САҢЫЧАХ ХАЛҒАНЧЫЗЫН СЫНЫРАДЫ
30.05.2017
Хабарлар
Пӱӱл школа тоосчатхан олғаннарға пістің чир-суубыстағы школаларда сілкер айының 25-ҷі кӱнінде халғанҷы саң сыңыраан.
Асхыста иртенӧк наңмыр тоолапчатхан, че 11.00 часха тохтап парған. Асхыс лицейінде халғанҷы саң ӱлӱкӱні спортзалда ирткен, Калининдегі школа тасхар иртірген.
Ӱлӱкӱнні Калининдегі школа устағҷызы Наталья Васильевна Тютюбеева асхан, чоох тудып, олғаннарны алғаан. Аның соонда школа чуртазында ӧткін араласхан олғаннарға Аарластығ, махтағлығ пічіктер читіргеннер. Пу школаның олғаннары аймах синіндегі марығларда ӧткін араласчалар. Пасталығ класстағы ӱгренҷілер улуғ арғыстарына, кибелістер чоохтап, сыныхтағларны чахсы тудыбызарға алғааннар паза блокноттар сыйлааннар.
Школа тоосчатхан олғаннар, тізең, ӱгретчілеріне чахайахтар сыйлааннар, сарыннар сарнап, композитор Георгий Свиридовтың «Метель» кӧӧ хоостыра вальс толдырғаннар. Мин, оларны кӧріп, матап морсынғам. Оолахтар хызыҷахтарны вальста ипти ле ал чӧргеннер. Оларны ӧнетін тимнептір хореография ӱгретчізі Марина Митрофановна Карамашева. Олғаннар пу теелбекке ӱгреніп алғаны уғаа маңат, ол оларға хаҷан даа туза полар.
Школада 11-ҷі класс ікі дее полтыр, оларнаң устаптырлар Раиса Ивановна Карамашева паза Надежда Ивановна Шевченко. Олғаннар ӱгретчілерін алғыстапчатханда, ӱгретчілер оларға іҷе-паба осхас полғаны іле кӧрінген.
Халғанҷы саңны сыңыратханнар 11 класстың ӱгренҷізі Дмитрий Сагалаков паза Виолетта Чебодаева. Дима, Виолеттаны иңніне одыртып, ӱгренҷілер алнынҷа ӱс хати ирткен. Хызыҷах, тізең, ол туста саңны сыңырат парча. Хайди чоохтааннар, Виолетта саңай ла «пистерге» ӱгренчеттір.
Мыннаң ӱлӱкӱн тоозылған, паба-іҷелер тасхар халғаннар, олғаннар класстарынҷа тарас парыбысханнар.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы