ПАЛАНЫҢ КӰСТЕНІЗІ ХАҶАН ДАА ПААЛАЛЗЫН
06.06.2017
Хабарлар
(Сомда: А.Сагалакова, Н.К. Сагатаева паза А.Юктешев)
Ағбанда 1 июньда А.А.Кенельнің адынаң олған музыка школазынзар Хакасияның чайаачы паза таланттығ ӱгренҷілері чыылысханнар.
Олар, улуғ даа полбазалар, постарының частарына улуғ чидіглерге читкеннер. Кӱстенген паза турғысхан пӧгіннерін толдырарға харасчатхан ӱчӱн, олғаннар «Чайаачы пала - чайаачы ӱгретчі» республика фестивальында ахчалығ сыйыхтарнаң паза дипломнарнаң таныхтатханнар. «Чайаачы пала - чайаачы ӱгретчі» республика фестивальы Хакасияда 16-ҷы хати иртті. Пу тусха пӧзік чидіглерге читкен ӱгренҷілерге паза ӱгретчілерге 500-ке чағын алтын паза кӱмӱс медаль, диплом паза ахчалығ сыйых пиріл парған. Аның тӧстегҷізі Хакасиядағы таланттығ палаларға хабасчаң халыхтар фонды полча. Аны 90 чылларда Константин Цитлидзе, Михаил Саражаков, Валерий Шавыркин паза даа пасхазы тӧстееннер. Хайди чоохтапча Ӧӧркі Чӧп депутады Михаил Саражаков, республика фестивальына 16 чыл, че сынында пу фонд 20 чыл чайаачы палаларға хабасча.
- Мының алнында аалда чуртапчатхан сӧбірелернің палаларына институттарзар ӱгренерге кірерге аар полған. Аннаңар піс сағын сыххабас, хайди позыбыстың палаларыбысха пӧзік ӱгредіг учреждениелерінзер ӱгренерге кірерге полые пирерге. Іди 20 чыл мының алнында Асхыс аймаанда чайаачы палаларға хабасчатхан халых фонд тӧстелген, соонаң ол республика синіне теере ӧс парған. Сизінерге чарир, нинҷе-де чылмының алнында фестивальда таныхтатхан ӱгренҷілер, амды постарының киректерін азып, амғы чайаачы олғаннарға хабасчалар. Анзы уғаа ӧріндірче, - таныхтапча чооғында Михаил Алексеевич.
Ідӧк, чоохтирға кирек, 6-7 чыл мының алнында чайаачы олғаннарға хабасчатхан мындағох фонд Пии аймаанда тӧстелген. Анда, муниципалитет паза ӱгредіг управлениезінең пасха, таланттығ ӱгренҷілерге ідӧк улуғ чидіглерге читкен республика чуртағҷылары постарының сыйыхтарын читірчелер. Кӧзідімге, Карамчаковтар сӧбірезі спортта улуғ чидіглерге читкен оол-хыстарға сыйых читірче паза даа пасхазы.
«Чайаачы пала - чайаачы ӱгретчі» фестивальда ӱгредігде, халых чуртаста, спортта, чайаачы тоғыста пӧзік чидіглерге читкен ӱгренҷілерні таныхтааннар. «Филология» номинацияда ученай Н.Ф.Катановтың сыйиина Асхыстағы лицей-интернаттың ӱгренҷізі Анна Сагалакова турысхан. Ол хакас тілінҷе паза литератураҷа республика олимпиадаларында пір ле хати чиңісчі полбаан.
- Мин пӱӱл ирткен олимпиадада хакас тілінең 1-ғы орынға, хакас литературазынаң, тізең, 2-ҷі орынға турысхам. Мындағ чидіге чидер ӱчӱн, ӱгретчім Лидия Семёновна Сафьянованаң матап кӱстенгебіс, мин кӧп литература хығырғам. Пістің кӱстенізібіс пӧзік паалалғанда паза таныхталғанда, уғаа поғдархастығ паза ӧріністіг, - кӧңнінең ӱлесче Анна Сагалакова.
Фестивальда Асхыстағы ӱгредіг учреждениезі илееде номинацияда сыйых алған. Школаның биология ӱгретчізі Наталья Кирилловна Сагатаева «Золотой Барс» номинацияның лауреады полыбысхан, аның ӱгренҷізі Аяс Юктешев, тізең, ідӧк диплом алған.
- Аяс пӱӱл школа тоосча. Ол - пілістерге тартылчатхан ӱгренҷі. Ікі чыл изере республика синінде иртчеткен олимпиадаларның, наука-практикалығ конференцияларның призеры паза чиңісчізі полған, - чоохтапча Наталья Сагатаева.
Пӱӱл Хакасияның таланттығ палаларына хабасчаң халыхтар фондының сыйиин аларында 95 ӱгренҷі араласхан. Че иң артых 30 ӱгренҷі ле чиңісчі паза лауреат полыбысхан.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы