ЧАХСЫ КӦЗІДІМ ЧИҢӀСКЕ КӦӦКТІРЧЕ
11.10.2016
Хабарлар
Аймах чылларда Олимп ойыннарының чемпионнары полған саблығ спортсменнер, пістің Хакасиязар киліп, улуғ халых-чарыдығлығ тоғыс иртіргеннер. Олар хайдар даа кірзелер, тоғазығ-чоохтазығ сыбыра хынығ паза тузалығ парыбысчаң. Саарбахтарның даа, чииттернің дее аймах сурығлары тоозылбиныбысчаң.
Андағ тоғазығларның тузазын кӧріп, хаҷанох полған киректі сағысха кир килгем. Тоғыс соонда, Ағбандағы Кӱрес туразынзар парып, таныс тренернең чоох-чаахнаң одырчабыс. Олаңай кӱреснең айғасчатхан ӱгренҷілері, кибісте імектезіп-сойлазып, саңай майых парған чіли тудынчалар.
Тренер, ӱнін тыыдып, ам на оларға кӧзіткен микені чахсы толдырарға чахығ пирібіссе, сала чапчаң хайыныза тӱсчелер. Анаң пазох ла муҷайланып пастабысчалар. Піди сизініп одырчатсам, тренер оларны партерде харбазарға кӧніктірчеткен осхас. Пірсі мике салчатса, ікінҷізі арачыланарға кирек.
Саарбахтар хайди полыбыстылар? Пайаа ла чадап тынчатхан-хыймыранчатхан постары амды оңнығ ла ӧтіркебинчелер, микелернің аймағынаң тузаланарға харасчалар. Олох туста харахтарында чалыннығ от кӧйібіскенге тӧӧй.
Анзына саңай чапсып парып, тренернең удур-тӧдір кӧріс салғабыс, пір дее ниме піл полбинчабыс. Оолағастар, тізең, пірее-пірее хати ізіксер харах тастапчалар, уламох чапчаң паза табырах харбаза халчалар. Кемге іди махтанчалар?
Піс тее ізіксер хылчаңни тӱскебіс. Марығларға чӧрҷең сумказын иңні азыра артын салып, чоннар аразындағы класстығ спорт узы Леонид Чучунов тур тастабыстыр. Аны кӧр салғанда, саарбахтарның оңдай-хылии іди алысханын сизінгебіс. Піссер пастырып, изеннескен, кибістегі палаларнаң кӧмес айғазып аларға чарадыбыстым теен. Тренер тоғыр нимес.
Хаҷан ыраххы Австралиядағы Сидней городта ирткен чайғы Олимп ойыннарында араласхан чахсы кӱресчі, кип-азаан алыстырыбызып, сіліг кӧрімніг борцовкалығ оларның аразында тур тастабысханда, оолағастар сах андох аны ибірібіскеннер. Олимп ойыннарының араласчызынаң піди чағын тоғазарға, чоохтазарға киліспинче нооза. Анзын олар табырах ундутпастар.
- Ол тоғазығ соонаң ӱгренҷілерім саңай алысханнар. Марығларда аралазып, сыйыхтығ орыннарға сығып алҷаңнар. Мына хайди кӧӧктірібіскен палаларны Леонид Чучунов, - чоохтаан ол таныс тренер.
Хакасиязар, тізең, Олимп ойыннарында чиңіс тутхан 9 кізі килгеніне хайди ӧрінмес (аалҷылар санынаң грек-рим кӱрезінең айғасхан Владимир Чебоксаров ла кӱмус медальға турысхан, пасхазы - Олимп ойыннарының чемпионнары). Аннаңар даа оларның халых-чарыдығлығ тоғыстары пістің республикада уғаа тӱзімніг парғаны сыбыра таныхталған.
Олғаннар даа, чииттер дее, улуғлар даа андағ саблығ кізілернең, тоғазып, чоохтазып аларға, сомға суурынарға матап кӱстенҷеңнер. Сурығларның ӧӧні мындағ - хайди Олимп ойыннарының чемпионы полып аларға? Аалҷыларның полраны ла ол чолны позы оңдайынҷа ирткеннеңер хынығ чоохтаҷаң.
Кӧзідімге алза, таңма атарынҷа Олимп ойыннарының чемпионы Михаил Неструев кічігдең сығара тиң частығларны утып аларға харасчаң полтыр. Іди марығдаң марыға тимненізін ӧскіріп, 14 частығдох таңма атарынҷа СССР-ның спорт узы полыбыстыр. Хайдағ даа сидік туста тӧдір пазынмасха, чиңіске ле кӱстенерге - мына аның ӧӧн пӧгіні полған спорт марығлары тузында.
Елена Швайбович, тізең, баскетболнаң айғазарға сағынминдыр даа, Олимп ойыннарының чемпионы полыбызардаңар тӱзебиндір дее. Ирина Роднина - мына кемге тӧӧй поларға харасхан, пуста конькиліг хоости чыларға позын тимнеен. Че най пӧзік ӧс парғаны ағаа харығ полыбысхан. Ирік чохта, баскетболнаң айғазарға киліскен. Че ол позының алнында турғысхан пӧгіннерні толдырарға паза чиңіс тударға кӧнік парғаннаңар чидіглер полған.
Аалҷыларның кӧрізінең, Хакасиядаң хайди даа пірее Олимп ойыннарының чемпионы сығарға кирек. Анзына мында прай оңдайлар пар. Парчан сылтағ постаң. Марығларда чиңіс тударға олар кӧстег-кӧӧктіріг пир салдылар, чахсы кӧзідім полып халдылар.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы