ОЛҒАН ФИЛАРМОНИЯЗЫ КІЧІГ ЧАЙААЧЫЛАРҒА ЧОЛ АЗАР
15.03.2017
Хабарлар
ХАКАСИЯДА ОЛҒАН ФИЛАРМОНИЯЗЫ ТӦСТЕЛГЕН. ӦРІНІСТІГ ХАБАРНЫ ЖУРНАЛИСТТЕРГЕ КИҶЕЕ ПРЕСС-КОНФЕРЕНЦИЯ ТУЗЫНДА КУЛЬТУРА МИНИСТРІ СВЕТЛАНА ОКОЛЬНИКОВА ИСКІРГЕН. НАА ПӦЛІК В.Г.ЧАПТЫКОВТЫҢ АДЫНАҢ ХАКАС ФИЛАРМОНИЯЗЫНЗАР КІРЕР. ОЛ ТОҒЫСТЫ ӰС КӦСТЕГҶЕ АПАРАР: МУЗЫКА, ТЕАТР ПАЗА ХОРЕОГРАФИЯ.
ПРЕСС-КОНФЕРЕНЦИЯНЫҢ ТОҒЫЗЫНДА ІДӦК КУЛЬТУРА МИНИСТЕРСТВОЗЫНЫҢ АМҒЫ ПӦЛИИНІҢ УСТАҒҶЫЗЫ ВАЛЕНТИНА ЛЕБЕДЕВА, ОЛҒАН ФИЛАРМОНИЯЗЫНЫҢ УСТАҒҶЫЗЫ МАРИНА ШТАРК, ХОРМЕЙСТЕР, ХАКАС ФИЛАРМОНИЯЗЫНЫҢ СОЛИЗІ НАТАЛЬЯ ФОМЕНКО ПАЗА БАЛЕТМЕЙСТЕР, «КӰН СУЗЫ» ТЕЕЛБЕК АНСАМБЛЬЫНЫҢ УСТАҒҶЫЗЫ НАТАЛЬЯ АПУНЕВИЧ АРАЛАСХАННАР.
ПАСТАП СӦС АЛҒАН СВЕТЛАНА ОКОЛЬНИКОВА. ОЛ ТАНЫХТААН: «ОЛҒАН ФИЛАРМОНИЯЗЫ АЗЫЛҒАНЫ - ХАКАСИЯНЫҢ ИСКУССТВОЗЫНДА УҒАА ТАНЫҒЛЫҒ КИРЕК. АМҒЫ ТУСТА АНДАҒ ПӦЛІКТЕР МОСКВАДА, САНКТ-ПЕТЕРБУРГТА, БАШКОРТОСТАН РЕСПУБЛИКАДА ЛА ПАР. ОЛҒАН ФИЛАРМОНИЯЗЫ ХАКАСИЯДА 1 ФЕВРАЛЬДАҢ ТОҒЫНЫП ПАСТААН. АНЫҢ ӦӦН ПӦГІНІ - ЧАЙААЧЫ КӦҢНІЛІГ ОЛҒАННАРНЫ ТААП, ОЛАРНЫҢ ТАЛАНТТАРЫН АННАҢ АНДАР ТИЛІДЕРІ».
Олған филармониязының тоғызынаң аның устағҷызы Марина Штарк таныстырған. Ол таныхтаан: «Сағам пістің ӧмеде 150 пала саналча, аның ӧзені «Каданс» хорның араласчылары полча. Піс хорзар палаларны 3 частаң пасти алчабыс. Кічіглернең хормейстер Наталья Фоменко айғасча. Мин улуғ арах олғаннарны сарнирға ӱгретчем. «Каданс» хорның репертуарында «Дидона паза Эней» опера, «Пастағы чылтыс алтында» мюзикл пар. Мындағ ойыннарда ырҷыларға аймах омалар чайирға кирек, аннаңар олғаннарны хоза артист узына ӱгредерге киліскен. Амды пу тоғыс мыннаң мындар узарадылар. Уроктарны филармонияның режиссеры Юлия Белогурова апарар. Ідӧк Олған филармониязында теелбек студиязы тӧстелер, аның тоғызынаң «Кӱн сузы» ансамбльның хоос устағҷызы Наталья Апуневич устир. Наталья Викторовна студиязар чӧрчеткен олғаннарны, хакас кибірлеріне тӧстеніп, теелбектенерге ӱгредер. Итчең тоғыс кӧп, сағыстарыбыс улуғ, амды оларны чуртасха кирерге кирек».
Марина Геннадиевнаның сағыстары сынап таа улуғ полтыр. Ол Хакасияның полған на муниципальнай пӱдізінде Олған филармониязының пӧліктерін азарға сағынча, город-аймахтағы чайаачы ӧмелерге паза таланттығ олғаннарға кирек чӧптернең полызар.
Культура министерствозының амғы пӧлиинің устағҷызы Валентина Лебедеваның таниинаң, Олған филармониязының ӧӧн кӧстеглері музыка паза хоос школаларынаң тӧӧй дее полза, олардаң тың пасхалалча. Музыка школазының ӧӧн пӧгіні - ӱгредіг, Олған филармониязында, тізең, улуғ хайығ иң пурун концерт тоғызына салылар.
Кічіг артисттер Хакасия чуртағҷыларын чайаачыларынаң тӧреміл ӧріндірерге пӧгінчелер. Олар Чиңіс кӱніне, Славян пічиине чарыдылған пайрамнарда ӧткін аралазарлар. Олған филармониязының гала-концерті 1 июньда Олғаннарны арачылаҷаң кӱнде иртер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы