзының студенті.
- Хай пірее спортсменнер, «чемпион» атха турысхан соонаң, ол атха чуртас тооза поғдархап чӧрчелер, че, минің кӧрізімнең, пу пӧзік атха турысхан спортсмен позының опыдын, кӱзін олғаннарға алай ба чииттерге читірерге кирек. Андада ол аттың тузазы уламох улуғ полар, - нандырған Михаил Неструев.
- Ур ниместе Рио-де-Жанейрода чайғыдағы XXXI Олимп ойыннары ирткен. Анда пістің спортсменнерібісті матап хыйыхтааннар. Сірернің туста андағ хыйыхтастар полғаннар ба паза сірернің кӧрізіңернең, ойыннарда пістің спортсменнерібіс чахсы салтарлар кӧзіткеннер бе? - айланған 1-ғы курстың студенті.
- Минің кӧрізімнең, ол хыйыхтастар спортнаң пір дее палғалыстығ нимес, ол - политика сурығлары. Хай пірее хазналар пістің чирлерібісті, ис-пайыбысты алып аларға сіренчелер. Пу наада ирткен Олимп ойыннары чахсы кӧзіт пирген - кем Россияның нанҷызы полча, кем, тізең, піске хынминча. Минің кӧрізімнең, Олимп ойыннарында пістің спортсменнерібіс чахсы салтарлар кӧзіткеннер, - чоохтапча Татьяна Лебедева.
- 2016 чыл Россияда Кино чылы тіп чарлалған. Режиссер полған ползаңар, хайдағ спортсменнеңер кино суурарҷыхсар? - айланған чемпионнарзар Хакасияның экономика министерствозының чииттер политика департаментінің устағҷызы Татьяна Карташова.
- Сынында пістің хазнада уғаа кӧп турыстығ спортсменнер пар. Оларның полғанынаңар кино суурарға чарир, - нандырған Владимир Семенец,
- Пар андағ кізілер, хайзылары пӧзік чидіглерге читкен спортсменнерні хыйыхтапчалар. Андағ кізінең тоғасхан ползаңар, ниме тиирҷіксер? - халғанҷы сурығ пирген 2-ҷі курс-тың студенті.
- Хомзынысха, спортта андағ киректер удаа пол парча. Ол кізілер спортсменнің пір ле сарин кӧрчелер, че олох туста олар пілбинчелер, хайди спортсмен чиңіске читкен. Иң кӱстіг полып алар ӱчӱн, спортсмен пасхазынаң иң артых, иң кӧп тоғынча, - тоғазығның салтарын иткен Михаил Неструев.
Пу паза даа пасха сурығлар тоозылғанда, Олимп ойыннарының чемпионнары ХГУ-ның спортсменнеріне Аарластығ пічіктер паза медальлар читіргеннер. 22 сентябрьда, тізең, олар Сойан-Сус ГЭС-cap экскурсияа парарға паза Саяногорсктың чииттерінең паза спортсменнерінең тоғазығ иртірерге пӧгін тутханнар.
Автор :
Оксана СУНЧУГАШЕВА Сомнар Максим АХПАШЕВТИ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде