ОЛАР ЧИР-СУУБЫС ӰЧӰН ТУРЫСХАННАР
17.02.2017
Хабарлар
РОССИЯДА 15 ФЕВРАЛЬДА ЧААҶЫ-ИНТЕРНАЦИОНАЛИСТТЕР КӰНІ ТАНЫХТАЛҒАН. АҒБАНДА ТИМІР ЧОЛ ВОКЗАЛЫ АЛНЫНДАҒЫ АЧЫХТА ПУ КӰНГЕ ЧАРЫДЫЛҒАН МИТИНГ ИРТКЕН. АНДА АФГАНИСТАНДАҒЫ ПАЗА ПАСХА ДАА КИЗЕК ЧААЛАЗЫҒЛАР АРАЛАСЧЫЛАРЫ ЧЫЫЛЫСХАННАР.
ПАЙРАМНЫҒ МЕРОПРИЯТИЕДЕ ІДӦК АРАЛАСХАННАР ХАКАСИЯНЫҢ ӦӦРКІ ЧӦП КНЕЗІ ВЛАДИМИР ШТЫГАШЕВ, РЕСПУБЛИКАДАҒЫ ӦӦН ФЕДЕРАЛ ЬНАЙ ИНСПЕКТОР ВИКТОР ЧЕРНЫШЁВ, ПРАВИТЕЛЬСТВОДАҒЫ МОБИЛИЗАЦИЯ ТОҒЫЗЫНҶА КОМИТЕТ КНЕЗІ ВАСИЛИЙ БУДЫЛИН.
Ол чон аразында мин пір ирензер пастырғам.
- Мин Вячеслав Идимешев полчам, - чооғын пастаан ол. - Чаа летчигі полып, отставкаа капитан званиеліг парғам. Летчиктерні тимнепчеткен Саратовтағы пӧзік чаа училищезін 1985 чылда тоосхам. Ікі чыл пазынаң, 1987 чылда, мині Афганистанзар ызыбысханнар. Анда 484 хати киизер кӧдірілгем, Ми-8 вертолетнаң 333 час учух салғам. Ікі хати атырғам: пір хати - ракетанаң, ікінҷізін - атчатхан тирігнең. Вертоледым 16 хати тизе атыртхан. Че «душманнар» атчатхан орыннардаң оортах парыбысчаңмын. Мағаа улуғ талаан полған - чаалазығда палығлаттырбаам. Іди кӱннің сай тынағ чох кӱнде пизер хати учух чӧрҷеңміс. Хараазын даа киизер сығарға киректелген. 1988 чылда мині иң пастағылар санында Афганистаннаң сығарғаннар. «СССР-ның тирігліг кӱстерінде Чир-суубыс ӱчӱн служба ирткені» III степеньніг орденнең сыйыхтатхам.
Соонаң Алтынзархы Кавказтағы чаалазығларда араласхам. Пастағы ікі ай учух чӧрерге хорғыстығ полҷаң. Соонаң кӧнік парыбысхам. Піс пірердең хаҷан даа учух чӧрбеҷеңміс: ікі алай тӧрт вертолетнаң сыхчаңмыс.
Хайди таныхтааннар митингте, Россияның 20 вектегі тархынында хомзыныстығ киректер кӧп полған. Пістің 600 артиинаң чир-суғҷыбыс прай тилекейдегі кизек чаалазығларда араласхан: Венгрияда, Афганистанда, Сирияда, Кореяда, Вьетнамда, Египетте, Мозамбикте, Анголада, Эфиопияда, Кубада, Югославияда. Оларның махачызы пістің сағызыбыста хаҷанға даа халар.
Митинг Россия паза Хакасия гимннерінең пасталған. Анаң сӧс пирілген Хакасияҷа ӧӧн федеральнай инспектор Виктор Чернышевха.
- Аарлығ арғыстар, - чооғын пастаан Виктор Иванович. - Піс пӱӱн чааҷы арғыстарыбысты хумартхылапчабыс. Олар аймах тустарда прай тилекейде хазнабыс ӱчӱн турысханнар. Россия президентінің Сибирьдегі федеральнай округының полномочиеліг кізізі, вице-адмирал Сергей Иванович Меняйло Хакасияның ветеран-интернационалисттеріне улуғ алғызын читірче. Кизек чаалазығларда чуртастарын пир салған чир-суғҷыларыбысты сағысха кирерге кирекпіс. Оларның махачызын піс кӧп чыллар ундутпаспыс. Ветераннарға паза чаалазығлардаң айланмааннарның сӧбірелеріне полызарға кирекпіс.
Ідӧк митингте чоох тутхан мобилизация тоғызынҷа комитет кнезі Василий Будылин. Аның чооғынаң, пу Хумартхылас кӱн федеральнай законнаң турғызылған. Ол орта чарадығ полған. Пу кӱн Россия чуртағҷылары пістің хазнабыстың чаа тархынын сағысха кирче.
Паза сӧс пирілген Афганистандағы чаалазығның ветераны, «Боевое братство» пірігістің Саяногорсктағы пӧлиинің кнезі Вадим Дорошенкаа. Аның чооғынаң, пастағы чааҷы-интернационалисттер пістің ағаларыбыс полғаннар. Олар прай Европаны фашизмнең позытханнар. Пӱӱн піс Чир-суубыс ӱчӱн турысхан оолларны хумартхылапчабыс. Олар чааҷы долгын толдыразынаң толдырыбысханнар.
Чоохтар тоозылған соонда, чыылысхан чон, кизек чаалазығларда чат халған чир-суғҷыларыбысты хумартхылап, пір минута сым турған. Чааҷылар автоматтардаң тигірзер атханнар.
Митинг тоозылғанда, прайзы хумартхы тас алнынзар чахайахтар паза веноктар салған.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы