ЫРЛАРЫ ПОС ЧОНЫНА, ТӦРЕЕН ЧИРІБІСКЕ ПОҒДАРХИРҒА ӰГРЕТЧЕ
19.12.2017
Хабарлар
Пу наада С.П.Кадышевтің адынаң культура кінінде Хакасия искусствозының саблығ деятельі, композитор, «Айланыс» ансамбльның устағҷызы Александр Саможиковтың чайаачы иирі ирткен. Саблығ устың сарыннарына пістің чон хынадыр, аның ырларын истіп аларға кӧп кізі килген.
Александр Степанович хакас культуразына салымнығ хозым ит салған. Музыкант 70 артиинаң сарынның авторы полча, оларның кӧбізі хакас культуразының «алтын чыындызынзар» кірче. Аның кӧглерін сцена устары даа, чайаачы чолын наа ла пастапчатхан чииттер дее хынып толдырчалар. Анзы тиктең нимес, Александр Саможиковтың ырларында пістің чонның сағыс-кӧрізі толдыразынаң кӧзіділче. Композитор илееде чайаачы тоғыс хакас чонның кӧг тиріглеріне пас салған. Олар олғаннар музыка школаларының, музыка колледжінің, Н.Ф.Катановтың адынаң Хакас хазна университедінің искусство институдының ӱгредіг программаларына киріл парғаннар. Че ӧӧнінде Александр Степанович сарыннарны «Айланыс» ансамбльға чайапча. Музыканттар, кӧгҷінің ырларын Россияның аймах регионнарында, хырығ озаринда толдырып, тӧреен чирібісті - Хакасияны - ырахха саблапчалар.
Иирні «Айланыс» ансамбль музыка колледжінің студенттерінең хада асхан. Музыканттар чайаачы устың «Ирбен оттығ чазы» саблығ произведениезін толдырғаннар. Хайхастығ музыка кӧрігҷілернің чӱреен амыратча, таңдағызына ізеніс пирче. «Иренек Хан» кӧг пасха оңдайлығ. Аны чайап, Александр Саможиков алыптығ нымахтарға тӧстенген, неке. Мында ол хакас чонның, тӧреен чирінің ӱчӱн турысхан алып ханның омазын чахсы кӧзіт пирген. «Ат чарызы» композицияда Тун пайрамнаңар чоох парча. Композиторның кӧӧн таланттығ студент Юрий Шалгынов хомыснаң чалтырама толдырыбысхан.
Музыканттарның соонда сценазар ырҷылар сыхханнар. Нина Идимешева «Пай хазың» паза «Чыл пазы» сарыннарны хаҷаннаң сығара толдырча. Чир-суғҷыбыстың арығ, ӧтіг ӱні залға толдыра чайылғанда, чылығ часхының тынызы сабыл килгенге тӧӧй пілдірген. Людмила Арыштаева «Чолпан чылтыс» ырның тирең сағызын читірген. Аны истіп, полған на кізі позының іҷезін, туған-чағыннарын сағысха кирген полар. Ираида Ахпашева «Ах ой адым», «Тадар чирім» сарыннарны чӱрекке теерте толдырыбысхан. Ідӧк композиторның ырларын «Ӱлгер» ансамбль сарнапча. Хакас чайаачылар концертке А.С.Саможиковтың «Чирім тынызы» чайаачы тоғызын таллап алтырлар. Чииттердең концертте Тамара Чустееванаң Алексей Казыгашев араласханнар. «Хазыр суғ» ансамбльның устағҷызы, хомыснаң ойнап, Ағбан городха чарыдылған ырны толдыр пирген. Алексей Казыгашев, тізең, кӧрігҷілерні «Ала тағларым» ырнаң ӧріндірген.
Че залдағы чон «Айланыс» ансамбльның сарнирын чидікпин сахтапчатхан. Хакас чайаачылар сыхханда, оларны хазыр айа сабызынаң удурлааннар. Ансамбльның репертуарына Александр Саможиковтың кӧп сарыны кірче. «Чыллар-чыллар» ырны ол поэт Валентина Татарованың кибелізіне пас салтыр. Сіліг сарын кӧрігҷілерні сағысха тӱзірген. Ідӧк «Ноо полбас» ыр морсымнығ истілген, ол пос чонына, аның хыйға кізілеріне поғдархирға ӱгретче. «Аарлығ аалҷыларым» пістің чонның иң хынчатхан сарыннарының пірсі полча. Концерт тузында кӧрігҷілер аны саблығ ӧменең хада сарнааннар.
Композиторның хада хонғаны Хакасияның саблығ артизі Степанида Саможикова полча. Ол, ӧтіг ӱнінең «Хомызым» ырны сарнап, залдағы чонға ӧрініс сыйлаан. Ідӧк изебі чох таланттығ Степанида Степановна теелбектер турғызыбысхан. Оларны «Читігеннің» абахайлары Виктория Конгарова, Светлана Саможикова, Евгения Костякова паза Алина Майнашева толдырғаннар. Хакас кип-азахтығ, ніске сыннығ хыстарға кӧрігҷілер ӧкерсінгеннер.
Кӧгҷі Александр Саможиковтың чайаачы иирі пір тыныснаң ирткен. Кӧрігҷілер, саблығ устың сарыннарына морсынып, полған на номер соонда матап айа сапханнар паза «Браво!» хысхырғаннар. Ізенчебіс, композитор, наа сарыннар чайап салып, чир-суғҷыларын хатап ойынға хығырар.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы