ПРИИСКОВАЙҒА НАА ТЫНЫС ПИРЕРГЕ
29.11.2016
Хабарлар
Ирткен неделяда Хакасияның пазы Виктор Зимин Орджоникидзе аймаандағы Приисковай аалны тилітчең оңдайларға чарыдылған алғым чыылығ иртірген. Хакасияның иң алтынзархы паза ыраххы аалынзар туристтер кӧп кил сыхханнар. Республиканың ӱлгӱлері, ол кирекке хабазып, аалны тилідерге пӧгін турғысханнар.
Регион устағӌызы Виктор Зимин, пастап чорыхха сығып, чыылығны Приисковай аалда иртірерге пӧгінчеткен. Че Орджоникидзе аймаанда хар чаапчатханы паза чол айғы пол парғаны сылтаанда, министрлер кабинедінің чыылии правительство туразында ирткен.
Ноябрь пасталчатханда, республика пазы Приисковайзар тоғыс чорығынаң чӧрген. Пу ыраххы паза тағлығ чирде орныхчатхан аалда, орындағы алтын аныпчатхан предприятие изелген соонаң, чуртас турыбысхан полған. Че соонаң андағы сіліг чир-чайааннығ орыннар саналығ, сноу-бордтығ чыларға паза тирең харҷа снегоходтығ ойладарға хынчатханнарның хайиин тарт сыххан. Туристтер андар прай даа Россия регионнарынаң кил сыхханда, чапчаң идінӌектер Приисковайда аалӌы тураларын пӱдір сыхханнар. Пӱӱл ле анда 7 наа гостиница пӱдіріл партыр.
Хакасияның иң алтынзархы аалынзар чылда онарлап муң турист килчеткені Приисковай чуртағҷыларына наа ізеніс пирче. Аннаңар республика ӱлгӱлері ол кирекке хабас пирерге чаратханнар.
Хакасия пазы Виктор Зиминнің чахиинӌа ол кӧстегнең Приисковай аалны тилітчең ӧнетін программа тимнелче. Ыраххы аалның чуртазын чахсыландырарында республиканың прай даа министерстволары аралазар. Ирткен чыылығда ол пӧгіннең пу чағынғы туста Приисковайда хайдағ тоғыс толдыр саларға киректелчеткенінеңер чоох парған.
Иң пастағы пӧгіннернің санында - андағы школаны паза имнег пунктын тыхтиры. Хаӌан-да пик чуртаан Приисковай аалның школазы улуғ, 320 ӱгренҷее кӧрілген. Амғы туста анда 67 ле пала ӱгренчеттір. Хакасия пазының орынҷызы Ирина Смолинаның искіриинең, школа хомай нимес оңдайлығ, че тыхтағ тоғызын кирексіпче. Школаны тыхтирына 11 миллионӌа салковай киректелер.
- Школа тыхталза, аның туразынзар хоза Культура туразын паза библиотеканы кӧзірібізерге чарир, - сағызынаң ӱлескен Смолина, - Олар орныхчатхан туралар хай-хай уйан.
Виктор Зимин ол чӧпнең чарасхан, че олох туста школаның тастындағы кӧрімін иптіг ит саларға пӧгін турғысхан.
Пасха сурығ - имнег пункты. Приисковай аалдағы амбулатория иргі турада орныхча. Анда ікі медсестра тоғынча, че пос имӌізі чоғыл. Неделяда пip ле хати имӌі кил парчаттыр. Имнег пунктын тыхтирына, андар читіре оборудование паза табырах имнег полызии автомобильін аларына 3 миллионӌа салковай киректелер тіп кӧрілче: Хакасияның пазы табырах полызығ машиназын алар сурығны республиканың хазых хайраллаӌаң министерствозына арт салған.
Хазых хайраллаӌаң министр Наталья Коганға ідӧк Приисковайда тоғынар имӌі табарға чахаан. Имчее чуртаҷаң орын табары, тізең, Орджоникидзе аймааның пазы Алексей Попковха артылған. Соонаң имҷее Приисковайдох наа чурт пӱдір пирері кӧрілче.
Ағырсымнығ сурығ иргі чурттар. Приисковайда иргі ағас барактар кӧп, піреезінде квартиралар тастал парған. Ол иргі барактар, наа пӱдірілген гостиницалар хыринда турып, кӧрімні ардатчалар. Хакасияның пӱдіріг паза ЖКХ министрі Сергей Можаровха чуртағҷыларны изелчеткен туралардаң кӧзірерінҷе федеральнай программа тоғынарға пӧгін турғызылған. Ідӧк республиканың чонға тоғыс тапчаң хазна комитедіне Приисковай аалның тоғыс чох чуртағӌыларына істенҷең орыннар табарынӌа ӧткін тоғынарға чахығ пирілген. Ол санда андағы иргі барактардаң пасха аал-городтарзар кӧзерге сағынчатханнарға хабазарынӌа.
Аалның инфраструктуразын алза, мында ӱлгӱлер пастап чарытхынаң паза суғны арығлаӌаң пӱдіріглернең палғалыстығ сидіксіністерні пӧгерге сағыс тутчалар. Амғы туста аалдағы туралардаң паза турбазалардаң кірліг суғ ағын суғзар кір парча осхас.
- Суғны арығлаҷаң пӱдіріглер хайди даа пар ползын, - таныхтаан Виктор Зимин. - Пӧгін турғысчам - проект тимнеп, пӱдіріп пастирға.
Андағы чонның чуртазын паза туристтернің тынаан хорғыс чох идер ӱчӱн арачылағҷыларнаң сурығны пӧгібіскеннер. Хакасия пазының орынӌызы Владимир Крафттың искіриинең, Приисковайзар 6 арачылағӌы парыбысхан. Олар анда хараа-кӱнӧрте дежурство апарарлар. Ідӧк анда ӧрт ӱзірчеңнер частьы тӧстелер. Ӧрт ӱзірҷең машинаны Ағбандағы аэропорттаң алып аларға чарир тіп искірген чол хонии паза транспорт министрi Александр Егоров. Аэропортха ӧрт ӱзірӌең наа техника алылған сылтаанда.
1 декабрьдаң ол ыраххы аалның пос участковайы пар полар. Амғы туста анда вахта оңдайынаң 2 полиция тоғынӌызы дежурство апарча. Олар 10 кӱн анда тоғынарлар, анаң теестегі 2 тоғынӌы оларның орнына Приисковайзар парар тіп чарытхан Хакасияӌа МВД министрі Илья Ольховский.
- Піс, пірге ынағ тоғынып, пу аалға наа тыныс пирерге кирекпіс, - салтарлар идіп, тиксі пӧгін турғысхан Хакасияның пазы.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы