«АҢҶЫ» ФИЛЬМ ЧУРТАСХА ХЫНАРҒА ӰГРЕТЧЕ
04.04.2017
Хабарлар
Пістің республикада 2014 чылдаң сығара Хакас киноның кӱні таныхталча. Аны «Хакасфильм» киностудия иртірче. Чыл сай чайаачы ӧме кӧрігҷілерні наа тоғыстарынаң ӧріндірерге кӱстенче.
«Хакасфильм» киностудия 2008 чылда тӧстелген. Олох чыл аның пастағы тоғызы чарыхха сыххан. Режиссер Нонна Галецкая «Ада чирі» фильмні суурыбысхан. Амды киностудияда ікі кізі істенче: режиссер паза оператор Юрий Курочка паза хабарҷы Марина Канадакова. Таланттығ чиит ипчі прай фильмнерге сценарийлер пасча. Іди тоғыс чыл аразына киностудияның тоғынҷылары 15 фильм чайабызарға маңнанғаннар. Хакасияның даа, Россияның пасха регионнарының даа чуртағҷылары оларны хынып кӧрчелер. «Хакасфильм» киностудияның тоғыстары ӧӧнінде чапсых орыннарға («Хуртуйах тастың чазыды» фильм), хакас чонның саблығ оолларына («Инородецтің ӱлӱзі», «Мин хакаспын», «Чоохчыл») чарыдылғаннар. Че чайаачы устар ідӧк хоос фильмнер суурчалар. 2015 чылда олар «Хылығы чох» хысхаҷах хоос фильм чайабысханнар. Анда ӧӧн рольны А.М.Топановтың адынаң Хакас драма театрының артизі Максим Султреков толдырча.
Марттың халғанҷы кӱннерінде «Чиңіс» культура кінінде Юрий Курочканаң Марина Канадакова чонны наа тоғыстарынаң таныстырғаннар. «Аңҷы» - хысхаҷах хоос фильм, ол 35 минута кӧзіділче. Фильм писатель Иван Костяковтың «Харах оды чох аңҷының чооғы» произведениезіне тӧстеніп суурылған. Ӧӧн матыр Хорал - чахсы аңҷы. Ойан арғызынаң хырыс салып, ол чалғызан тайғазар аңнирға, парыбысча. Аңнапчатхан туста Хорал, мылтығына хар кір парғанын сизінмин халып, хыринда чӱгӱр париған киикті атыбысча, мылтии, тізең, чачырап парча. Іди ол харах оды чох халча.
Ӧӧн матырның омазын Максим Султреков чайаан. Улуғ киностудияларда дублерлар паза каскадерлар пар. Кирек сценаларны компьютер графиказы полызиинаң хоостап саларға чарир. Хакас чайаачыларның, тізең, андағ оңдай чоғыл, аннаңар Максимге позына соох харҷа мӧктирге, наа ла хайыл парған хара сууҷахха тӱс парарға киліскен. Ахча паза тус асхынах полып, пірее сценаларны актер пір ле дубльнаң ойнаптыр. Максимнің таниинаң, иң сидік полған харах чаап салып ойнирға. Ідӧк ол фильмде суурынғаны театр тоғызынаң пасхалалча тіп таныхтаан: «Театрда син рольны кӧп хати толдырчазың, аннаңар читпестерні тӱзедібізерге оңдай пар. Фильмде, тізең, хайди ойнабысханың саңайға кадрда халча».
Ікінҷі матырның рольын Кызластың чуртағҷызы Акун Марткачаков толдырған. Акун - пӱдірігҷі. 2009 - 2012 чылларда Кызластағы культура туразында істенген. Олох туста орындағы чон театрында ойнаан. Аймах матырларның омаларын чайирға Акунның кӧңніне кірче.
Улуғ нимес рольны режиссер Нонна Галецкаяның оолғы Бруно-Тагир ойнаан. «Аңҷы» фильмні Пӱӱр пилтіріндегі тайғада пылтыр мартта суурғаннар. Ирткен чылда часхы соох полған, аннаңар чайаачы ӧмее соохха тоңарға киліскен. Юрий Курочканың таниинаң, Бруно-Тагир, сын артист чіли, прай сидіктерні турыстыра тобырған. Ідӧк Хакас драма театрында істенчеткен гример Надежда Кокованың тоғызын таныхтирға кирек. Аның узынаң Максим сынап палығлатхан кізее тӧӧй полған.
«Аңҷы» фильмде ідӧк аттар паза адай Путя суурынғаннар. Киностудияларда аңнарнаң хада сценалар дрессировщиктер полызиинаң суурылчалар. Хакас актерларға постарына ла ізенерге киліскен. Кізі адайын ӱгредіп аларға пӧгініп, Максим аны халаснаң азыраан. Чалаң, тізең, Акун даа, Максим дее чахсы чӧрчеттірлер. Ідӧк фильмде киик паза аба пар. Сизінгенде, оларны Юрий Курочка алынҷа суурып алған.
Критиктер дее, кӧрігҷілер дее «Аңҷы» хоос фильмнің полтазы режиссер Алехандро Иньярритуның «Выживший» фильміне тӧӧй тіп таныхтирға хынадырлар. Анда ӧӧн матыр аңҷыох полча, аның рольын Леонардо Ди Каприо толдырған. Минің кӧрізімнең, тайғалап чӧрбеен кізі ле іди сағынар. Иван Костяков позы даа кӧп чыллар аңнап чӧрген, тайғада тудынар кибірлерні чахсы пілҷең. «Харах оды чох аңҷының чооғын» пазып, ол кізілерге тайғада посты иптіг тудынарға кирек, кибірлерні сайбазаң, чобаға кір парарға ӱр нимес тіп сағысты читірерге пӧгінген. «Аңҷы» фильмнің ӧӧн сағызы андағох.
Чоохтирға кирек, «Аңҷы» фильм грант ахчазына суурылған. Ол ахчаны киностудияа Хакасияның культура министерствозы пирген. Наа фильмні кӧріп аларға кӧп кізі килген, пос орын чох полып, хоза одырчыхтар кирерге киліскен. Кӧрігҷілернің аразында писатель Иван Костяковтың палалары полғаннар. Олар Юрий Курочкаа паза Марина Канадаковаа улуғ алғыс читіргеннер.
Санапчам, оңдай полза, Хакасияның чуртағҷыларына «Аңҷы» фильмні пос хараанаң хайди даа кӧріп аларға кирек. Юрий Курочканаң Марина Канадакова, тізең, пазағы чылда хатап, Хакас киноның кӱнін иртіріп, чир-суғҷыларын наа чайаачы тоғыснаң чапсыдарға пӧгінчелер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы