ПОЛЫЗЫҒА КИЛЕРГЕ ХАҶАН ДАА ТИМДЕЛЕР
14.11.2017
Хабарлар
ИРТКЕН НЕДЕЛЯДА РОССИЯНЫҢ ІСТІНДЕГІ КИРЕКТЕР ОРГАННАРЫ ТОҒЫНҶЫЗЫНЫҢ КӰНІ ТАНЫХТАЛҒАН. АҒБАНДА ТИМІРЧОЛҶЫЛАРНЫҢ КУЛЬТУРА ӦРГЕЗІНДЕ ПУ КӰНГЕ ЧАРЫДЫЛҒАН ПАЙРАМНЫҒ ЧЫЫЛЫҒ ИРТКЕН. АНДА ПРАЙ РЕСПУБЛИКАНЫҢ ПРАВО ХАЙРАЛЛАҶАҢНАРЫ АРАЛАСХАННАР.
ӰЛӰКӰН ПАСТАЛҒАНДА, СЦЕНАЗАР РОССИЯНЫҢ ІСТІНДЕГІ КИРЕКТЕР МИНИСТЕРСТВОЗЫНЫҢ ЗНАМЯЗЫ СЫҒАРЫЛҒАН, РОССИЯ ПАЗА ХАКАСИЯ ГИМННЕРІ ТОЛДЫРЫЛҒАН. СӦС ТУТХАН ХАКАСИЯҶА ІСТІНДЕГІ КИРЕКТЕР МИНИСТРІНІҢ ТОҒЫЗЫН ӰР НИМЕСКЕ ТОЛДЫРЧАТХАН, ІСТІНДЕГІ СЛУЖБАНЫҢ ПОЛКОВНИГІ СЕРГЕЙ РОМАШОВ.
Ол, полиция тоғынҷыларын алғыстап, Россия милициязына 100 чыл толғанын таныхтаан. Аның чооғынаң, республикаа полиция тоғынҷыларынаң поғдархирға чарир. Право хайраллиры полған на полиция тоғынҷызынаң тоғысха пирін саларын, сыдазарын паза тоғысха хынарын кирексіпче.
- Республика Правительствозынаң, Ӧӧркі Чӧбінең, Істезіг управлениезінең, прокуратуранаң, ФСБ управлениезінең паза пасха даа хазна структураларынаң пірге тоғынып, правопорядокты тыыдарында, чуртағҷыларның амыр чуртазын хадарарында, бизнестің паза республика экономиказының тилізінде піс чахсы чидіглерге читкебіс, - чоохтаан Сергей Ромашов.
Чооғында Сергей Александрович иділген сайбағлар табырах ілезіне сығарылчатханын таныхтаан. Чурттардаң оғырластар паза автомобильлерні оғырлааны, кізілерні тонааны хоостыра ілезіне сығарылған сайбағларның саны ӧсче. Мының алнында иділген сайбағлар ідӧк ілезіне кӧп сығарылчалар. Паза пасха даа хомай киректердең тоғыр полиция тоғынҷылары маңнаныстығ кӱрезіг апарчалар. Іди сайбағларны ілезіне сығарарынҷа Хакасия прай Россияда 16-ҷы орында турча, Сибирьде - 2-ҷі орында.
- Пӱӱн піс службада чуртастарын пир салған арғыстарыбысты аарласнаң сағысха кирчебіс. Хакасияның істіндегі киректер органнарының 35 тоғынҷызы, сайбағҷыларнаң кӱрезіп, чуртазын пир салған, - чоохтаан Сергей Ромашов.
Чооғында ол ідӧк служба ветераннарын таныхтаан. Олар амғы тоғынҷыларға кӧзідім полчалар. Пу ӱлӱкӱнде кӧбізі службаны маңнаныстығ апарча, чуртағҷыларны арачылапча. Пӱӱл Ағбан пилтірі аймаанҷа УМВД-ның ГИБДД тоғынҷылары Максим Грущаков паза Дмитрий Терских кӧйчеткен турадаң алты кізіні сығарып алғаннар. Сентябрьда Абазадағы ОМВД-ның наркотиктердең тоғыр кӱрезіг апарчатхан оперуполномоченнайы Евгений Ильченко 70 метр пӧзіктегі хайадаң алты частығ хызыҷахты ал халған.
Октябрьда Асхыс аймаанҷа УМВД-ның ГИБДД тоғынҷызы Владимир Кокошников паза инспектор-кинолог Александр Тинников ӧртке хабылған турадаң иренні сығарып алғаннар.
Анаң сценазар Хакасияның пазы Виктор Зимин сыххан.
- Прай чӱреемнең Хакасияҷа МВД-ның ветераннарын, устағҷыларын паза тоғынҷыларын Істіндегі киректер органнарының тоғынҷызы кӱнінең алғыстапчам. Пӱӱл сірернің ӱлӱкӱніңернең піс тоғысчылар милициязы тӧстелгенінің 100 чылын таныхтапчабыс. Чыллар ирткеннер, хазна политиказы паза структура ады алысхан даа полза, сірернің тоғызыңар алыспаан. Сірер хаҷан даа право хайраллаазар паза чонның амырын хадарғазар. Уғаа нандырығлығ тоғызыңар сірердең махачы поларға паза хыйалға кірген кізілерге полызыға килерге кирексіпче. Хакасияҷа істіндегі киректер министерствозының тоғынҷылары, пістің чуртағҷыларыбысты арачылап, аар сайбағлар иткен кізілерні тудып, Алтынзархы Кавказта террористтердең тоғыр кӱрезіг апарып, пик хылыхтарын кӧп хати кӧзіткеннер. Аның ӱчӱн кӧбізі хазна сыйиина турысхан. Чуртастарын пир салған арғыстарың, коллегаларың хаҷанға даа сағыста халзыннар.
Аарлығ арғыстар, прайзына - ветераннарға, тоғынҷыларға - чонның амыр чуртазын хадарчатхан ӱчӱн алғызым читірчем. Сірер пістің чирібісті чахсыландырчазар, чонның истіг чуртазына, бизнес тилізіне, республика экономиказына чахсы хабасчазар. Піс сірернең поғдархапчабыс, - таныхтаан чооғында Виктор Михайлович.
Чоох тутхан соонда Хакасия пазы службаны турыстыра апарчатхан полиция тоғынҷыларына Аарластығ, алғыстас пічіктерін читірген. Полковник Сергей Ромашов «Трудовая доблесть Хакасии» медальнаң сыйыхтатхан. Сыйыхтар алғаннарның санында Ағбан пилтірінҷе УМВД-ның улуғ істезігҷізі, юстиция майоры Андрей Чертыков паза Ағбанҷа УМВД-ның чазы читкелектер киректерінҷе пӧлиинің пастығы, полиция майоры Олеся Чебодаева полғаннар.
- Мин милициязар 1997 чылда килгем, - чоохтапча Андрей Анатольевич. - Пастап Асхыстағы РОВД-да дознаватель полғам. Сибирьдегі юридическай институтты тоозып, істезігҷі полыбысхам. Амды мин оғырластарны ілезіне сығарчам. Пӱӱнгі кӱнде сайбағҷылар малны, чурттардағы ниме-нооларны паза пӱдіріг материалларын кӧп оғырлапчалар. Таныхтирға кирек, мында ээлері постары пыролығ, ниме-нооларын чахсы кӧрбинчелер. Че сайбағларның кӧбізі ілезіне сығысча. Ӱлӱкӱнде хада тоғынчатханнарыма пик хазых, часка алғапчам. Сӧбірелері оларның тоғызына пілізіснең хайзыннар. Піс тоғыста кӧп тус иртірчебіс нооза.
- Мин полицияда 13 чыл тоғынчам, - чоохтаан Олеся Семёновна. - Тоғысха наа ла килгенімде, мин общежитиеде чуртаам. Анда палалығ сӧбірелер кӧп полған. Паба-іҷелер араға ісчеткен сылтаанда палалар уйан чуртааннар. Андағ палаларның оңдайларын чахсыландырар пӧгіннең, мин пу тоғысты таллап алғаныма хомзынминчам. Палаларнаң, улуғларнаң тоғынарға хынчам. Сидік туста оларға полызығ пиріп алғаныма чӧпсінчем. Халғанҷы ікі чылға чазы читкелектер иткен сайбағлар саны хызырылча. Анзы чахсы профилактика тоғызын таныхтапча.
Ідӧк чыылығда чоох тутханнар Хакасияның Ӧӧркі Чӧп кнезі Владимир Штыгашев паза даа пасхазы. Алғыстас сӧстері тоозылғанда, право хайраллаҷаңнар улуғ нимес концерт кӧріп алғаннар.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде