УТ ААЛНЫҢ ЧУРТАЗЫ АЛЫСЧА
11.04.2017
Хабарлар
Хакасияда 2013 чылда кічіг паза ыраххы аалларны хайраллирынҷа паза тилідерінҷе региондағы программа тоғынып пастаан. Че ол программа хоостыра республикада ідӧк пасха даа аалларға хабазығ пирілче. Хакасияның экономика министерствозы искіриинең, республикада андағ 23 аал пу программаа кирілген. Пии аймаандағы Ут аал оларның санында.
Ут аалда 176 чуртағҷы саналча. Мында пасталығ школа пар. 2015 чылда пір ле ай аразына «Хакасияның кічіг паза ыраххы аалларын хайраллирынҷа паза тилідерінҷе» программа хоостыра кӧп тоғыс иділ парған.
Ут аалның старостазы Екатерина Васильевна Кочелорова аалда улуғ нимес садығ туразының ээзі полча.
- Пістің аалда ӱс орама. Полғанында ла скважина сабылған, чарытхынаң тоғынчатхан насос турғызылған. Насос ӱчӱн ағаа иң чағын чуртапчатхан кізі нандырча.
Аалыбыста ідӧк хоккей коробказы, орамаларда фонарьлар, тасхархы сцена паза уғаа чахсы олған площадказы турғызылған. Площадкада палалар сыбыра ойнапчалар. Чайғыда олғаннарнаң хада аны арығлапчабыс. Че халғанҷы туста олғаннар анда тың на ай-пораан тӱспинчелер, - теен Екатерина Васильевна.
Старостаның чооғынаң, аалда Илбек Ада чаа ветераннары, тыл істенҷілері халбаан. Хайзы ах чарыхтаң парыбысхан, пасхазы Ағбанда палаларында чуртапча.
Ут аалдағы чон, ӧӧнінде мал-хус тудып, чир тамаан салып чуртапча. Піреезінің мал саны илееде. Фермер полып, пічікте турған кізілер полғанох. Че, хоныхтарын тилідерге хазна хабазиина марығны ирт полбин, фермерлер санынаң сығыбысханнар.
Аалдағы олғаннар, тӧрт класс тоозыбызып, Пиидегі школа-интернатта ӱгренчелер.
- Мының алнында палаларның ойнаҷаң орын чох полған. Олар аал аразынҷа анда-мында чӧрҷеңнер. Амды прайзы олған площадказында чыылыс парча. Чайғызын Ағбаннаң туғаннарынзар палалар ааллап килзелер, анда уламох кӧп олған ойнапча. Хоккей коробказынзар суғ тазыҷаң машина чоғыл, аннаңар піс аннаң тузалан полбинчабыс. Орамаларда светодиоднай фонарьлар турғызыл парғанда, аал чарып ла турчатхан. Городтаң килген кізілер сірернің мында Ағбандағы осхас чарых тіп чапсыҷаңнар. Амды хай пірее фонарьлар кӧй парғаннар. Пӱдіннерін, тізең, чарытхы ӱчӱн алым пардаңар, ӱзірібіскеннер. Индіре чуртапчатханнарның ӱӱҷіктерінде суғ колонкалары пар. Мин аалның чоғархы саринда чуртапчам. Пістің суғнаң сидіксіністер полған, амды, орамаларда насостар парда, суғны аннаң алчабыс. Піреезі ӱӱҷігінде насос саптырып алча. Че чир алтындағы суғ тиреңнеңер, скважинаны 20 азыра метр сабарға килісче, - теен Ут аалның чуртағҷызы Надежда Тюкпиекова.
Старостаның чооғынаң, чарытхы суриин пӱӱл чайғызын аал чӧбі пӧгібізерге кирек. Ут аалның чуртағҷылары анзына ізенчелер.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы