РОБОТТАРДА ОЛҒАННАРНЫҢ УЗЫ КӦЗІДІЛГЕН
15.12.2017
Хабарлар
Ағбанда 13 декабрьда робототехникаҷа марығ ирткен. Чайаачы олғаннар кінінде (ЦДТ) Асхыс аймааның, Ағбандағы школаларның паза пу кіннің ӱгренҷілері чыылысханнар.
Прай 30 команда араласхан. Марығ чарыстар оңдайынаң ирткен. Олғаннар школа кружоктарында иткен робот-машиналарын сығарғаннар. Артур Чаптыков Асхыс поселоктаң килген. Ол роботтарны идерге пастағы чыл ӱгренче, аннаң информатика ӱгретчізі Дмитрий Чанков устапча.
- Роботтарны чайиры паза оларны тоғындырҷаң программа тимнирі минің кӧңніме кірче. Піс, роботтарны чыып алзабыс, оларны ойладар ӱчӱн, компьютер пастыра полғанына ла алынҷа программа тимнепчебіс. Мындағ марығларда мин пастағызын на араласчам. Мында кӧп олған араласчатханы паза аймах-пасха кӧрімніг роботтар сығарылғаны хайхатча, - чоохтапча Артур.
Ӱгретчі Дмитрий Чанков Асхыс поселоктағы школада робототехника кружогын ікінҷі чылы апарча. Материалларны ол позы тимнепче. Ирткен чылда ол олғаннарнаң хада тоғыстарны «Технотворчество» кӧзідіге сығарған. Че мындағ марығларда ағаа пастағызын на аралазарға килісті. Ам аның кружогына 29 пала чӧрче. Марығларға пастағызын сыхханда, олғаннарның пу тоғыснаң айғазар кӧңнілері улам тыып турар.
- Піс, роботтарны тимнеп, «С+» программанаң тоғынчабыс. Че олғаннар, программирование тілін піліп алар пӧгіннең, пастап Paskal программанаң тоғынчалар. Ідӧк оларны ХГУ ӱгретчізі тимнепче. Пу тоғыс олғаннарға ам даа сидік пілдірче. Че пір чыл пазынаң олар пос алынҷа тоғынарлар тіп ізенчем, - чоохтапча Дмитрий Геннадьевич.
Мындағ мероприятиелерде олғаннар улуғ марығларға тимненчелер. Олар пірге тоғынарға ӱгренчелер. Ӧӧн пӧгін - иң табырах робот ойлатчатхан модельні чыып алары. Араласчылар тӧрт кӧрімніг роботтар ағылғаннар: «Лего» конструктор, США-да иділген «Векс» конструктор, «Амперка» компанияның конструкторы паза пос холынаң иділген роботтар. Оларны чарыстырҷаң ікі улуғ макет тимнелген. Олар ікі аймах кӧрімніг трассаларда марығласханнар. Анда чоллар хара сырнаң тимнелгеннер. Прай модельлер ӧң датчиктері пастыра тоғынчалар. Ол датчиктер хара сырлығ чолыҷах хайди сиилгенін роботха кӧзітчелер. Хайди таныхтаан марығ тӧстегҷізі, ЦДТ ӱгретчізі Александр Терещенко, пір чол ирткен чылдағы марығларға тимнелген. Аның узуны - тоғыс метр, че анда улуғ нимес тӧңіҷектер полған. Кӧп араласчы ол чолға тимде полған, че пірее командаларға роботтарның тоғызын орнында алыстырарға киліскен. Ікінҷі чолның узуны 17 метр полған. Аны марығлар алнында тимнебіскеннер. Анда пір саңай ӱс робот марығласхан. Ікі чолны инженер Вячеслав Кречин иткен. Пазағы чылларда аннаң даа кӧп робот чарызар оңдайлығ трассаларны тимнирі кӧрілче. Іди марығлар хынығ арах иртер.
Пір саңай ікі чолда марығ парған. Роботтар узун трассада чарысханын кӧрерге иң хынығ полған. Мында пір саңай ӱзер араласчы сыххан. Ӱгренҷілернің роботтары, удур-тӧдір теңмин, финишсер ойлатханнар. Че піреезі, таң, табырах ойлатхан, таң, саба тимнелген сылтаанда, чолдаң сығара ойладыбысчаң. Кӧзідімге, пір чарыста «Ветерок», «Квантум» паза «Арктур» командаларның роботтары ойлатханнар. «Ветерок» паза «Арктур» командаларның роботтары чолдаң сых парыбысхан сылтаанда, чиңісті «Квантум» команданың араласчызы тутхан.
Марығда олғаннар чахсы тимненістерін кӧзіткеннер. Роботтар трассаларны ӧӧнінде тооза иртібісчеңнер. Анзы прай тоғыстар иптіг иділгенін таныхтаан. Ирткен чылларда марығларда араласхан ӱгренҷілер алынҷа «Мастер-класс» номинацияда марығласханнар. Аннаң пасха «Полоса препятствий», «Большая гонка» паза «Очумелые ручки» номинациялар полған. Іди «Полоса препятствий» номинацияда пастағы орынға Олег Худяков паза Михаил Барабаш (ЦДТ) турысханнар. «Мастер-класс» номинацияда Денис паза Варвара Есиннер (ЦДТ) чиңіс тутханнар. «Большая гонка» номинацияда - Роман Сайков паза Егор Рааб (ЦДТ). «Очумелые ручки» номинацияда Степан Бурнаков паза Максим Кутуков (Асхыс аймаа) чиңісчі полыбысханнар.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы