СТАНЦИЯЛАРДА ТОХТАП, ЧОННЫҢ ХАЗИИН СЫНЫХТАПЧАЛАР
19.10.2016
Хабарлар
Хакасиязар Хызылчар тимір чолларының «Хазых поезді» кил парды. «Доктор Войно-Ясенецкий (Ах чарых Лука)» чӧптер паза диагностика кіні пістің республикада пip неделя тоғынған.
«Хазых поезді» Палыхтығ суғ, Пирікчул, Писхамҷы аалларда паза Асхыс станцияда тоғынған. Чонға терапевт, педиатр, невролог, уролог, гинеколог паза пасха даа специалисттерде хазиин сыныхтанып аларға чарир полған. Хакасиязар чол тудар алнында, имҷілер Кемеров облазында пол килтірлер.
Пу кіннең устапча хирург паза уролог имҷі Екатерина Георгиевна Самсонюк. Пір кӱнде «Хазых поездінзер» килчеткеннер санға алылчалар. Асхыс станцияда поезд ӱс кӱн турған. Иртеннең чон имҷілерзер кіріп аларға маңзыраан. Имҷілер, тізең, 8.00 частаң 18.00 часха теере тоғынғаннар.
«Хазых поезді» 2007 чылдаң сығара тоғызын апарча. Аның пӧгіні - ыраххы регионнардағы чурттығ чонға имнег сыныхтаан паза чӧптер пирері.
- Хай пірее аалларзар чол даа чоғыл, - чоохтаан Екатерина Георгиевна. - Тимір чол устанызы піске тиріглернең, техника саринаң полызығ пирче. Хызылчар крайының хазых министерствозы имҷілерге чал ахчазын тӧлепче.
Хакасияның аалларынзар «Хазых поезді» килердеңер орындағы устаныс чонға чахсы искіртір. Пір кӱнде 150-ҷе кізі имҷілерзер кіріп аларға маңнан турған тіп чоохтапча поездтің ӧӧн имҷізі. Терапевт паза хирург имҷілер прай даа чирде пар полза, невролог, окулист, стоматолог имҷілерзер кізілерге кіріп аларға сидік. Лор имҷізер теес полыбызадыр.
Анализтерні кізілер имҷілернің пічии хоостыра иртчелер. Пу поездте рентген, УЗИ, анализтер лабораториязы тоғынча. Рентген итчеткен наа тиріг тузаланылча, ол хазыхха хорғыс ағылбинча. Ирткен чылда имнег тиріглері тиксі нааҷылалтыр.
Хызылчар тимір чолларының «Хазых поезді» чыл ибіре тоғынча. Хызылчар крайы, Кемеров паза Иркутск областьтарында, Хакасияда пол килчелер. Чылда он хати чорыхха сыхчаттырлар. Июль - августта имҷілер тынаға парыбысчалар.
Пу 13 вагоннығ поездті полған на станцияда турғызар оңдай чоғыл. Пір вагонның на ізии чонға азых. Бахилалар кизіп, имҷілерзер вагоннарҷа ӧтіре чӧріп кірчелер. Оӧн имҷіні тілеп, пас чӧрчеткенімде, имҷілерзер теестер полған. Екатерина Георгиевназар, уролог имҷізер, теес улуғ полған. Урологсар кӱнде 30 - 35 кізі кірче. «Ӧӧнінде пӱгӱректерде тастар полча», - чоохтаан Е.Г.Самсонюк. Имҷілер им оттар, арығ суғ ізерге чӧп пирчелер. Имҷі операция сағам пірдеезіне киректелбинче тіп таныхтаан.
Сыныхтағларға килген кізілер пурун поезд регистратуразынзар айланчалар. Терапевтсер чӱрекнең ағырығ кізілер кӧп айланчалар, эндокринологсар хандағы сахарны сыныхтабызарға кіредірлер. Кӧп ипчі гинекологсар айланча. Мындағ имҷілерде сыныхтанарға аалларда оңдай чоғыл нооза.
Чиит ирен Владимир ипчізінең палаларын имҷілерге кӧзідерге ағылтырлар. Регистратурада ікі имҷі-специалистсер кірерге чӧп пиртірлер. Тееске турып, имҷізер кірер тусты сағааннар.
80 частығ ууҷа Галина Христофоровна чӱреен сыныхтанарға килген. Аның хазиин невропатолог паза терапевт имҷілер сыныхтааннар. Терапевт ууҷаның чӱреен кардиограмма пастыра сыныхтаан. Имҷі хазииңар чахсы тіп чоохтаптыр.
Мындағ «Хазых поезді» чӧрчеткені уғаа чахсы тіп чон чоохтапча. Имҷілер кізілерге тузалығ чӧптер пирчелер алай ба орындағы имҷілерзер айланарға чоохтасчалар. Постарының хазиина хайығ салчатханнар, оларның чӧптерін толдырып, хазыхтанып алар оңдайлығлар.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы