«ИСКУССТВО ХАРААЗЫ» АМҒЫ КУЛЬТУРАНАҢ ТАНЫСТЫРҒАН
10.11.2017
Хабарлар
Ағбанда республиканың музей-культура кінінде «Искусство хараазы» ирткен. Ол «Искусство піріктірче» тіп адалған.
«Искусство хараазы» - тиксі Россиядағы акция. Чыл сай пу акцияда культура учреждениелері араласчалар: музейлер, библиотекалар, театрлар, кӧзідіг заллары. «Искусство хараазының» ӧӧн пӧгіні - чайаачы кізіні кӧрігҷілернең тоғастырары, амғы тустағы культурадаңар искірері.
Музей-культура кінінің пастағы хадылында аалҷыларны чайаачы мастерской, ус холлығларның кӧзідіг-ярмарказы сағаан. Олған-узах аймах мастер-класстарда ӧткін араласхан. Кӧзідімге, «Сӱлейке карамельі» мастер-класста вазаларны, чірчелерні аймах ӧңніг сӱлейкелернең чазирға ӱгреткеннер. Пу мастер-классты Кирилл паза Анастасия Гейдер иртіргеннер. Оларның мастерскойы тӧрт чыл тоғынча, аймах мероприятиелерде олғаннарға мастер-класстар иртірчелер.
- «Искусство хараазында» сыбыра аралазарға кӱстенчебіс. Олғаннар мастер-класста хынып араласчалар. Сӱлейкені кічіг кизегестерге кисклебізіп, 850 градустығ ізіг песте хайылдырчабыс. Ӧңніг сӱлейкеҷектерні ідіс-хамысха чапсырарға ӱгретчебіс, - сағыстарынаң ӱлесче «Сӱлейке карамельі» мастерскойның устағҷыларының пірсі Кирилл Гейдер.
Ус холлығларның кӧзідиинде пос холынаң тимнелген ойнаҷахтар, чазанҷыхтар, ідіс-хамыстар паза даа пасха ниме-ноолар садыға сығарылған. Ус холлығ ипчі Елена Комелягина папье-машедең статуэткалар паза светильниктер, истең ойнаҷахтар тимнеп салған. Ол папье-машенең ӱс чыл мының алнында айғас сыххан. Ам кӧзідіглерде ӧткін араласча паза «Сыйыхтар чемоданы» устар кінінде олғаннарға мастер-класстар иртірче.
- Пу аңыҷахтар нимедең иділгенін кізілер піл полбинчалар. Ағастаң алай тимірдең итчезер бе тіп сурчалар. Мин тынаға сыхханда ла папье-машенең айғас сыххам. Орыс тілі паза литература ӱгретчізі полып тоғынғам. Тынаға сыхханда, ниме-де чайирым килібіскен. Интернетте папье-машедең ниме-ноолар тимнирінеңер хығырып алғам. Папье-маше минің кӧңніме кірче. Мин хаҷан даа хоостабаан кізібін. Амды хынған нименең айғасчам. Пірее статуэтка алай ойнаҷах ит сыхсам, тохтап полбиныбысчам, - теен Елена Комелягина.
Кӧзеелер залында олғаннарға «Оғырлалған кӱн» ойын иртірілген. Олғаннар ойын иртірчеткен кізінің сурығларына нандырғаннар, ағастаң тимнелген пуланға аңнап, аны мерчіктернең чаалааннар, сӧспектер тапханнар, арғамҷы тартханнар. Ойын соонаң кӧзеелер залында «Ӱлгер» ансамбль концерт турғысхан. Олох туста кинозалда чиит поэттернің, писательлернің тоғазии ирткен. Мария Окунева, Илья Новиков, Егор Никитин паза даа пасха чиит поэттер кибелістерін хығырғаннар.
Кіннің ікінҷі хадылында «Искусство піріктірче» концерт ирткен. Олғаннарның 2 № искусство школазының «Интрада» ансамбльы «Кӱскӱ кӧңнілері» концерт турғысхан. Ансамбль Георгий Свиридовтың вальсын, «Фейерверк» француз польказын паза даа пасха кӧглерні толдырған. Пу концертті ӧӧнінде улуғ частығлар кӧргеннер. «Юла» студияның устары «Тӱгенҷі пічік» теелбекті паза цыганнар теелбегін толдырғаннарында, кӧрігҷілер илееде кӧп полған. «Искусство піріктірче» улуғ концертте полған на кӧрігҷі кӧңніне кірчеткен ниме кӧріп алған. Амғы тустағы, фламенко теелбектерні кӧріп алар, скрипка паза саксофон кӧӧн истер оңдай полған.
Ікінҷі хадылында ідӧк «Кізі паза аның ибіркізі» хоостар кӧзідии ирткен. Ӱзінҷі хадылында «Первозданная природа России» сомнар кӧзідиинде Сергей Анисимовтың, Валерий Малеевтің, Иван Кисловтың, Владимир Алексеевтің, Николай Гернеттің, Сергей Горшковтың чайаачы тоғыстары сығарылғаннар. Хай пірее сомның алтында улуғ нимес искіріг пазыл парған.
Ідӧк олған кіні тоғынған. Палаларға «Вне сети» столда ойнаҷаң, «Картон киректері» улуғ лабиринт, сомға суурынҷаң орын полған. «Сами с усами» олған клубы иң кічіглерге ойыннар иртірген.
Пу мероприятиеде чон кӧп араласхан. Республика аймахтарынаң даа кӧрігҷілер полған. Ис пилтірі аал чуртағҷызы Аграфена Чебочакова, Миша, Алёша оолларынаң паза Маша хызынаң «Искусство хараазына» ӧнетін килгеннер.
- Музей-культура кінінде пастағызын на полдым. Мында уғаа истіг, чарых, че экспонаттар асхынах. «Искусство хараазына» даа пастағызын на килдім. «Кӱн чахайағы» ансамбльның концерті паза кічіг гимнасттарның сценада кӧзіділген устары кӧңніме кірген. Килер чылда «Искусство хараазы» пазох иртірілзе, килерге сағынчам.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы