ЧЫЛЫҒ ПИРҶЕҢ ТУСХА ПАЗА ӰГРЕДІГ ЧЫЛЫНА ТИМНЕНІС ӰЗӰРІЛГЕН
16.08.2017
Хабарлар
Киҷее Хакасияның пазы Виктор Зимин республика правительствозының чыылиин иртірген. Чыылығ Москвадағы чӧптезіглернің салтарларына, республикада чылығ пирҷең тусха паза наа ӱгредіг чылына тимненіс хайди парчатханына чарыдылған.
Чыылығны республика пазы Москвада РУСАЛ компанияның устағ-пастаанаң ирткен тоғазиинаң пастаан. Ол тоғазығның ӧӧн салтары Хакасияның пазы Виктор Зимин паза РУСАЛ піріктірілген компанияның ӧӧн директоры Владислав Соловьев пірге тоғынардаңар хоза чӧптезіг иткені полған.
- Хакасияның правительствозы паза РУСАЛ компания чуртас-экономикада пірге тоғынардаңар хоза чӧптезігде хол салыбысханнар, - искірген Виктор Зимин ол тоғыстың салтарларынаңар. - Ол чӧптезігҷе РУСАЛ 2017 чылда регионға хоза 130 миллион салковай пирер.
Ол ахча имнег оборудованиезін, школаларға кирек ниме-ноолар аларына, имнег паза спорт пӱдіріглерін нааҷылирына, пӱдіреріне парар.
Анзынаң пасха «Хакасияның промышленность кӱзін 2030 чылға теере тилідері» комплекстіг проект хоостыра компанияның алюминий сығарызын алғыдар сағыстарын ӱзӱртірлер. РУСАЛ компания, хоза тоғыс орыннарын тӧстеп, продукция сығарызын ӧскірерге пӧгінче. Андада аймах синдегі прай бюджеттерзер дее ахча кӧп арах кір турар тіп кӧрілче.
Виктор Зимин республиканың промышленность тилізінің проектін чуртасха кирері ӱр тус паза тӧреміл хайығ кирексіпчеткенін таныхтаан. Аның ӧӧн сурығларының пірсі транспорт инфраструктуразын тилідері полча. Регион устағҷызы пу сурыға алынҷа хайығ саларға чахаан, тимнелген продукцияны тартарында сидіксіністер чох полар ӱчӱн.
- Килер чылда ла пістің разрезтер хоза ӱс-тӧрт миллион тонна хара тас пирерлер. Тимір чолларны алғытпазабыс, прай таарлағлар турыбызар, - сизіндірген Хакасияның пазы. - Республика андада налогтарҷала пір чарым миллиард салковай чідір салар.
Республика устағҷызы ідӧк Харатас городтың сидіксіністеріне хайығ салған.
- Город устағҷы чох хала парған, че республика Харатасты тастабас, - таныхтаан Виктор Зимин. Регион устағҷызы мында правительствоны городха хабазарға, пос кӧстеглерінҷе киректелчеткен полызығны пирерге, алынҷа хайығны чылығ пирҷең тусха тимненер сурыға саларға сурынған. Ідӧк Харатас чуртағҷыларына Город кӱнін хайди даа иртір пирерге чахаан.
Республика чылығ пирҷең тусха хайди тимненчеткенінеңер сурығҷа сан пиріснең Хакасияның пӱдіріг паза ЖКХ министрі Валерий Келин чоох тутхан. Хайди ол искірген, пӱӱнгі кӱнге муниципальнай пӱдістерде котельнайларны, чылығ паза суғ пирҷең сетьтерні тыхтиры 70 - 80 %-ке толдырылған. Тимненіс тоғыстары уйан парчаттыр Боград паза Шира аймахтарында. Че ӧӧн сидіксініс кӧп котельнай алымнары ӱчӱн чарытхы чох хала парғанында полтыр. Виктор Зимин, хайдағ даа киректе узы-пазына сығып алҷаң оңдай пар полчатханын таныхтап, министрге энергетиктернең чӧптезерге чахығ пирген. Ідӧк сидіксіністіг муниципальнай пӱдістернің устағҷыларын пу чағында чыыбызарға чахаан, оларнаң хада алынҷа чыылығ иртер.
Наа ӱгредіг чылына тимненістеңер Хакасияның ӱгредіг паза наука министрі Лариса Гимазутина искірген. Аның чооғынаң, республикадағы ӱгредіг учреждениелері прайзы даа 1 сентябрьға тимделер. Саяногорсктағы олған садында паза Шира аймаандағы ікі школада ла тыхтағ тоғыстары ам даа тозылғалах осхас. Че олар даа тимде поларлар тіп ізендірген министр.
Хакасияның пазы Виктор Зимин ӱгренҷілерні чолда орта тудынарға хатап ӱгредерге кирек полчатханына хайығ салған.
- Чайғы каникуллары тузына олғаннар чол правилоларын ундут таа салған поларлар, аннаңар профилактика тоғызын тыыдыбызарға кирек.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы