ИДІНҶЕКТЕРНІҢ ПРАВОЛАРЫ АРАЧЫЛАЛЧА
03.11.2017
Хабарлар
Хакасияның прокуратура коллегиязының алғым чыылиинда республикадағы идінҷектернің праволарын арачылир сурығ ӱзӱрілген. Анда прокуратура тоғынҷыларынаң пасха Хакасиядағы идінҷектернің праволарын арачылирынҷа уполномоченнай Василий Кудашкин, «Опора России» пірігістің региондағы пӧлиинің кнезі Валерий Послед, Хакасияның финанстар министрі Ирина Войнова, налог инспекциязының устағҷызы Светлана Диденко, Россияның федеральнай казначействозының Хакасияҷа управление устағҷызының орынҷызы Юрий Мельников, республиканың экономика тилізінҷе министрінің пастағы орынҷызы Александр Терещенко араласханнар. Чыылығны апарған Хакасия прокурорының тоғызын толдырчатхан Борис Крылов.
Республикада кічіг паза ортын бизнес хайди тоғынчатханнаңар, хайдағ тудығлар аның тоғызына харығ полчатханнаңар паза ол тоғысты мыннаң мындар хайди чахсыландырардаңар чоох тутхан Хакасия прокуратуразының федеральнай законодательство хайди толдырылчатханын сыныхтағда тутчатхан пӧлік пастығы Олег Загрядский. Аның чооғынаң, прокуратура органнары пу сферада кӧп тоғыс апарчалар. Идінҷектернің тоғызында ам даа аймах сайбағлар сығысча. Іди пӱӱл ле 80 кізі дисциплинарнай паза административнай нандырыға тартылған. Республикада 20 муң азыра идінҷек тоғынча, оларның чарымы кічіг бизнеснең айғасча.
Бизнестің тоғызына ам даа кӧп административнай тудығлар харығ полчалар. Прокуратураа андағ киректерде ара кірізерге килісче. Идінҷектерні прай саринаң сыныхтаҷаң органнар уғаа кӧп, олар тоғынарға пирбинчелер. Халғанҷы туста прокуратура органнары ара кіріскен соонда, идінҷектерні кирек чох сыныхтапчатханы ікі хати хызырыл парған. Сыныхтағ органнары идінҷектерні сыныхтир планнаң прокуратуразар айланчалар. Оларны кӧріп, прокуратура план хоостыра сыныхтағлар санын ікі хати хызырыбысхан. Административнай органнарға сыныхтағларнаң бизнесті хыза пазарға чарабас.
Республикада бизнеске хабазар ікі программа тоғынча. Пылтыр ол программаларға 10 миллион салковай позыдылған полза, пӱӱл ол ахча тӧрт хати хызырылған. Кічіг бизнеске хазна полызии, прай Сибирьні алза, иң асхынах, муниципалитеттерде андағ полызығ чоғыл.
Пілдістіг, республикада бюджет ахчазы чидіспинче. Бизнеске тоғынарға чарадығны 16 органда аларға килісче. Контракттарҷа чӧптезіглер чахсы толдырылбинчалар, анда удур-тӧдір алымнар кӧп чыылча. Республикада толдырылбаан контракттарның реестрін тӧстирге кирек полар. Анда кем хайди тоғынчатханы чахсы кӧрінер.
Хайди таныхтаан Василий Кудашкин, идінҷектернің праволарын арачылирынҷа уполномоченнайзар бизнеснең айғасчатхан кӧп кізі хопнаң айланча. Пӱӱл андағ айланыстар саны 24 процентке ӧс парған. Ӧӧнінде идінҷектер законнаң хыйыстыра иділчеткен сыныхтағларға хоптанчалар. Хайдағ ла органнар оларны сыныхтабинча. Ідӧк банктағы счётты чабызып, тоғынарға пирбинчелер. Ас-тамах сығарчатхан идінҷектерні сыныхтирын ікі орган пыласча: Роспотребнадзор паза Россельхознадзор. Полғаны ла, аны позының сферазына санап, сыныхтирға кӱстенче. Ідӧк ікі имнег организациязы «Карпов и К» паза «Медиком», конкуренттер полып, удур-тӧдір сыныхтағҷыларны ызыбызарға харасчалар. Конкуренция иптіг поларға кирек.
Валерий Послед чыылығ араласчыларының хайиин идінҷектер электроэнергия ал полбинчатханына айландырған. Чарытхыны пирзелер дее, аның качествозы уйан полча, ағаа хоза, удаа, азынада искірбин, чарытхыны ӱзібісчелер. Идінҷектер, тоғынар чахсы оңдайлар чохта, пасха регионнарзар парыбысчалар.
Александр Терещенконың чооғынаң, республикада бизнеске хабазар программа тоғынча. Че идінҷектер гранттар, субсидиялар аларға хыныхсыбинчалар. Ол ахча хайдар хорадылчатханнаңар хатығ сан
пиріс тударға киректелче. Аннаңар олар харанға тоғын сыхчалар. Ам идінҷектерге хабазар кін чох иділче, аның тоғызын республиканы тилідер чыындаа пир саларлар. Абазада табырах тиліҷең орын (ТОР) тӧстелче, идінҷектерге андар парар оңдай пирілче, анда кӧп льготалар полар. Харатаста промышленность паркы тӧстелген, анда чарытхы пар, тоғынар прай оңдайлар пирілче.
Ирина Войнованың искіриинең, кічіг паза ортын бизнеске ахча позыдарынҷа алымнар пар. Ирткен чылдағы алымнар тӧлел парған, ам пазох чыылча. Ӧӧнінде имнер алар паза имнег кирее сфераларында. Россия президенті хазна правительствозына алымнығ субъекттерге 31 декабрьға теере полыс пирерге чахығ пирген. 3 ноябрьда регионнарның бюджеттерін тиңнир комиссия чыылии иртер. Республикаа ӱс миллиард салковай полызығ оңдайынаң пирілген. Че сыбыра хайдағ-да полызыға ізенерге чарабас, постың парыстарын ӧскірерге, кирек чох хорадығларны хызырарға кирек полар. Налогтар салҷаң база республикада уғаа асхынах. Ол тоғысха муниципальнай пӱдістер пастары кӧп хайығ салбинчалар. Тузазы чох хорадығларны правительствода, муниципалитеттерде, бюджет учреждениелерінде саңай хызырарға киректелче.
Борис Крылов, прай чӧптерні санға алып, оларны коллегия чарадиина кир саларға чахығ пирген. Аның соонда прокуратура коллегиязы хығыртылған кізілер чох тоғызын узаратхан.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы