ӀҶЕ КӰНІ - ЧАРЫХ ӰЛӰКӰН
25.11.2016
Хабарлар
КИӋЕЕ АҒБАНДА ДРАМА ТЕАТРЫҢДА ХАКАСИЯНЫҢ ПАЗЫ ВИКТОР ЗИМИН РЕСПУБЛИКАНЫҢ ИПЧІЛЕРІН ЧАҒДАПЧАТХАН ІӋЕ КӰНІНЕҢ АЛҒЫСТААН. ПУ ӰЛӰКӰНДЕ ІДӦК АРАЛАСХАННАР ХАЗНА ДУМАЗЫНЫҢ ДЕПУТАДЫ НАДЕЖДА МАКСИМОВА, ХАКАСИЯДАҢ ФЕДЕРАЦИЯ ЧӦБІНДЕГІ КІЗІЗІ ВАЛЕНТИНА ПЕТРЕНКО, ХАКАСИЯНЫҢ ӦӦРКІ ЧӦП КНЕЗІ ВЛАДИМИР ШТЫГАШЕВ.
- ААРЛЫҒ ІӋЕЛЕР, СІРЕРНІ ПРАЙЗЫН ЧАРЫХ ӰЛӰКӰННЕҢ АЛҒЫСТАПЧАМ! ПАЛАНЫ ӦСКІРЕРІ - ОЛ УЛУҒ ТОҒЫС. РЕСПУБЛИКАДА ПАЛА КӦП ТӦРІПЧЕГКЕНІ ӦРІНДІРЧЕ. СІРЕРНІҢ ПАЛАЛАРЫҢ РОССИЯНЫҢ ПОҒДАРХАЗЫ ПОЛЧА, - ТАНЫХТААН РЕГИОН ПАЗЫ.
ЧООХ ТУТХАН СООНАҢ ВИКТОР МИХАЙЛОВИЧ ІӋЕЛЕРГЕ ТАНЫҒЛЫҒ СЫЙЫХТАР ПАЗА АЛҒЫСТАСТЫҒ ПІЧІКТЕР ЧИТІРГЕН. ГУБЕРНАТОРНЫҢ ЧЫЛЫҒ СӦСТЕРІНЕ ХОЗЫЛЫП, МОСКВАДАҢ КИЛГЕН УЛУҒ ПАСТЫХТАР НАДЕЖДА МАКСИМОВА ПАЗА ВАЛЕНТИНА ПЕТРЕНКО ІДӦК ПРАЙ ІӋЕЛЕРНІ ӰЛӰКӰННЕҢ АЛҒЫСТААННАР.
Халғанӌы чылларда Хакасияда пала кӧп тӧріпче. Пылтыр сигіс муңҷа ипчі іҷе пол парған. Пу пӧзік сан. Амғы ипчілер пала табарға хорыхпинчалар, хазна паланы азахха турғызарға чахсы полысча. Ӱс чыл мының алнында республиканың ӱлгӱзі пӧгін турғысхан - регионда пала кӧп тӧріпчеткеннеңер, піске хайди даа перинатальнай кін кирек. Пу сурығны Виктор Михайлович Россия президентi Владимир Путиннең ӱзӱрген. Чарадығ алыл парған - Хакасияда перинатальнай кін полар! Хысха тус аразына перинатальнай кіннің туразы орнында пик турыбысхан. Аның ізии килчеткен чылның пастағы кӱннерінде іӌе поларға тимненчеткен ипчілерге азылар.
Хакасия тиліпче. Халғанҷы пис чылға республикада 130 азыра школа паза олған сады пӱдірілген паза нааҷылалған. Пу тоғыс мыннаң мындар узарадылча. Амды пістің региондағы олған садтарынзар 3-7 частығ палаларға теес чоғыл.
Амғы ипчілер кӧп палалығ іӌе дее поларға чочынминчалар. Ӱзінӌі паза аннаң кӧп пала тӧріткен алай ӧскірерге алған іӌее 100 муң салковай тӧлелче. Тӧрт чыл аразына республиканың іҷе капиталын пис муңҷа сӧбіре алған. Ідӧк кӧп палалығ сӧбірелерге чир участогы тикке пирілче, аарлығ микроавтобустарның клӱстері читірілче. Ӱр ниместең сығара, тізең, Хакасияда пip саңай ӱс пала тапхан іӌее 1 миллион салковай пиріл сыххан.
Хакасияның ӧӧн городында халғанӌы олған туразы чабыл парған. Аның прай кічіг чуртағҷылары наа сӧбірелерзер тарасхлап парыбысханнар. Анзы ӧріністіг. Пала сӧбіреде ӧзерге кирек.
- Мині пӱӱнгі ӱлӱкӱнге хығырғаннарына ӧрінчем, - тіпче Хакасия пазының холынаң танығлығ сыйых алған Ольга Куюкова. - Мин Таштып аймаандағы Пыдырах аалдаңмын. Хонғаным Пётр Петровичнең ӱс пала ӧскір салғабыс.
Аалда фермер тоғызынаң айғасчабыс, маллар тутчабыс. Техника аларға грант утып алғабыс. Ол ахчаа от тоғынарға пресс, тырбос, косилка алғабыс. Хонғаным мал имҷізі полча. Піске Валентин оолғыбыс чахсы полысча. Ол піснең хада чуртапча. Катя хызым паза Юра оолғым Ағбанда чуртапчалар.
Ӱлӱкӱнде Ағбанның чайаачы ӧмелері іҷелерге концерт кӧзіткеннер.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы