ХАКАСИЯНЫҢ ИҢ ЧАХСЫ ПРЕДПРИЯТИЕЛЕРІ АРАЛАСТЫЛАР
25.11.2016
Хабарлар
Ағбанда 22-24 ноябрьда Топановтың адынаң драма театрында республикадағы «Хакасияда иділген!» IV кӧзідіг-ярмарка паза регионнар аразындағы «Хакасияның паза Ӱстӱнзархы Сибирьнің иң артых предприятиелері» VIII кӧзідіг ирткен.
Анда аймах ниме-ноолар сығарчатхан, полызығлар пирчеткен предприятиелер араласханнар. Пістің республикада кічіг бизнестің регионнар аразындағы кӧзідіглерін, форумнарын, «тегілек столларын», презентацияларын иртірері кибірге кір парған. Пу мероприятиенi азып, Хакасияның пазы Виктор Зимин таныхтаан:
- Бизнес Хакасияның муниципальнай пӱдістерінің чонына тоғыс пирче паза чахсы кирек ниме-ноолар сығарча. Пӱӱнгі кӱнде, пістің хазнада экономика саринаң сидік полза даа, Хакасияда пос киреенең айғасчатхан кізілернің саны ӧсче. Пістің регион да фермерлернің не саны 1,5 муңа читкен. Полызығлар пирчеткен предприятиелернің саны мыннаң даа кӧп. Бизнеске хабазарына федеральнай бюджеттең 90 млн. салковай пирілген. Килер чылда ол ахча грант оңдайынаң пирілер.
Хай пірее предприятиелер «Хакасияда иділген!» кӧзідіг-ярмаркада чыл сай араласчалар. Оларның санында сӱт ас-тамаан сығарчатхан «Тузалығ ас-тамах лавказы», «Сибирь» ООО-лар, палых паза талай ас-тамаан сығарчатхан «Компания «Рыбный мир» ООО. Че хай піреезі мындағ кӧзідігде пастағызын на араласча. «Ис-пай абдыраҷағы» садығ павильонында хакас ипчі аймах фрукттардаң иділген чахайахтар, нинӌідең тимнелген чазанӌыхтар кӧзідіге сығарған. Ол Ағбан городтың чуртағӌызы Илона Сунчугашева полтыр. Илона Валерьевна «Диалог Сибирь-Абакан» ООО-да бухгалтер полча.
- Кӧзідіге сӱлейке монӌыхтардаң, нинӌідең иділген чазанҷыхтар, исте акрил сырнаң хоостаан хоостар, фрукттардаң, чир тамаанаң тимнелген чахайахтар сығарғам. Пу ниме-нооларны Сабина хызымнаң хада пос туста итчебіс. Палалар ӧс парғанда, пос тус кӧп пол килген, аннаңар пірее нименең айғазарға сағыныбысхам. Мының алнында кип-азах кӧп палғаҷаңмын, макраменең айғасхам. Че тӧрт чыл мының алнында нинҷінең ӱрерге ӱгреніп алғам. Пастап ӧӧрелеpiме сыйыхтар итчеңмін. Анаң фрукттардаң, чир тамаанаң чахайахтар тимнирге ӱгреніп алғам.
Ӧӧреме тӧреен кӱніне андағ сыйых сыйлап пиргенімде, аның кӧңнiне уғаа тың кірген, аалҷылары даа чапсааннар. Хада хонғаным ДВП-даң камин ит салған. Піс хызымнаң аны Наа чыл ӱлӱкӱніне килістіре чазабысхабыс. Каминні арғыстарыма тимнеен полғабыс.
Кӧзідіге сығарылған ниме-нооларны Интернет пастыра сатчабыс. Мині «ВКонтакте», «Ғасеbоок», «Одноклассники» социальнай сетьтерде таап аларға чарир. Пу кӧзідіг - пістің пастағы опыдыбыс. Мында олаңай ус кізі чіли араласчам, - теен Илона Валерьевна.
Кізілер, андар пастырып, хайхастығ порчоларны чағын арах кӧpiп алчатханнар. Олар гранаттаң, кивидең, мандариннең, грейпфруттаң иділгеннер. Аразында тіріг чахайахтар кӧрінчеткеннер. Илона Сунчугашеваның чооғынаң, амғы туста мындағ чахайахтар модада, аннаңар таныстары тимнеп пирерге чахыпчалар.
Кредит пирчеткен «ФинансИнвест» кооператив пу кӧзідігде ідӧк пастағызын на араласты. Аның устағӌызы - Денис Казагашев.
- Пістің предприятие ӱзінӌі чылы тоғынча, ол сӧбірелерге іӌе капиталы полызиинаң чурт алып аларға полыеча. Палаа ӱс час читкелекке іӌе капиталы полызиинаң чурт алып аларға алай пӱдіріп аларға полысчабыс. Ідӧк пістең кредит алып аларға алай ахчаны кооперативте хайраллирға чарир. Ӏӌе капиталынаң тузаланар кізілернің саны ӧсче. Пу тусха теере пу сурығҷа республикада ла 500-че кізі айланған. Пістің Ширада, Минсуғда, Курагинода, Ужурда филиаллар пар. Пасха даа регионнарда филиаллар азарға пӧгінчебіс, - сағыстарынаң ӱлескен Денис Казагашев.
Пасха регионнардаң килгеннернің санында Новосибирсктегі чурт чылығлирынҷа плёнка сығарчатхан «Хит Лайф», Ворсма городтағы пычахтар сығарчатхан «Мастер-Гарант» предприятиелер полғаннар. Кізілер пычахтарны чапсып кӧрчеткеннер. Ас-тамах садылчатхан орыннарда чон кӧп хайынған. «Малинники» ООО сығарған тадылығ халазахтарны, торттарны, конфеттерні чон матап алчатхан. Пылтыр пу предприятие «Хакасияда сығарылған!» кӧзідігнің чиңісчізі полған.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы