ИВАН МИНДИБЕКОВ МАХТАҒА СЫХТЫ
29.09.2017
Хабарлар
Чӱгӱрҷең аттар тутчатхан Иван МИНДИБЕКОВ Кубокнаң таныхталча
Ағбандағы ипподромда 23 сентябрьда «Сибирьнің улуғ хурчаа» марығның азах мееттегі тоғазығлары хайдағ хазыр оңдайда ирткеннеңер, кӧрігҷілер ӱннері саңай харылғанҷа хысхырысханнаңар материал пістің газетада сыххан. Че андағ улуғ марығны хығырығҷыларға прай саринаң чахсы чарыт пирер оңдай табылбин парча, пірее чапсых-хынығ киректердеңер чоохталбин халча.
Аннаңар ат чарызы хайди хынығ, олох арада хазыр оңдайда ирткеннеңер кӧмес хоза танығлар пирерге чарадыбыстым. Анзын піліп аларға прайзына даа чапсых полар.
Иң пастағызын чӱгӱрҷең аттар тутчатхан Иван Иванович Миндибековты махтабызарға кирек. Аның аттары «Сибирьнің улуғ хурчаа» марығда сыйыхтығ орыннарға кӧп хати турысханнар. Іди поларға кирек. Аның Натан аттығ асхыры пӱӱл Москвада ирткен улуғ марығда чиңіс тутхан. Балетмейстер ады 2015 чылда Россия президентінің сыйии ӱчӱн марығда пастағы орында пол парған. Андағ чиңістерге хайди ӧрінмес. Аның ӧктем аттары Хакасияны тиксі сабландырчалар нооза.
Аннаңар Ағбанда ирткен ат чарызының салтарлары хоостыра марыға чахсы аттар тимнеп салған ӱчӱн, Иван Иванович Миндибековха ӧнетін сыйых, чахсы Кубок сыйлап пиргеннерінде, ипподромзар чыылысхан улус ӧрінізін чазырбинчатхан. «Орта чарадығ!.. Іди поларға кирек!» - кӧгліг хысхырыстар аннаң-мыннаң на истілісчеткен.
Паза мындағ чапсых искіріг чарлалған: ікі тегілектіг хаңааҷахха кӧлілген 4 частығ аттар 3200 метрге чӱгӱргенде, Ағбандағы ипподромда 1949 чылда турғызылған рекордты пӱӱл ле ас парыбыстылар. Позының ӧктем хылиин кӧзіткен Водная Гладь пии. Итсе, ол пии Хызылчардаң. Аның поза паан тутхан улуғ опыттығ жокей Григорий Гришин.
Паза Хакасияда чӱгӱрҷең аттар тутчатхан Виктор Калининнің махтанҷых оңдайлығ хара-пора асхырын хайди таныхтабас. Ікі тегілектіг хаңааҷахха кӧлілген Ларссон Ти Джей ат Швецияда тӧреен полтыр. Мында ағаа 2400 метрге чӱгӱрерге киліскен. Ол прайзын ас парыбысхан, сынап таа сіліг паза табырах чӱгӱріс кӧзіткен. Хаҷан ол кізілер одырчатхан трибуна алнынҷа иртчеткенде, кӧрігҷілерзер айланып, пазын уғаа кеен икіп сал турған. Андағ нимені кӧріп, хайди матап айа саппас. Хаҷан айа сабызы тыҷыри тӱскенде, чиңіс тутхан асхыр пазын уламох табырах икіп пастабысхан. Мал даа полза, махтанарға пілче, позынзар хайығ кирексіпче. Андағ хылиинаң кӧрігҷілернің кӧңнін кӧдірген.
Алынҷа танығ идерге чарир Москва-Сибирь тоғазығдаңар. Саблығ жокейлер постарының устарын Ағбандағы ипподромда кӧзіткені уғаа ӧріністіг паза чапсых. Че аның салтары уламох таңнатхан. Алынҷа жокейлернің чидіглерін санға алғанда, пастағы орынға Григорий Гришин сых парыбысханы чарлалған.
Аннаңар даа кӧрігҷілер пастағы туста кӧмес алаң ас парғаннар. Хайди за іди? Григорий Гришин Хызылчардаң нооза. Мында пастағы орынға Москвадаң килген пірее саблығ жокей сығарын кізілер сағаан полғаннар. Сынында аалҷылар ікінҷі паза ӱзінҷі орындалар. Пістің чир-суғҷыбыс Татьяна Хренова - тӧртінҷі орында. Ідӧк хомай нимес кӧзідім тіп паалирға чарир.
- Сибирьдегі жокейлернің тимненістері пӧзік синде полтыр . Оларнаң мыннаң мындар даа тоғас турарға кирек, - ӱлесче позының сағыстарынаң Москвадаң килген жокей, пу тоғазығда ікінҷі орын алған Александр Несяев.
Искірген полғабыс, Москва - Сибирь тоғазығ 46:44 саннаң тоозылған. Пістіңнер, сибиряктар чи, 2 ле санға соона халғаннар.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы