ТӦРЕЕН ТІЛ ӰГРЕТЧІЛЕРІНІҢ СЪЕЗДІ
29.11.2017
Хабарлар
Хакасияның ӱгретчілері орындағы ас саннығ чоннарның тӧреен тіллері ӱгретчілерінің тиксі Россиядағы съездінде араласханнар. Съезд Санкт-Петербургта А.И.Герценнің адынаң ӱгретчілер хазна университедінде ирткен.
Съездтің тоғызында Россияның 30 субъектінең 350 кізі араласхан. Съезд делегаттары ӱгретчілер, воспитательлер, ӱгредіг тоғынҷылары, эксперттер паза орындағы ас саннығ чоннарның халых пірігістерінің кізілері полғаннар.
Хакасиядаң съездке Палыхтығ суғ аалдағы школаның технология, тархын паза обществознание ӱгретчізі Алла Зуева, олох школаның орыс тілі паза литература ӱгретчізі Наталья Дровосекова, Мадырдағы школаның пасталығ класстар ӱгретчізі, «Хакас паза шор тіллері» уроктағы нимес тоғыстың ӱгретчізі Надежда Шултрекова чӧргеннер. Пу ӱгретчілер палаларны шор тіліне, шорларның национальнай кип-азаан тігеріне паза сувенирлер идеріне ӱгретчелер.
Ас саннығ чоннарның тӧреен тіллерін, культуразын хайраллирынҷа сурығлар пис секцияның тоғызында ӱзӱрілген. Ідӧк съездте тӧреен тіллерні хайраллирынҷа ӱгредіг, культура паза наука проекттерінің презентациязы ирткен. Делегаттар «Севернің, Сибирьнің паза Ыраххы Востоктың орындағы ас саннығ чоннарының тӧреен тіл паза литература ӱгретчілерінің ассоциациязын» тӧстееннер. Пу чӧрім ас саннығ чоннарның тіллерін паза культуразын хайраллап тилідерге полызар. Чӧрімнің толдырығлығ комитеді паза ревизия комиссиязы тӧстелген, андар Хакасиядаң ӱгретчі Алла Зуева кирілген.
Автор :
Светлана АСТАНАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы