ЧОННАҢ ЧАРЫДЫҒЛЫҒ ТОҒЫС АПАРАРҒА КИРЕК
14.04.2017
Хабарлар
Хакасияның пазы Виктор Зимин Алтай аймаандағы Хубачар аал хыриңдағы дамбаны сыныхтирға чӧрген. Аннаң хада республика пазының орынҷызы, сағыбаан саайларҷа комиссияның кнезі Владимир Крафт, чир-чайаан ис-пайы паза экология министрі Алексей Сиорпас полғаннар.
Владимир Крафтнаң Алексей Сиорпас Хакасия пазына суғлар тазарына тимненіс тоғыстары хайди парчатханнаңар искіргеннер. Сиорпастың чооғынаң, Хубачар хыринда Ағбан суғдағы пус 15 мартта чара чачырадылған, ағаа 500 килограмм чара чачыратчаң ниме хорадылған. Суғлар сині кӧдірілзе, дамбаларны тыыдарға хайа тастары тимнелче. Сартых аал хыриндағы хайалар чара чачырадылчалар, аннаң кирек тас алылча.
Хайди Владимир Крафт искірген, тағларда хар ам даа кӧп, суғлар сині хайди кӧдірілчеткенін МЧС-тың ікі оперативнай ӧмезі сыныхтағда тутча. Аалларда чуртағҷыларға искіріглер читірҷең система тоғынча, оларнаң ӱгредіглер иртірілген. Че мында Виктор Зимин позының сағыссыразын читірген. Аның чооғынаң, чазыларда хуруғ отты ам даа ӧртепчелер. Профилактика тоғызын апарарға кирек, аал чуртағҷыларынаң чоохтазарға. Хакасияда андағ чуртас - чыл сай пу тоғысты хати апарарға килісче. Асхыстағылар, улуғ суғ ирткенҷе, малларын олтырыхсар сығарбазыннар. Мының алнындағы чобағны сағысха кирерге кирек, андада 700 азыра мал, муңар хой суға саайланған, чуртағҷыларға бюджеттең 87 миллион салковай компенсация пирілген.
Аның соонда Виктор Михайлович журналисттернің сурығларына нандырған. Хайди ол таныхтаан, чоннаң чарыдығлығ тоғыс апарарға кирек. Чобағлығ киректер полдыртпас ӱчӱн, профилактика тоғызын алғым паза чахсы апарарға. Суғлар сині хайди даа кӧдірілер, ӧрттер ідӧк сых ла парча, аннаңар чонға тузында сағба пирчедерге кирек. Сағыбаан киректерге сыбыра тимде поларға кирекпіс. Ол киректер ӧӧнінде аал чуртағҷыларына теелче. Суғлар кӧдірілчеткен туста оларға малларын ибде тударға, чазызар, олтырыхтарзар сығарбасха. Пістің андағ чахығ пирер правобыс чоғыл, че чуртағҷыларға чӧп ле пирер оңдайыбыс пар.
Малны, чылғыны, хойларны хайраллап халарға кирек, олар соонаң кізіні азырапчалар. Аймах службалар суғлар чайыларына тимделер, дамбаларны тыыдарға кирек материаллар читкіҷе тимнел парған. Кізілер, техника тимде, сағыбаан саайларның салтарларын чох идерге киректелчеткен ахча ідӧк азынада позыдылған. Пылтыр часхыда прай ниме амыр ирткен, пӱӱл пустың пӱдізі пасха тіп искірчелер. Пӱӱл пус, хар хайылып, чахсы, иптіг иртіп парыбызарына ізенербіс.
Сойан тағларында хар ам даа кӧп, че амғы осхас кӱннер турза, аның сині табырах хызырылар. Кӱнӧрте хар хайылча, хараазын тооп парча, іди ол кӧӧлҷе хызырылча.
Алтай крайында часхызын илееде ааллар суға пастырчалар, Хакасияда пір аалға даа суғ тың кірбеен, пір аал даа чідірбеебіс. Дамбаларны чыл сай тыхтапчабыс, наа дамбалар пӱдірчебіс, андағ тоғыстарға 600 миллион салковай хоратхабыс. Суғ налогын республикаа пирер сурығ ӱчӱн турысхабыс, ол 300 миллион салковайға тиңнелче. Ӧӧркі Чӧп депутаттары піске хабасханнар. Амды ол ахча суғлар тазарынаң арачыланар тоғыстарға парча. Республикада ӧрттердең тоғыр режим кирілген, че хуруғ отты ӧртирін тохтатпинчалар. Анзы кізіні сағыссыратча.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы