ЧОРЫХЧЫЛАР САНЫ ХОЗЫЛЗЫН
06.12.2016
Хабарлар
Пу наада ӧріністіг хабар килген. Пістің республика саблығ «National Geographic» журнал чарлаан марығның «Россиядағы этнотуризм» номинациязында чиңісчі полыбысхан. Марығ пӱӱл алтынҷы хати иртірілді, аны тилекейдегі турист сферазында пӧзік паалапчалар.
Пастағы орын алған араласчылардаңар «National Geographic» журналда улуғ репортажтар сығарылчалар, чиңісчілернің аттары ырах сабланчалар. Хакасияның туризмӌе хабарлар кінінің устағӌызы Лариса Валентиновна ОСТАПЕНКОНЫҢ таниинаң, пістің регионның улуғ чидии республикада туристтер санын хозарға полыс пиpep.
Піс Лариса Остапенконаң ирткен неделяда тоғасхабыс, чоох пу журналның сыйиинаңар, туризмҷе хабарлар кінінің амғы тоғызынаңар, таңдағы пӧгіннерінеңер парған.
- Лариса Валентиновна, «National Geographic» журнал чарлаан марығдаңар чоохтап пиріңер.
- Марығ тилекей синінде 23 номинацияӌа иртче. Мында кӱстерінең аймах хазналар, регионнар, компаниялар паза отельлер сынасчалар, аннаңар марығ араласчыларының санына кіріп алғаны даа улуғ чидіге саналча. «National Geographic» журналның мариинда піс пастағызын на араласхабыс, ол ікі ай парған. Артыхтарның артыхтарын кізілер журналның сайтында, ӱн пиріп, таллапчалар. «Россиядағы этнотуризм» номинацияда ӱн пирерінде 264 муң кізі араласхан, оларның 25 %-і пістің регионны таныхтаан. Санапчам, Хакасияа утып аларға мында ааллаан туристтер полыс пиргеннер. Республиканың пу пастағы улуғ чидии.
- Пӱӱнгі кӱнде Россияның прайдаа регионнарында этнотуризмге улуғ хайығ салылча, че кізілер ӱннерін пістің республикаа пиргеннер. Хайди санапчазар, ноға?
- Я, анзы сын, пістің хазна чапсых орыннарға пай, полған на регионда этнотуризмнең айғазарға чарир, че, минің кӧрізімнең, Хакасиянаң тиңнезерге сидік. Хырығ озаринаң алай пасха регионнардаң килген туристтер республиканың пай тархынына паза хайхастығ чир-чайаанына аптатчалар. Алынӌа тигір алтындағы азых музейлерні таныхтирға кирек. Салбых кӱрген, Оңно тағлары, Сӱлек пічіктері, Улуғ Хуртуйах тас Хакасияның брэнді полчалар. Мында ӧӧн экспонаттарны кӧріп аларға чарир. Ідӧк музей тоғынҷылары аалӌыларны хакас чонның кибірлерінең, культуразынаң таныстырчалар паза хакас ас-тамаанаң сыйлапчалар. Чарба ӱгре, хан, хыйма, талған туристтернің кӧңніне тың кірче.
Республикада тӧреміл национальнай ӱлӱкӱннер паза фестивальлар иртірілчелер. Чыл сай Чыл пазын, Тун пайрамны, Ӱртӱн тойын кӧріп аларға кӧп кізі чыылысча. Анда пасха хан чирінең килген чорыхчыларға хакас сарын-тахпахтарын истіп аларға, спорт марығларынаң танызып аларға чарир.
Улуғ тоғыс «Хакасский» заповедник апарча. Пӱӱл Оғлах тағда наа экспозиция азылған. Амды пістің чуртағӌыларның паза аалӌыларның пурунғы кізілернің чурттарын кӧріп алар оңдай пар.
- «National Geographic» журналның сыйии Хакасияа хайдағ туза ағылар?
- «National Geographic» - саблығ журнал. Аның хабарҷылары чыл сай марығ чиңісчілерінеңер улуғ репортажтар тимнепчелер. Піс амды Хакасиядаңар статьяны сахтапчабыс. Пу журналны кӧп кізі хығырча, ізенчебіс, статьянаң танысхан соонда оларның піреезі республиказар ӧнетін тынанарға килер. Туроператорлар пу сыйыхха улуғ хайығ салчалар, олар амды Хакас чирінзер чорыхчыларны ызарға кӱстенерлер. Ідӧк, чоохтирға кирек, пӱӱлгі марығның салтарларынаңар федеральнай СМИ-лар кӧп пасханнар, Хакасияны олар таныхтааннарох. Мин санапчам, журнал пирген сыйыхтың тузазы улуғ, аның полызиинаң республикада туристтер саны илееде ӧс парар.
- Чайғызын чорыхчылар Хакасиядағы кӧллерде сомарға хынадырлар. Хысхызын чи республиканың турист сферазында киректер хайди парча?
- Халғанҷы чылларда Хакасия правительствозының кӱстенізінең пістің регионда хысхызын тынанӌаң кӧп орыннар тӧстелген. Анда чуртағӌыларға даа, аалӌыларға даа пос тустарын иртірерге чарир. Ӱр ниместе Хакасияның пазы Виктор Михайлович Зимин Орджоникидзе аймаандағы Приисковай аалда саналығ, сноубордтығ чыларға хынчатханнарның сезонын асхан. Нинӌе-де чыл аразына Приисковайда туристтерге наа гостиницалар паза хостеллер пӱдipiл парғаннар. Кізілер хайдағ ла регионнардаң пеер тынанарға килбинчелер. Анзы тиктен, нимес, мында ноябрьдаң майға теере хар чатча. Сноубордтығ чыларға сағынчатсаң, мыннаң артых орын таппассың.
Таштып аймаанда «Сюгеш» тағ индіре чылӌаң комплекс маңнаныстығ тоғынча. Мында палалығ сӧбірелер тынанарға хынадырлар. Пу комплекс саналығ чыларға наа ла пастапчатхан улустың кӧңніне тың кірер. «Сюгеште» чахсы трасса, кафе пар.
- Приисковайны паза «Сюгеш» комплексті туристтер сынап таа чахсы пілчелер. Хакасияда 2015-2016 чылларда тынанңаң наа орыннар тӧстелген ме?
- Я, ікі чыл аразына регионда ӱс наа турист комплексі пӱдіріл парған. 2015 чылда декабрьда Асхыс аймаандағы Палыхтығ суғ аалда «Горная жемчужина» тағ индіре чылӌаң комплекс азылған. Комплексте саналығ чыларға наа ла пастапчатханнарға даа, экстремалларға даа тынанӌаң оңдай пар. Аалҷыларға ӧнетін улуғ тура пӱдіріл парған. Пӱӱл Ымай тас аалда «Пристань» наа турист комплексi тоғынып пастаан. Кізілер аны пӧзік паалапчалар. Ідӧк пӱӱл декабрьда Казанов аалда аалӌылар туразы азылар. Ол чыл ибіре тоғынар, чорыхчыларға тайғаҷа чӧрерге, палыхтирға паза аал туризмінең танызарға оңдай пирілер. Таныхтирға кирек, прай пу турист комплекстері Хакасия правительствозының полызиинаң пӱдірілгеннер. Наа чылның тынағ кӱннерінде пос тус кӧп полар, аннаңар турист комплекстерінзер пар киліңер, кӱс алынып алыңар.
- Чоохтазығ ӱчӱн улуғ алғыс.
Автор :
Чоохтасхан Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы