ИМНЕГ ТУРАЗЫНДА, ЧАДЫП, СЫНЫХТАҒЛАР ИРТЕРГЕ ЧАРИР БА?
20.12.2017
Хабарлар
Пістің редакциязар Пии аймаандағы Улуғ Нонып аал чуртағҷызы Александр Челтыгмашев пічік пасхан. Аал аймах кінінең ырах орныхча.
Улуғ частығ кізее, ағырыбысса, алай сыныхтағлар иртчетсе, имнег туразынзар чидіп аларға уғаа сидік. Аннаңар ол сурча, ырах чуртапчатхан кізее, чылда пір хатап имнег туразында чадып, сыныхтағлар иртерге чарир ба? Пу сурығны паза тоғыс кирее хайди апарылчатханын Пии аймаандағы имнег туразының ӧӧн имҷізінің имнег киреенҷе орынҷызы Ирина Петровна ПОБЫЗАКОВА чарытхан. Ол тӧреен-ӧскен Пии аймаандағы Хойбал аалда, аннаңар чуртағҷыларның сидіксіністерінеңер паза аймахтағы ағырсымнығ сурығлардаңар чахсы пілче. Ирина Побызакова Хызылчардағы имнег хазна институдының имнег кирее факультедін 1989 чылда тоосхан. Илееде чыллар терапевт паза тиксі профилактика имҷізі полып тоғын салған.
- Ирина Петровна, аймахта хайдағ аалларда фельдшер-акушер пункттары пар?
- Пістің аймахта алты имнег амбулаториязы, 16 фельдшер-акушер пункты саналча. Кічіг аалларда, хайда чуртағҷыларның саны 100-тең асхынах, имнег ӱгредии чох, пастағы полызығ пирҷең курстар ирткен кізілер иблерінде полызығ пирчелер. Ибде полызығ пирҷең туралар аймахтың пис аалында пар. Ол аалларда ФАП-тар чоғыл, аннаңар олар хости ааллардағы пункттарда, имнег амбулаторияларында имненчелер. Ибде полызығ пирчеткен кізі имҷі нимес, аннаңар ол имҷі чіли полызығ пир полбас. Че имҷілер килгенҷе, палығларны палғирға, ханын тохтадарға пілче. Ідӧк ибде полызығ пирчеткен кізее, аймахтағы имнег туразынаң палғалыс тудар ӱчӱн, сотовай телефон пирілче. Аал чуртағҷылары даа ол кізее сығдырат полчалар, телефон чох кізілер, тізең, табырах полызығ автомобильін хығыртарға итсе, ол телефоннаң сығдыратчалар.
- Пии аймааның имнег туразында нинҷе пӧлік?
- Ағырчатхан кізілерні хараа-кӱнӧрте чатырҷаң тӧрт пӧлік пар: терапевт, хирургия, чуғынҷах ағырығларның паза олғаннар пӧлии.
- Прай ол пӧліктерде нинҷе кізее чатчаң орын пирілче?
- Амғы туста ағырчатхан кізілерні хараа-кӱнӧрте чатырарға 69 орын кӧрілче. Таныхтирға кирек, ол орыннар пістің имнег туразына читкіҷе.
- Ирина Петровна, аймахтағы имнег туразында ағырчатхан кізілернің чатчаң орыннары хызырылған ма?
- 2016 чылда пістің имнег туразында ағырчатхан кізілерге 71 орын полған, анаң ікі орын хызырыл парған. Пии аймааның имнег туразына 69 орын читче, ағаа хоза кӱнӧрте чатчаң орыннар кӧп. Хараа-кӱнӧрте чатчаң орыннар хызырылза, амбулаторияларда кӱнӧрте чатчаң орыннар хозылча.
Анзы нименең чахсы? Ағырчатхан кізі, ибінде чуртап, амбулаториязар, имнег туразынзар киліп, киректелчеткен уколлар, капельницалар турғыстырып, имнер ізібізіп, ибінзер парыбысча. Андағ имненҷең орыннар аймахтағы имнег тураларында, фельдшер-акушер пункттарында паза амбулаторияларда читкіҷе.
- Ағырыбысхан кізілерні ибде алай кӱнӧрте амбулаторияларда имнепчетсе, хайдағ кізілер хараа-кӱнӧрте имнег туразында чадып имненчелер: тӧреміл ағырығларнаң ағырчатханнар паза кинетін тың ағырыбысхан кізілер бе?
- Кинетін тың ағырыбысхан кізілерні хайди даа имнег туразынзар чатырчабыс. Пасха даа ағырчатхан кізілер пістің имнег туразынзар чадарға тееске турбинчалар. Федеральнай закон хоостыра, ағырчатхан кізее имнег туразында пір ай аразына орын хайди даа пирілерге кирек. Пістің аймахта андағ теестер чоғыл, ӱс кӱннең артых хаҷан даа сахтабинчалар. Кізі тың ағырыбысса, фельдшерлер алай амбулаториядағы имҷілер пӧлік устағҷыларына, сығдырадып, искірчелер, андада ол кізілерні олох кӱн чатырчабыс.
- Пістің хығырығҷы Александр Челтыгмашев, тынағдағы улуғ частығ кізі, пір саңай тиксі сыныхтағны иртер ӱчӱн, имнег туразынзар чадарға чарир ба тіп сурча. Андағ оңдай пар ба?
- Олаңай киліп, имнег туразынзар сыныхтанарға чадар оңдай чоғыл. Ағаа, имҷізер парып, ниме ағырчатханын чоохтирға кирек. Имҷі, азынада диагноз турғызып, стационарзар чадарға чарадығ пас пирер. Мында киліп, имнег туразында хараа-кӱнӧрте чатчаң орын пирілер. Ол, имненіп, тирең сыныхтағ иртер. Анзынаң сидіксіністер пістің имнег туразында чоғыл.
Аалдағы фельдшерге, аннаң тоғазып, хазиин кӧріп, пу сурығны пӧгерге чӧп пирербіс. Азынада диагноз турғызып, чатырарбыс. Мында толдыразынаң сыныхтағ иртер.
СӦС СОО: Пии аймаандағы ӧӧн имҷінің орынҷызы Ирина Побызакованың чооғынаң, имнег туразындағы стационарда полған на сай имненіп чадар оңдай чоғыл. Ӧӧнінде фельдшер-акушер пункттарында уколлар, капельницалар турғыстырарға чарир. Пілдістіг, хай пірее имнерні посха аларға килізер. Че ідӧк имҷі таныхтапча, полған на оңдайны санға аларға тимделер. Аннаңар, сірер ағырыбыссаңар, хайдағ-да сурығлар пӧгілбинчетсе, иң пастағызын аймахтағы имнег туразының ӧӧн имҷізінзер айланыңар. ол, полған на кізінең тоғазып, аның сидіксіністерін пӧгерге полыс пирерге тимде. Аннаңар андағ сурығларны иң пастағызын орында пӧгерге чӧп пирчелер.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы