РЕСПУБЛИКА БЮДЖЕДІНЗЕР АЛЫЗЫҒЛАР КИРІЛЕР
14.04.2017
Хабарлар
Хакасияның Ӧӧркі Чӧп президиумы 12 апрельде теестегі чыылиин иртірген. Депутаттар пу чыылығда он артиинаң сурығ кӧрібіскеннер. Ӧӧн сурығларның пірсі республиканың 2017 чылға бюджедінзер алызығлар кирерінең палғалыстығ полған.
Чыылығны Ӧӧркі Чӧп кнезі Владимир Штыгашев апарған. Республиканың 2017 чылға паза пландағы 2018-2019 чылларға бюджедінеңер законзар алызығлар кирер закон проектінең Хакасияның финанстар министрінің тоғызын толдырчатхан Ирина Войнова таныстырған. Пӱӱлгі чылның бюджедінзер алызығлар кирері ӧӧнінде бюджет парыстары ӧскірілчеткенінең палғалыстығ тіп таныхтаан ол. Республика бюджедінің парыстары федеральнай бюджеттең хоза ахча кірчеткен сылтаанда 432 миллион 895 муң салковайға ӧскірілче. Чоох парча кӧстегліг оңдайнаң пирілчеткен ахчадаңар. Ол ахчаның ӧӧн чардығы, 180 миллион салковай, Хакасияда наа школалар пӱдіреріне парар. Ідӧк асхынах нимес чардығы республикада санитарнай авиацияны тилідеріне позыдылча - 123 миллион 866 муң салковай. Федеральнай кӧстегліг программаларны чуртасха киреріне 69 миллионға чағын салковай хоза пирілче. Ол ахчаның 57 миллионы республикада «Кванториум» олған технопаркын тӧстиріне парар.
Хорадығлардаңар чоохтаза, олар 224 миллион салковайға хызырылчалар. Иң кӧп чол фондының ахчазы хызырылча - 176 миллион салковайға. Олох туста хайзы пӧгіннерге хорадығлар ӧскірілче. Кӧзідімге, Ирина Войнова имнер аларына хорадығлар ӧскірілерін таныхтаан - 67 миллион салковайға. Анзы республикада имнернең сидіксініс парынаң палғалыстығ осхас.
Ӧӧркі Чӧп кнезі Владимир Штыгашев чол фондының ахчазы хызырылчатханына хайығ айландырған:
- ДРСУ-лар часхыдағы суғ тазарына толдыразынаң тимде ниместер, техника турча. Ӧрттернең чіли пол парбас па: нинҷе-де миллионға айабызарбыс, соонаң миллиардтар хорадарға килізер?
Войнованың искіриинең, чол фондында пу кӧстегҷе ахча ирткен чылдағызынаң кӧп арах салылған. Пӱӱнгі сидіксініс - бюджет счеттарында ахча читкіҷе полбааны. Че минфин пу кӧстегҷе чолҷыларға тӧреміл кӧместең ахча позытчаттыр.
Кирілчеткен алызығларны санға алза, республика бюджедінің кӧзідіглері мындағ пол парча: парыстар - 21916151 муң салковай;
хорадығлар - 26972086 муң салковай;
дефицит - 5055935 муң салковай.
Ӧӧркі Чӧп президиумы республиканың 2017 чылға бюджедінзер алызығлар кирер закон проектін чағынғы сессияның ӱзӱриине сығарарға чаратхан. Сессия 27 апрельде иртер тіп кӧрілче.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы