ЧЫЛЫҒ ПИРҶЕҢ ТУС ХОРҒЫС ЧОХ ИРТСІН
22.12.2017
Хабарлар
Ӧӧркі Чӧптің кічіг залында 20 декабрьда «МРСК Сибири» акционерлер пірігізінің, Ағбандағы чарытхы сетьтерінің паза Хакасияның пӱдіріг паза чурт-коммунальнай хоных, транспорт паза чол хонии министерстволарының, Россия МЧС-ының Хакасияҷа управлениезінің кізілері, тоғазып, чурт-коммунальнай паза чарытхы комплексінде сағыбаан саайлар пол парза, оларның салтарларын чох идерінҷе хада-пірге тоғынардаңар чӧптезіг иткеннер.
Хакасияда «МРСК Сибири» акционерлер пірігізі, Ағбандағы чарытхы сетьтері чарытхы пирҷең иң улуғ компаниялар полчалар. Ол чӧптезігде хол саларында Хакасия пазының орынҷызы Андрей Новоселов араласхан. Чӧптезіг чылығ пирҷен тус тоозылғанҷа тоғынар.
- Пу компаниялар устағҷыларынаң тоғасхам. Олар чылығ пирҷең тус хорғыс чох иртсін тіп хада-пірге тоғынардаңар чӧптезіг идерге чӧп пиргеннер. Пу улуғ компанияларның саайлар салтарларын чох идерінде киректелчеткен уғаа чахсы бригадалар паза техника пар. Пістің дее техникабыс чахсы. Амды піс ол техниканың паза бригадаларның чылығ пирҷең тусха тимдезін сыныхтирбыс. Пӱдіріг паза чурт-коммунальнай хоных министрі, сағыбаан саай полза, хайдағ полызығ пирерін пілерге кирек.
Хакасияның пӱдіріг паза чурт-коммунальнай хоных министерствозында пірге диспетчер службазы тӧстелче. Аның полызиинаң сағыбаан саайлар салтарларын табырах чох идерге оңдай полар, - таныхтаан Хакасия пазының орынҷызы.
Андрей Новоселов Омск облазының правительствозында тоғынған соонда Хакасия правительствозынзар айланған. Амды ол энергетика, пӱдіріг, аал хонии, чир-чайаан паза экология сурығларынаң устир.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы