ТІЛНІ ДЕЕ, КИБІРНІ ДЕЕ ХАЙРАЛЛИРҒА ПОЛЫСЧА
11.10.2017
Хабарлар
Ағбанда ХакНИИЯЛИ-ның конференц-залында Хакасияның национальнай паза территориальнай политика министрінің орынҷызы Нина Гавриловна Челтыгмашеваның «Программно-целевое управление развитием этнокультурного образования: муниципальный опыт» наа сыххан книгазының презентациязы ирткен.
Пу книганың пайрамына ӧӧнінде Асхыс аймаандағы школаларның марығларында чиңіс тутхан ӱгретчілер килгеннер. Олар - прайзы даа хакас тілі паза литература ӱгретчілері. Олар Хакасияда ла нимес, ідӧк тиксі Россияда пос тілі ӱгретчілерінің марығларында чиңіс тутханнар. Оларның санындалар Лариса Леонтьевна Чекурова - М.Е.Кильчичаковтың адынаң Ӱс чулдағы школаның ӱгретчізі, Игорь Никитич Албычаков - Ӧӧк пилтіріндегі школаның ӱгретчізі, Рустам Юрьевич Канзычаков - Калининдегі школаның ӱгретчізі, Мария Михайловна Кызласова - Кызластағы школаның ӱгретчізі, Светлана Антоновна Кочелакова - Пии аймааның Хызыл хара суғдағы школаның ӱгретчізі паза даа пасхазы.
Чыылығны апарған ХакНИИЯЛИ-ның директоры, тархын наукаларының докторы Валентина Николаевна Тугужекова.
Пастағы сӧс книганың авторы Нина Гавриловна Челтыгмашеваа пирілген. Ол хысхаҷахти пу тоғызын хайди тимнеенінеңер чоохтап пирген. Пу аның монография наука тоғызы полча. Нина Гавриловна Асхыс аймааның Калининдегі ортымах школаның директоры полчатхан туста позының школазындағы хакас тілі паза литература уроктарын хайди тузалығ иртірердеңер паза анда алылған сынағларны пасха даа школаларға тарадарын істескен. Мында ағаа пасха даа ӱгретчілер кӧп полысханнар. Ідӧк чахсы хабасханнар республиканың ӱгредіг паза наука министерствозының, Хакас хазна университедінің тоғынҷылары.
Пу книгада тӧреен тілібісті тилідер тоғысты апарарында хайдағ хоза піліснең тузаланарға чарирдаңар чоохталча. Книга ӱс чардыхтаң тӧстелген. Мында этнокультура ӱгредиинің программазы, хакастарның этнопедагогика кибірлері, хакас тілі ӱгретчілерінің практика тоғыстары, хакас ӱлӱкӱннері пирілчелер.
Анаң чыылған чонға Калининдегі ортымах школаның ӱгретчізі Елена Григорьевна Карачакова хайди урок апарчатханы видео пастыра кӧзіділген. Анда олғаннар, ноутбук кистінде одырып, айланыс местоимениеліг предложениеде хайда запятой турғызарын ӱгренгеннер. Урокта орыс паза хакас нымахтарынаң тузаланғаннар. Анаң сотовай телефон пастыра таныс кізілерін ӱлӱкӱннең алғыстирға ӱгренгеннер. Мындағ уроктар олғаннарға сынап таа хынығ ирт турған полар.
Анаң постарының сағыстарынаң ӱлескеннер ӱгредіг паза наука министерствозының хакас тілі пӧлік устағҷызы Ольга Васильевна Доможакова, ХГУ-ның доценті, педагогика наукаларының кандидады Клавдия Ивановна Султанбаева, Хакас книга издательствозының редакторы Нина Антоновна Толмашова паза даа пасхазы.
Хайди прайзы таныхтаан, пу программада араласхан ӱгретчілер Россия синіндегі марығларда чиңіс тутханнар. Анзы пасха даа ӱгретчілерге улуғ туза полча. Хакас тілі ӱгретчілері тӧреен тілібісті ле нимес, ідӧк чоныбыстың кибірлерін, хайраллап, тилітчелер.
Автор :
Илья ТОПОЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы