ПОС АС-ТАМАА - ИҢ ТАТХЫННЫҒ
15.11.2017
Хабарлар
РЕСПУБЛИКАДА НИМЕ-НООЛАР СЫҒАРЫЗЫНАҢ АЙҒАСЧАТХАН ПРЕДПРИЯТИЕЛЕРНІ САБЛАНДЫРАР ӰЧӰН, ОЛАР ЧОНҒА ТАНЫС ПОЛАР ӰЧӰН, 2012 ЧЫЛДА ТӦСТЕЛГЕН УҒАА ЧАХСЫ КӦЗІДІГ - «ХАКАСИЯДА ИДІЛГЕН!». ПӰӰЛ ПУ КӦЗІДІГ ПИЗІНҶІ ХАТИ ИРТТІ. ІДИ 9 - 11 НОЯБРЬДА РЕСПУБЛИКАНЫҢ МУЗЕЙ-КУЛЬТУРА КІНІНДЕ ПІР САҢАЙ ӰС КӦЗІДІГ ИРТКЕН: ПАСТАҒЫ ХАДЫЛЫНДА - «ӰСТӰНЗАРХЫ СИБИРЬНІҢ ПАЗА ХАКАСИЯНЫҢ ИҢ АРТЫХ ПРЕДПРИЯТИЕЛЕРІ» КӦЗІДІГ- ФОРУМ ПАЗА «ХАКАСИЯДА ИДІЛГЕН!» КӦЗІДІГ-ЯРМАРКА, ІКІНҶІ ХАДЫЛЫНДА - «НАА ЧУРТАС» КӦЗІДІГ-ФЕСТИВАЛЬ.
Кӧбізі чуртағҷыларның хайиин ас-тамах сығарчатханнар тартханнар. Хаҷаннаң тоғынчатхан предприятиелер санында наа ла тоғынчатханнар хозылған. Полғаны ла позының пасхалалчатхан ниме-ноозын сығарған. Кӧзідімге, «Мяско» садығ туразын ағбандағылар чахсы пілчелер. Анда ит садии ла парбинча, ідӧк пу атнаң полуфабрикаттар сығарылча. Наа ас-тамах - колбасалар. Директор орынҷызы Вера Трошкинаның искіриинең, предприятие колбасалар сығарызынаң чарым чылҷа ла айғас парир. Олар сығарыста итнең не тузаланчатханнарын таныхтапчалар.
Пілдістіг, колбаса наа ла сығарып пастапчатхан предприятиее, чуртағҷыларның чӱреен аптап алар ӱчӱн, позын чахсы ла саринаң кӧзідерге кирек. Оларның хыринда Хакасияның ас-тамах рыногында ла нимес, тиксі Россияда даа, пасха хан чирлерінде дее тушёнкаларынаң, колбасаларынаң сабланчатхан «МаВР» компания 20 азыра чыл істен парир. Тоғынҷыларның чооғынаң, пӱӱнгі кӱнде компанияа позының ас-тамаанаңар искірігліг хоостарын алыстырарға килісче, оларны хобырчатханнарнаң кӱрезіп.
Хакасияның рыногы иттең тимнеен ас-тамахха ла нимес, ідӧк халасха пай полыбысты. Чуртағҷыларны идінҷектер халғанҷы туста уламох чӧпсіндірчелер, ізіг іпектерінең, татхыннығ оох халастарынаң, мының алнындағыох халас итчеткен оңдайларнаң тузаланып. Ағбанда андағ идінҷектернің пірсі - Татьяна Тутатчикова. 20 азыра чыл кондитер киреенең айғазып, технолог ӱгредігліг ипчі улуғ ус пол парған. Халғанҷы тӧрт чыл ол позының «Малинники» пекарня-кондитерскайынаң айғасча. Чуртағҷылар кондитерскайның тадылығ оох халастарынаң, торттарынаң, пироженайларынаң пасха, ідӧк халастарын хынып алчалар. Халасты олар ӧнетін ачытхыда турғызылған тестодаң итчелер.
Хакасияда иділген ас-тамах предприятиелерінең пасха, кӧзідігде Хызылчар крайының ӱстӱнзархы аймахтарынаң предприятиелер полғаннар. Кӧзідімге, сӱттең ниме-ноо сығарчатхан «Авангард» паза «Сибиржинка» компаниялар. Ідӧк кӧзідіглерде аймах полызығлар пирчеткен компаниялар араласханнар. Сӧп-сапты хатап тузаланчатхан предприятие пластикті, сӱлейкені паза чаҷынны чыыпча. Пластиктең мебель сығарчатхан, картоннаң ниме-ноолар итчеткен идінҷектер полғаннар.
Ікінҷі хадылында «Наа чуртас» кӧзідіг-фестиваль ирткен. Чарых пӧлікте ӧӧнінде абахай ипчілерні, хыстарны кӧрерге чарир полған. Устар оларға састарын хырыхчатханнар, сіліглепчеткеннер, паза сала чиит кӧрінердеңер аймах оңдайлардаңар чоохтапчатханнар. Ідӧк мында сыйыхтар тимнепчеткеннерні, сомға суурчатханнарны табарға чарир полған.
Хакасия пазының пастағы орынҷызының тоғызын толдырчатхан Олег Нам, кӧзідігні пайрамни асхан соонаң, Хакасияның тиліс фондының устағҷызы Денис Паульнаң паза республиканың экономика тилізі министрінің пастағы орынҷызы Александр Терещенконаң хада кӧзідіг араласчыларынаң паза олар сығарған ниме-нооларнаң танысханнар. Кӧзідігде олар ідӧк хайдағ-да сағыстарынаң паза чӧптерінең ӱлескеннер.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде