ПӀР ДЕЕ ТӀЛ ХЫЙЫХТАТПАСХА КИРЕК
17.11.2017
Хабарлар
Казаньдағы федеральнай университетте ӱс кӱн Тіллернің паза культураларның чоннар аразындағы саммиді ирткен. Аны Л.Н.Толстойның адынаң филология паза культуралар аразындағы палғалыс институды апарған. Анда 250 азыра учёнай араласхан.
Олар Россияның аймах городтарынаң паза хазналардаң килгеннер: Армения, Германия, Италия, Япония, Хыдат, США, Турция паза аннаң даа пасхазы. Хакасиядаң анда араласхан филология наукаларының кандидады, филология паза культуралар аразындағы палғалыс институдының хакас кафедразының доценті Наталья Николаевна Таскаракова. Хайди ол таныхтаан, саммит ӱс аймах конференциядаң пӱткен: «И.А.Бодуэн де Куртенэ паза тилекейдегі лингвистика», «Кӧп нациялығ хазнада тӧреен тіллерні хайраллиры паза тилідері: ағырсымнығ сурығлары паза тилир оңдайлары», «Восток-Запад: литература паза хоос культура». Пу улуғ чыылығны Казаньдағы федеральнай университеттің проректоры Данис Нургалиев асхан. Ӧӧн докладтарнаң Казаньдағы филология институдының устағҷызы Радиф Замалетдинов, Удинедегі университеттің профессоры Марини Андреа (Италия), Мармарадағы университеттің профессоры Лейсан Шахин (Турция) паза аннаң даа пасхазы чоох тутханнар. Докладтар татар, орыс паза англия тіллерінең апарылғаннар.
Наталья Таскаракованың чооғынаң, саммитке чыылысхан учёнайлар тіл суриина ӧӧн хайығ айландырғаннар. Тилекейдегі алызығларның сылтаанда, тӧреен тіллер чідіп пастирына даа хорғыс пар тіп таныхталған. Аннаңар тіл суриин филологтар имҷілернең, физиктернең, математиктернең паза даа пасхазынаң хада пӧкчелер тіп искірілтір. Хайди ЮНЕСКО-ның тоғысчы группазының устағҷызы Евгений Кузьмин таныхтаан, пір дее тіл хыйыхтатпасха кирек, олар ӧзіп ле турарға киректер.
- Мағаа ӧӧнінде «Восток-Запад: литература паза хоос культура» конференцияда аралазарға киліскен, - чоохтаан Наталья Таскаракова. - Таныхтирҷыхпын, татар учёнайлары докладтарын пос тілінең читіргеннер. Олар, пасхазына кӧзідім полып, тіллерін кӧдіргеннер. Ідӧк анда литератураның сидік сурығларының пірсі, тӱрк литературазының теориязы, чахсы чарыдылған. Ағаа хоза, тӱрк паза культура кіннерінде, город орамаларында литература паза хоос культура хайди чарыдылчатханы таныхталған.
Чоохтирға сағынчам, пістің литература паза фольклор хаҷан даа Волга хазындағы тӱрктерге хынығ пілдірче. Аннаңар мағаа чоох тударға анда прай оңдайлар пирілген. Таныхтирға кирек, татар чоны - ол кӱстіг чон. Пос тіліне чарыдылған чыылығларны университет ле нимес, ідӧк татар кіннері хада-пірге тудынып иртірчелер. Анзын хайди даа махтирға кирек.
Автор :
Екатерина ИНДЫГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы