ӰГРЕТЧІ ТУРАЗЫН ПӰДІРҶЕҢ ОПЫТ ХАЙЫҒ ТАРТХАН
24.03.2017
Хабарлар
Хакасияның пазы Виктор Зимин ӱр ниместе Россияның ӱгредіг паза наука министрі Ольга Васильеванаң тоғасхан. Тоғазығның ӧӧн салтарларының пірсі ӱгретчі тураларын пӱдірҷең программаның ӱзӱрии полған.
Федеральнай министрнең тоғазығда республика устағҷызы мындағ нимее хайығ айландырған: Хакасия - кӧп нимес регионнарның пірсі, хайда перестройканың аар чылларында даа аалларда кічіг комплекттіг школалар хайраллал халған. Халғанҷы чылларда аал школаларына алынҷа хайығ салылған.
- Чоох «Школа чоғыл - аал чоғыл» туснаң сыныхталған. Уламох кічіг ыраххы аалдағы школаны хайраллиры удаа прай ол аалның чуртазын паза тилізін таныхтапча. Школа - ол пос оңдайлығ национальнай культураны, кибірлерні паза хакас тілін хайраллааны, орындағы чуртағҷылар ӧӧнінде аалда чуртапчалар нооза. Аалны тиліткені чуртағҷыларны тутча, специалисттерні аалзар тартча, ідӧк аал хонии секторындағы экономикаа кӧдірілерге паза ӧзерге оңдай пирче, - таныхтаан Виктор Зимин.
Аннаңар 2011 чылда «Ӱгретчі туразы» проект тӧреен: улуғ нимес школа туразы, хайда 20-ҷе олған ӱгренче, андох ӱгретчінің истіг квартиразы орныхча. Мындағ школаның тузазы кічіг аалыҷахта іле кӧрінче. Пір саңай ікі сурығ пӧгілче: кічіг ӱгренҷілерні школа-интернатсар пирбеске оңдай пирчеткен пасталығ школа, іди пала іҷе-пабазынаң чарылбинча, паза ӱгретчее - чурт.
Пӱӱн Хакасияда тӧрт ӱгретчі туразы тӱзімніг тоғынча. Хайди чуртас кӧзітче, олар аалның кіні пол парғаннар. Школада библиотека, спортзал, Интернет пар нооза.
Тоғазығның салтарларынҷа федеральнай министр ол сағысха хабазығ пирген. Кӧзідімге, пу чылда «Россия Федерациязының субъекттеріне тиксі ӱгредіг организацияларында наа орыннар тӧстиріне хабазары» 2016 - 2025 чылларға кӧрілген хазна программазы хоостыра Пии аймаандағы Хойбал аалда ӱгретчі туразы пӱдірілері кӧрілче.
Тиксі, тізең, республиканың планнарында хоза тӧрт кічіг комплекттіг школа пӱдір салары. Пір ӱгретчі туразын пӱдірерінің паза андар оборудование аларының паа 30 миллионҷа салковайға тиңнелче.
- Ольга Васильева піснең чарасхан, ол уғаа орта программа, уламох кічіг аалға кирек тіп. Национальнай культураны, тілні хайраллап халары, пос чилегелерінең палғалысты чідірбезі уғаа кирек сурығ нооза, - салтар иткен Виктор Зимин.
Таныхтирға кирек, пістің республика Россияда мындағ проекттерні чуртасха кирчеткен пастағы субъекттернің санында пол парған. Хакасиянаң тиңе ӱгретчі тураларын Пермь крайы пӱдіріп пастаан.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы