ХАКАСИЯНЫҢ САБЛЫҒ ООЛҒЫНЫҢ СӦӦГІН ЧИР-СУУНЗАР ЧИТІРГЕННЕР
26.09.2017
Хабарлар
Пу чағында Москвада ах чарыхтаң парыбысхан хакас чонның матыр оолғы, саблығ талайҷы, ырахха чӧрҷең капитан Бронислав Майнагашев. Ирткен позырах кӱнде аның сӧӧгін Хакасиязар самолёттығ читіргеннер. Бронислав Семёновичті халғанҷы чолға ӱдезерге Хакасия правительствозының, Ӧӧркі Чӧбінің кізілері, республиканың чааҷылар комиссариадының тоғынҷылары паза туған-чағыннары килгеннер.
Москвадаң самолет иртен сигіс часта читкен. Бронислав Семёновичтің сӧӧгін борттаң сығарарға тимненіп, чааҷылар комиссариадының тоғынҷылары трап хыринзар пастырғаннар. Прай пассажирлер самолёттаң сыхханда, Бронислав Майнагашевтің сӧӧгін чааҷылар аэропорт туразының хыринзар читіргеннер.
Чыылысхан чон алнынзар «Молоко» ОАО-ның ӧӧн директоры Андрей Асочаков сыххан. Хайди ол таныхтаан, Бронислав Семёнович Майнагашевтің олған тузы Новоселовода, саарбах тузы Хызылчарда, чиит тузы Ленинградта ирткен. Алтынзархы талай-тиңістерҷе чӧріп, ол матыр ирен полыбысхан. Б.С.Майнагашев СССР-ның талай флодында кӧп киректің пастағҷызы полған. Ол иң кирек хазна чахығларын толдырған, корабльларны сынаан. Б.С.Майнагашев, правительство чахии хоостыра, командазынаң, ӱс чыл изере иң хазыр чиллерні тілеп, прай тилекейні ибірген. Іди ол корабльларны сынаҷаң. Ол ыраххы чӧрістер капитаны, атомнай ледоколлар капитаны полған.
Б.С.Майнагашев Алтынзархы пустығ тиңісте аймах чӧрістер иртірҷең. 1960 чылларда ол Кубазар иң кирек таарлағларны тарт чӧрген. 1988 чылда Бронислав Семёнович, корабльлар Алтынзархы полюссар чидер ӱчӱн, чӧрістер тӧстеҷең.
Бронислав Семёновичтің хада хонғаны Гильда Михайловнанаң 50 чыл артиинаң чуртааннар.
- Турыстығ кізее тоғасханыма чуртасха алғызым читірчем, - чоохтапча Гильда Майнагашева. - Ол уғаа сын, хыйға кізі полған. Аның пірее ниме сурабыссаң, полған на сурығны ол чахсы чарыт пирҷең. Кӧп чыл хада чуртап салған кізіні чідірерге уғаа ачырғастығ. Пістің кӱзеебіс ідӧк талайҷа чӧрче. Че пархабыс пасха чол таллап алған.
Саблығ ученай, филология наукаларының кандидады Валентина Майногашева Майнагашевтер родының иң турыстығ кізінің сӧӧгі тӧреен чирінзер айланғаны орта тіп таныхтаан. Бронислав Семёнович пасха чирлерҷе, кӧп талайҷа чӧрген, чуртазында кӧп ниме кӧрген. Че хаҷан даа ол чиріне сағынҷаң. Бронислав Семёнович Хакасиязар ааллап килзе, туғаннары аны сыбыра улуғ ӧрініснең удурлаҷаңнар.
Киҷее Бронислав Семёнович Майнагашевті халғанҷы чолына ӱдезерге кізілер С.П.Кадышевтің адынаң республиканың культура кінінің туразынзар чыылысханнар. Хакасияның саблығ оолғынаң анымҷохтазарға чон уғаа кӧп чыылысхан. Б.С.Майнагашевтің ӧртелген сӧӧгінің урназы улуғ залда орныххан. Аның ибіре аарластығ хадағ кізілері турғаннар, ол санда автоматтығ чааҷылар.
Хумартхылас митингті асхан Хакасияның Ӧӧркі Чӧп кнезі В.Н.Штыгашев. Ол чоохтаан, Бронислав Семёновичнең хаҷанох таныс полғаннар. Пістің республика тӧстелчеткенде, Б.С.Майнагашев, Москвада чуртап, кӧп полызығ пир турған. Аның авторитеді андағ оңдайлар пирген. Ол, Москвада Хакасияның представительствозында тоғынып, сынап таа кӧп туза ағылған.
Хакасия пазының орынҷызының тоғызын толдырчатхан Владимир Александрович Крафт чооғында таныхтаан, хайди талай хазында ӧспеен оолах соонаң улуғ ледоколларнаң устаан. Ағаа тилекейде иң килкім «Арктика» ледоколнаң устирға ӱлӱс тӱскен. Ол ледоколға пістің чирібістің алтынзархы соох талайларында пустарға хыстыр салған пароходтарны осхырарға киліскен. Адмирал Майнагашев прай чуртазын талай флодына пирген. Аның матыр тоғызын сыйыхтары киречілепчелер. Кӧзідімге алза, Октябрь Революциязы орденін тилем кізее пирбинчелер, че ол орден аның пар. Істеніс Хызыл Знамязы орденінең ікі дее хати таныхтатхан. Ленин ордені прай сыйыхтардаң пӧзік паалалча. Аннаңар ӧсчеткен тӧлге анзы уғаа чахсы кӧзідім полча. Ол кӱн Ағбанда соох полған, иртен хар чаап парған. Анзы тиктең нимес, неке. Адмирал полярникті чир-чайаан іди чобалып ӱдесче полар.
Анаң чоох тутханнар Хакасияның Улуғлар чӧбінің кнес орынҷызы Владислав Михайлович Торосов, Хакасияның чаа паза істеніс, право хайраллаҷаң органнарның ветераннар чӧбінің кнезі Галина Алексеевна Трошкина, хаҷан-да Хакасияның Москвадағы представительствозында тоғынған, амды «Молоко» пірігістің ӧӧн директоры Андрей Серафимович Асочаков, 1990 чылларда пістің республиканың министрлер чӧбінің кнезі полған Евгений Александрович Смирнов.
Олар прайзы Бронислав Семёновичтің пазымнығ, сын хылығын паза пирген сӧзіне турыстығ полғанын таныхтааннар. Ідӧк Б.С.Майнагашевтің адынаң пірее улуғ пароходты адап саларға чӧп пирілген.
Бронислав Семёнович, ағаа Хакасияда кӧп чуртирға киліспеен дее полза, позының сӧӧгін паба-іҷезінің чирінде, Казановка аалдағы сыыратта, чыып саларға хумартхы чооғын чоохтаптыр.
Аннаңар аның сӧӧгін, чон анымҷохтасхан соонда, Асхыс аймаандағы Казановка аалзар апарғаннар. Чатхан чиріңер нымзах ползын, чабынғаныңар торғы ползын, саблығ адыңар чонда халзын, Бронислав Семёнович!
Автор :
Антон ЧЕРТЫКОВ, Илья ТОПОЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы