БЮДЖЕТ ПАСТАҒЫ ХЫҒЫРЫҒДА АЛЫЛ ПАРҒАН
02.12.2016
Хабарлар
ХАКАСИЯНЫҢ ӦӦРКІ ЧӦП ДЕПУТАТТАРЫ 29 НОЯБРЬДА 33-ӌі СЕССИЯА ЧЫЫЛЫСХАННАР. СЕССИЯНЫҢ ӦӦН СУРИИ РЕСПУБЛИКАНЫҢ 2017 ЧЫЛҒА ПАЗА ПЛАНДАҒЫ 2018, 2019 ЧЫЛЛАРҒА БЮДЖЕДІ ПОЛҒАН. ТИКСІ ПУ СЕССИЯДА ДЕПУТАТТАР 30-ха ЧАҒЫН СУРЫҒ КӦРІБІСКЕННЕР. СЕССИЯНЫҢ ТОҒЫЗЫН РЕСПУБЛИКА ПАРЛАМЕНТІНІҢ УСТАҒӋЫЗЫ ВЛАДИМИР ШТЫГАШЕВ АПАРҒАН.
СЕССИЯНЫҢ ПАСТАҒЫ СУРЫҒЛАРЫ САНЫНДА ХАКАСИЯНЫҢ ТАБЫҒ КОМИССИЯЗЫНЫҢ ӰН ПИРӋЕҢ ПРАВОЛЫҒ КІЗІЛЕРІН ТАБАРЫ ПОЛҒАН.
ХАЙДИ ЧАРЫТХАН ӦӦРКІ ЧӦПТІҢ КОНСТИТУЦИОННАЙ ЗАКОНОДАТЕЛЬСТВОӋА, ХАЗНА ПӰДІРИИНӋЕ, ЗАКОННОСТЬЧА ПАЗА ПРАВОПОРЯДОКЧА КОМИТЕДІНІҢ КНЕЗІ СВЕТЛАНА МОГИЛИНА, 16 ДЕКАБРЬДА РЕСПУБЛИКАНЫҢ ТАБЫҒ КОМИССИЯЗЫНДАҒЫ КІЗІЛЕРНІҢ ПОЛНОМОЧИЕЛЕРІ ТООЗЫЛЧА. ЗАКОН ХООСТЫРА РЕГИОННЫҢ ТАБЫҒ КОМИССИЯЗЫНЗАР 7 КІЗІНІ ХАКАСИЯНЫҢ ПАЗЫ ТААПЧА, 7 КІЗІНІ - ӦӦРКІ ЧӦП. КАНДИДАТТАРНЫ ПАРТИЯЛАР, РОССИЯНЫҢ ӦӦН ТАБЫҒ КОМИССИЯЗЫ ПАЗА ХАКАСИЯНЫҢ ТАБЫҒ КОМИССИЯЗЫ СЫҒАРЧАЛАР.
Республиканың депутаттары пу сурығны талас чох, чапчаң пӧгібіскеннер. Іди чазыт ӱн пирістің салтарларынҷа Ӧӧркі Чӧптең сығара Хакасияның наа Табығ комиссиязынзар табылғаннар:
Ольга Куюкова, Россияның Ӧӧн Табығ комиссиязы сығарған;
Владимир Тогочаков, Хакасияның Табығ комиссиязы сығарған;
Евгения Милькова, «Единая Россия» партиядаң;
Олег Яровицкий, «Коммунисты России» партиядаң;
Вячеслав Гитер, «Справедливая Россия» партиядаң;
Оксана Разварина, КПРФ-таң;
Сергей Гребцов, ЛДПР-даң.
Светлана Могилина, республиканың Табығ комиссиязының наа табылған кізілерін алғыстап, олар турыстығ тоғынарларына ізенізін читірген. Хакасияның Табығ комиссиязы устағҷызына кем табылары соонаң пілдістіг полар. Наа табылған кізілер паза Хакасияның пазы турғысхан 7 кізі Табығ комиссиязының устағҷызын декабрьда табарлар тіп кӧрілче.
Ідӧк пу сессияда депутаттар Саяногорск городтың 3 № чарғы участогының мировой чарғычызына Олеся Кайлачакованы турғызарынаң паза Хакасияның Адвокаттар палатазындағы квалификация комиссиязынзар Ӧӧркі Чӧптең сығара Светлана Васильеваны табарынаң чарас салғаннар.
Сессияның ӧӧн сурии полчатхан «Хакас Республиканың 2017 чылға паза пландағы 2018, 2019 чылларға бюджеді» закон проектіне депутаттар иң кӧп тус чарытханнар. Анзы пілдістіг, пу ахчалығ пічікче піске чағынғы чылларда чуртирға килізер нооза.
Республиканың килер чылға бюджедінең Хакасияның финанстар министрі Семён Аёшин таныстырған.
- Республиканың 2017 чылға бюджедінің тиксі парыстары 19 миллиард 76 миллион 244 муң салковай полар тіп кӧрілче. Хорадығлары - 24 миллиард 58 миллион 629 муң салковай. Бюджет дефициді 4 миллиард 982 миллион 385 муң салковай полар тіп саналған, - искірген ол.
Бюджеттеңер закон проектінде Москвадаң пирілӌең ахчалығ полызығ сині пӱӱлгі чылни чіли салылған - 2,3 миллиардча салковай. Че федеральнай бюджеттең кірер ахчаның сині сала пӧзік поларына ізеніс пар осхас.
- Федеральнай бюджет ікінҷі хығырығда алыл парза, республикаа пирілер ахчалығ полызығ сині пілдістіг пол парарына ізенчебіс. Андада піс 2017 чылға бюджеттің парыстарын ӧскірчеткен алызығлар кирібізербіс, - ізенізінең ӱлескен Хакасияның финанстар министрі.
Республика бюджеді тиксі хазнадағы экономика сидіксіністері оңдайларында тимнелген, аннаңар ниик полбас тіп таныхтаан Семён Аёшин. Че, іди дее полза, аның ӧӧн кӧстее
социальнай сфера полча. 16 миллиард артиинаң салковай ағаа киліс парча.
Финанстар министрінің сан пирістіг чооғын истіп алған соонаң, депутаттар республика бюджедінзер кирілчеткен тӱзедіглерні кӧріп пастааннар. Тӱзедіглер ікі чардыхха чарылғаннар: пірсі - Хакасия Правительствозы тимнеен тӱзедіглер таблицазы, ікінӌізі - Оӧркі Чӧп паза город-аймахтар депутаттары тимнеен тӱзедіглер.
Таныхтирға кирек, правительство кирген тӱзедіглер ӧӧнінде ӱр ниместе бюджетче азых ӱзӱріглернің салтарларынҷа чарадыға алылған чӧптернең палғалыстығ полған. Аннаңар мында таластар чох полған. Хакасия Правительствозы кізілерінең паза Ӧӧркі Чӧп устағӌыларынаң пӱтчеткен чӧптезігліг комиссия чаратхан тӱзедіглер ідӧк чапчаң алыл турғаннар. Іди ӱгредіг сферазында Боград аймаандағы Сарығ хас аал школазында тиксі тыхтағ идеріне 1 миллион салковай позыдылар. Абазадағы 49 № школаа хоза пӱдірігні пӱдіреріне - 3,5 миллион салковай. Кӧстег хоостыра ӱгренчеткен паза ӱгредіг сферазында тоғынардаңар чӧптезіг иткен студенттерге, ол санда хакас тілі паза литература ӱгредиинең палғалыстығларға, ай сай хоза стипендия тӧлиріне - 500 муң салковай. Хазых хайраллир сфераны алза, мында депутаттар республиканың онкология диспансеріне радиология корпузын пӱдіреріне хоза ахча позыдар тӱзедіглернең чарасханнар:
2018 чылда - 15 миллион салковай,
2019 чылда - 21 миллион салковай.
Ідӧк Ӧӧркі Чӧп депутаттары муниципальнай пӱдістердегі тасхархы чарытхыны чахсыландырарына хоза 10 миллион салковай позыдарға чарадығ алғаннар. Ол ахча муниципалитеттерге грант оңдайынаң позыдылар. Паза дачниктерге кӧрілген ахчалығ хабазығны 14 миллион салковайға ӧскірібізерге чарат салғаннар.
Олох туста пірее тӱзедіглер иртпин парған. Кӧзідімге, Саяногорск депутаттары городха артызылчатхан НДФЛ синін 10 %-тең 25 %-ке ӧскірібізердеңер тӱзедіг киргеннер. Че Хакасияның финанстар министрі Семён Аёшин ол тӱзедігдең тоғыр полған. Аның искіриинең, ол бюджетті сайбабызар. Ахчаны кемге-де хос пирер ӱчӱн, ол ахчаны кемнең-де пылазып аларға кирек нооза тіп таныхтаан ол. Депутаттарның кӧбізі министрнең чарасхан, Саяногорсктың тӱзедии иртпин парған.
Прай тӱзедіглер кӧріл парғанда, Ӧӧркі Чӧп «Хакас Республиканың 2017 чылға паза пландағы 2018, 2019 чылларға» закон проектін пастағы хығырығда алыбысхан. Че бюджетче тоғыс тоозылбаан, декабрьдағы сессияда хайыныс полар ла. Ол тусха федеральнай бюджеттең Хакасияа нинҷе ахча позыдылары пілдістіг пол парар. Аннаңар республика бюджедінің ікінӌі паза пӱкӱлее хығыриина хоза наа тӱзедіглер кірер тіп сағирға халча.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы