ЧИИТТЕРНІҢ ІСТЕЗІГ ТОҒЫСТАРЫ РЕСПУБЛИКАНЫ ТИЛІТЧЕ
07.04.2017
Хабарлар
- ИНСТИТУТ, ІСТЕЗІГ ТОҒЫСТАРЫ, ДИССЕРТАЦИЯНЫ АРАЧЫЛИРЫ, УЧЕНАЙ СТЕПЕНЬ, ПРОЕКТТЕР, СТАЖИРОВКАЛАР, ПАТЕНТТЕР... ПОЛҒАН НА УЧЕНАЙҒА ПУ НИМЕЛЕР ТАНЫС. ЧЕ ЧИИТ ІСТЕЗІГҶІЛЕРГЕ ОЛАРНЫ ТОБЫРАРҒА КИРЕК ПОЛАР. ЧИИТТЕРНІҢ ЧОЛЛАРЫ НИИК ПОЛАР ӰЧӰН, ПРОФЕССИОНАЛЬНАЙ ӰГРЕДІГ УЧРЕЖДЕНИЕЛЕРІ, РЕСПУБЛИКА ПРАВИТЕЛЬСТВОЗЫ НАУКАНАҢ АЙҒАСЧАТХАН ООЛ-ХЫСТАРҒА ЧАХСЫ ХАБАСЧА. ІДИ АЙМАХ ГРАНТ МАРЫҒЛАРЫ ЧАРЛАЛЧА, АХЧАЛЫҒ СЫЙЫХТАР ПИРІЛЧЕ, - МЫНДАҒ СӦСТЕРНЕҢ Н.Ф.КАТАНОВТЫҢ АДЫНАҢ ХАКАС ХАЗНА УНИВЕРСИТЕДІНІҢ РЕКТОРЫ ТАТЬЯНА КРАСНОВА ЧИИТ УЧЕНАЙЛАРНЫҢ КӰННЕРІН АСХАН. ОЛ 4 АПРЕЛЬДЕ ХГУ-ның ПЕДАГОГИКА ӰГРЕДИИ, ИНФОРМАТИКА ПАЗА ПРАВО КОЛЛЕДЖІНДЕ ИРТКЕН.
МЕРОПРИЯТИЕНІҢ ПАЙРАМНЫҒ АЗЫЛҒАНЫНДА ХАКАСИЯНЫҢ УЧЕНАЙЛАРЫ, ЧИИТ УЧЕНАЙЛАРНЫҢ ЧӦБІ ПАЗА УНИВЕРСИТЕТТІҢ СТУДЕНТТЕРІ, МАГИСТРАНТ-АСПИРАНТТАРЫ АРАЛАСХАННАР.
Хайди чооғында таныхтаан Хакасияның ӱгредіг паза наука министерствозының профессиональнай ӱгредігҷе пӧлиинің устағҷызы Наталья Кеберле, ол республикаа уғаа кирек мероприятие.
- Пастағызы, істезіг - ол улуғ тоғыс. Аны орта апарар ӱчӱн, чииттерге ӱгренерге кирек. Пу мероприятие, тізең, студенттерні, магистранттарны, аспиранттарны істезіг тоғызын орта апарарға ӱгретче. Ікінҷізі, мындағ кӱннерде чииттернің таланттығ оңдайларын сығарарға оңдай полча. Піс чахсы сизінчебіс, амды чииттернің чарых сағыстары, оларның проекттері, ӧткіннері чох республиканың тилізі ідӧк чох полар. Пӱӱнгі кӱнде пістің чииттерібіске улуғ ізеніс пар! Ӱзінҷізі, имнег кирее, ӱгредіг, социальнай сурығлар паза даа пасха сфералар науканаң чағын палғалыстығ. Аннаңар чииттернің істезіг тоғыстары чуртасха кирілерге кирек, - теен Наталья Кеберле.
Хакасияда Чиит ученайларның кӱннері 2009 чылдаң иртірілче. Чыл сай аның программазы алғыдылча. Анда чиит істезігҷілер «тегілек столлар» иртірчелер, идінҷектернең тоғасчалар, республиканың устағ-пастаанаң чоох алысчалар, улуғ класстар ӱгренҷілерінең хада аймах мастер-класстар иртірчелер. Пӱӱл, тізең, Чиит ученайларның кӱннерінде ідӧк кӧп чапсых мероприятие иртче. Кӧзідімге, 12 апрельде Хакасияның чиит істезігҷілері, Алтай паза Тува республикаларның чиит ученайларынаң Интернет пастыра палғалыс тудып, аймах темаларҷа чоох алызарлар паза ағырсымнығ сурығларны ӱзӱрерлер.
Чиит ученайлар чӧбінің ӧткін араласчызы Елена Сазанакова, ХГУ-ның естественнай наукалар паза математика институдын тоозып, амды Хызылчардағы В.П.Астафьевтің адынаң ӱгретчілер хазна университедінде аспирантурада ӱгренче. ХГУ-да ӱгренчеткенде, Елена аймах ӧңніг ӧзімнерні істес сыххан. Ол - аймах оттар, чахайахтар, ағастар... Пастап ол Таштып аймаандағы тағларда ӧсчеткен ӧзімнерні істескен. Пу тема аның магистр диссертациязының ӧӧн темазы пол парған. Амды Елена Сазанакова, Хызылчарда ӱгреніп, чазы чирлердегі ӧзімнерні тирең істесче. Хайди чоохтапча Елена, аның істезіг тоғыстары иң пастап имнег киреене тузалығ полча.
- Полған на ӧзім - ол им. Аннаң орта тузаланып пілерге кирек. Піс істезіг тоғызында аймах ӧңніг ӧзімнер хайда ӧсчеткенін, хайдағ кӧрімнерге чарылчатханын, аның тузазын тирең істесчебіс, - чоохтапча ол.
Хакасияда чиит ученайларның чӧбіне 10 азыра кізі кірче. Олар прайзы даа аймах-пасха сфераларда істезіг тоғыстарын апарчалар. Кемде миграцияны, хайзы-да наа технологиялар чуртасха хайди теелчеткенін істесче паза даа пасхазы.
Хайди чооғында таныхтаан Наталья Кеберле, чиит ученайларның істезіг тоғыстарының салтарлары Хакасияның экономиказына туза ағылча.
Таныхтирға кирек, чиит істезігҷілерге хабазар ӱчӱн, Хакасияда аймах ахчалығ сыйыхтар пирілче. Кӧзідімге, «Чиит істезігҷі» Хакасия правительствозының ахчалығ сыйии (2016 чылдаң пирілче), наукаҷа паза инновацияларҷа Хакасия пазының сыйии (2011 чылдаң) паза ӧнетін стипендиялар (2013 чылдаң). Мындағ хабазығны алып алар ӱчӱн, чиит ученайларға олимпиадаларның, наука-практикалығ конференцияларның, марығларның араласчызы паза чиңісчізі поларға кирек. Ідӧк олар наука статьяларының, монографияларның авторлары ползыннар.
Таланттығ чиит ученайларға хабас пирер ӱчӱн, Хакасияның ӱгредіг паза наука министерствозы аймах марығлар иртірче. Іди пӱӱл республикада «Вехи истории Сибири: 1917 год» марығ чарлалча. Анда улуғ класстар ӱгренҷілері, студенттер, магистранттар, тархын паза обществознание ӱгретчілері аралас поларлар. Ідӧк пӱӱл «Научный потенциал Хакасии» істезіг тоғызының марии иртер. Анда студенттер паза магистранттар аралазарлар. Республика марығларынаң пасха, ідӧк тиксі Россия марығлары иртер.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы