ЧАЛАХАЙ КӦГЛЕРДЕ ОЛҒАННАРНЫҢ ЧУРТАЗЫ
22.12.2017
Хабарлар
Ағбандағы А.А.Кенельнің адынаң олған музыка школазына 75 чыл толды. Ыраххы 1942 чылда, хазнабысха сидік чухчатхан чаа тузында, городта таңнастығ чарлағ-искіріг кізілер хайиин тартхан: «Музыка школазынзар ӱгренерге хығырчабыс». Іди 1942 чылда областьтағы Культура туразының ӱзінҷі хадылында олғаннарның музыка школазы тоғынып пастабысхан.
Чаа парчатхан хорғыстығ чыллар даа полза, хазнабыс палаларны - таңдағы кӱннің ээлерін - искусствоның иң чарых паза тузалығ кӧрімінің пірсіне, музыкаа, ӱгредердеңер чарадығ алған. Пастағҷыларның пірсі полған композитор Александр Александрович Кенель, пӧзік ӱгредігліг музыкант.
Пастағы чылларда олған музыка школазында ікі ле пӧлік тоғынған: фортепиано паза скрипка. 1950 чылларда наа пӧліктер азылғаннар. Іди олғаннар чонның паза ӱбӱрҷең инструменттер класстарында ӱгрен сыхханнар. Хор клазында кӧп пала саналҷаң. Чатханнаң паза виолончельнең ойнирға хынчатханнар даа табылғаннар.
1960 чылларда Ағбандағы олған музыка школазы ідӧк областьтағы Культура туразының ӱзінҷі хадылында орныххан. Ағаа 6 кабинет пирілген. Олох туста олған музыка школазында баян паза аккордеон оркестрі тӧстелгені іҷе-пабаларны тың ӧріндірген. 1997 чылда Ағбандағы олған музыка школазына Россия искусствозының саблығ деятельі аарластығ атха турысхан, улуғ таланттығ композитор паза ӱгретчі Александр Александрович Кенельнің адын пирердеңер чарадығ алылған.
Пӱӱнгі кӱнде Ағбандағы А.А. Кенельнің адынаң олған музыка школазында читі пӧлік тӱзімніг тоғынча. Ағаа хоза, іҷе-пабалар, ахча тӧлеп, кічіг частығ палаларын сарнирға паза аймах-пасха музыка инструменттерінең ойнирға ӱгренерге чӧргісчелер. Таныхтирға кирек, кічіг частығлар ӱгренерге уғаа хынып чӧрчелер. Оларны мында пӧзік пілістіг устар удурлапчалар, музыкаа хынарға кӧніктірчелер, хада-пірге сарнасчалар.
Пу наада, тізең, Ағбандағы Чииттер ӧргезінде чалахай иир таныхталған - А.А.Кенельнің адынаң олған музыка школазы тӧстелгеннең пеер 75 чыл толчатханын пайрамнирға чон толдыра чыылысхан. Оңарылыстығ, прайзының хайиинда школаның ӱгретчілері паза ӱгренҷілері. Оларны чазағлығ тонан салғаннары хоостыра танирға чарир полған. Хайдағ чазағлығ кӧрімніглер олар.
Ӱгренҷілер, аймах-пасха орыннарда иртірілчеткен марығларда аралазып, ибзер аарластығ сыйыхтығ айланчалар, тӧреен-ӧскен городты тиксі махтаға сығарчалар. Танығлығ иирде, тізең, прайзы даа кӧрігҷілерге ӧрініс сыйлирға, кӧңнілерін кӧдірерге харасхан, музыка школазында нимее ӱгреніп алғаннарын толдыразынаң кӧзіткен.
Амғы туста анда тоғынчатхан пӧзік пілістіг паза устығ ӱгретчілер санынаң ікізі «Россия культуразының саблығ тоғынҷызы», алтызы «Хакасия культуразының саблығ тоғынҷызы» аарластығ аттарға турысхан. Школаны маңнаныстығ тоосханнар Россияның аймах пулуңнарынҷа тарас парыбысханнар, піреезі хырығ озаринда даа тоғынча.
Ағбандағы А.А.Кенельнің адынаң олған музыка школазында пӱӱнгі кӱнде 500 артиинаң пала ӱгренче, пӧзік пілістіг 77 ӱгретчі оларны музыкаа кӧніктірче. Аннаңар танығлығ иир тузында прайзы даа чыылысхан улусха, парчан кӧңнілерін салып, хынығ ойыннар турғысханнар, пӧзік устарын кӧзіткеннер.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы