«ЛЕНИН ЧОЛЫ» ӰГРЕНЕРГЕ ПОЛЫС ПИРГЕН
12.04.2017
Хабарлар
Пістің газетабыс минің чуртазымда хайдағ полызығ ит пиргеннеңер пас пирерге сағынчам. Мин «Ленин чолы» газетаны 1960 чылдаң сығара ал сыххам, амға теере аны, пір дее тастабин, алчам, хығырчам. Тиксі 57 чыл!
Мин ирткен векте Асхыс аймаандағы Истегі школада хакас тілі ӱгретчізі полып тоғынғам. Ӱгренгем Ағбандағы ӱгретчілер училищезінде. Ол туста ӱгретчі поларға сағынчатхан оол-хыстарға матап хайығ салҷаңнар, прай саринаң піліс пирҷеңнер. Пісті сарнирға, хоос хоостирға, теелбек саларға, кӧг тиріглерінең ойнирға, пасха даа нимелерге ӱгретчеңнер. Ӱгретчілер мині, сыныхтап алып, скрипканаң ойнирға таллап алғаннар. Іди училищеде тӧрт чыл ӱгренген соонаң, мағаа дипломға хоза пічік пиргеннер. Ол школада музыка ӱгретчізі полып тоғынардаңар киречілеен.
Музыкаҷа ӱгредиимні аннаң андар узарадарға сағыныбызып, 1957 чылда ӱгретчілер институдынзар ӱгренерге кірібіскем. Городтағы музыка школазынзар парғам. Ол туста анда скрипач Виктор Эдуардович Мяхор тоғынған. Мин аннаң таныс полғам, ол ӱгретчілер училищезінзер удаа килҷең. Іди ол мині скрипканаң чахсы ойнирға ӱгрет сыххан. Илееде ӱгренген соонаң Виктор Эдуардович мағаа тіпче: «Тинникова, ӱгренчеткен ӱчӱн тӧлирге кирек». Че мин, тізең, скрипканаң ойнирға ӱгренчеткен ӱчӱн тӧлирдеңер сағынмаан даа полғам, училищеде тӧлебеем, мында андағох полар тіп сағынғам.
Хайди поларға? Ахчаны хайдаң табарға? Аалда колхоз, ахча алҷаң чир чоғыл. Стипендияа, чуртап, ӱгренчем. Полбаста, стипендиямны ӱгренген ӱчӱн пир сыххам.
Ол туста мин пірееде «Ленин чолы» газетабысха хабарлар пасчаңмын, анаң гонорар 5-6 салковай пирҷеңнер. Уғаа ӧріністіг полҷаң. Ол ахча мағаа уғаа туза полҷаң.
Ол туста мин институттың чуртазында ӧткін араласчаңмын: эстрада оркестрінде скрипканаң ойнаам, хакас хорның старостазы полғам, ансамбльда сарнаҷаңмын... Піс хакас иирлер иртірҷеңміс, анда араласчаңмын, устирға даа килісчең. Аннаңар хакас газетабысха пасчаңмын. Мағаа ахча кирек полған нооза.
Институтты тоосханда, мин Истегі школада тоғынып пастаам, орыс паза хакас тіллері ӱгретчізі полғам. Ідӧк мин музыка уроктарын 1 - 7 класстарда иртірҷеңмін. Ол туста ӱгренген олғаннар амды улуғ частығлар, мині скрипканаң ойнаанымны ундутпинчалар. Скрипка чапсых инструмент нооза.
Іди чуртазымда «Ленин чолы» газета мағаа уғаа туза полған. Ол полбаан полза, скрипканаң ойнирға ӱгренген ӱчӱн тӧлеп полбасчыхпын, неке. Газетаа статьялар пазып, гонорар алып, ӱгреніп алғам паза школада кӧп чыллар музыка урогын апарып тоғынғам.
Автор :
Ефросинья ТИННИКОВА. тынағдағы ӱгретчі
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы