ПІРІКЧЕТКЕН ААЛ ЧӦПТЕРІНЕ ХАБАЗЫҒ ПОЛАР
05.12.2017
Хабарлар
Хакасияның Ӧӧркі Чӧбінің президиумы 30 ноябрьда теестегі чыылиин иртірген. Комитет-комиссия кнестері чағынғы сессияа тимненісті пастабысханнар, хайзын 13 декабрьда иртірерін пуох чыылығда чарат салғаннар. Президиум тоғызында араласхан Россияның Федерация Чӧбінің кізізі Евгений Серебренников. Чыылығны апарған республика парламентінің кнезі Владимир Штыгашев. Президиум кізілері сигіс закон проектінең танызып алғаннар паза пис федеральнай закон проектіне ӱндескеннер.
Закон проекттерінің ӧӧн чардығы Хакасия Правительствозының пӱдізі алысханынаң палғалыстығ. Кӧзідімге, Хакасияның ветеринария хазна инспекциязы амды республиканың аал хонии паза ас-тамах министерствозына хозылча, ведомство пастығы Гульнара Керимова министрнің орынҷызы полча. Чох иділче Правительство аппарады, аның тоғызы наа тӧстелген юстиция паза региондағы безопасность киректерінҷе министерствозына артылча. Пӱӱнгі кӱнде министр тоғызын толдырча Елена Кудинова.
Алындағы сессияларның пірсінде Пии аймаандағы ікі муниципальнай пӱдіс піріктірілген. Республика устағ-пастаа, чонның сағыс-кӧрізін санға алып, пу тоғысты пазағы чылларда узарадарға пӧгінче. Аннаңар, оларның сариларын алып, закон проекті тимнелген, хайзының хоостыра республика бюджедінде кӧрілген дотацияларның синін санирына алызығлар кирілген. Закон проекті хоостыра піріктірілчеткен аал чӧптеріне кӧрілген дотациялар хызырылбасха кирек. Хакасияның финанстар министрі Ирина Войнова президиумны ізендірген, піріктірілген аал чӧптеріне ӧӧн пічіктерні тимниріне, ол санда хырығларны кӧзідеріне, прай хабазығ пирілер. Пу сурығ ӧӧнінде парламенттің орындағы пос устанысча, халых пірігістерінҷе паза нациялар аразындағы хайызығларҷа комитет кнезі Михаил Саражаковты сағыссыратча.
Хакасияның Ӧӧркі Чӧбінің культураҷа, ӱгредігҷе паза наукаҷа комитет кнезі Лариса Карпова «Хакасиядағы пала правозынҷа уполномоченнайынаңар» Хакасия Законына алызығлар кирердеңер» закон проектінең таныстырған. Закон проектінде уполномоченнайға турғызылчатхан кізее наа кирексіністер хозары кӧрілче: пала правозын арачылирында тоғынғанын паза чарғылаттырбаанын санға алары. Пуох закон проектінде Олғаннарның халых чӧбін тӧстирі кӧрілче, хайзы пістің республикада ӱр ниместе тӧстелген.
Президиум ӧкіс олғаннарның праволарын алғытчатхан алызығлардаңар закон проектіне чӧпсінмеен. Депутаттар пасха регионнарда ӱгренчеткен ӧкіс студенттерге ӱгренчеткен орыннаң чир-суунзар чылда пір хати тикке кил турҷаң оңдай пирерге сағынчалар. Че закон проектінде аны толдырарына нинҷе ахча киректелчеткені кӧзіділбеен, аннаңар хазых хайраллирынҷа паза социальнай политикаҷа комитет кнезі Николай Михеевке аны читіре тимнебізерге чӧп пирілген.
Президиум федеральнай закон проекттеріне хабазарға чаратхан. Олар табығларға, национальнай гвардияның войсколарына, миграцияа паза волонтёрстваа теелгеннер.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы