НАА ЧЫЛНАҢ! КӦЛЕЕДЕНЕҢ!
29.12.2017
Хабарлар
Хакасияның аарлығ чуртағҷылары паза аалҷылары! Прай чӱреебіснең сірерні паза туған-чағыннарыңны Наа 2018 чылнаң паза Кӧлееденең алғыстапчабыс!
Пу олған тузынаң сығара чӱрекке чағын ӱлӱкӱннер пісті хайхастар сағирынаң, чахсы алызығлар паза наа чиңістер поларынаң ізеніснең піріктірче. Пірееде ирт париған чылның салтарларын идерінде хомайның паза чахсының аразы тиңни нимес полчатханы пілдірче. «Кӱннің хомайы» сағысха хаҷан даа оой кірче, аннаңар ағаа ӧріністіг киректерні паза чидіглерні чабыра пазарға пирбеске кирек. 2017 чыл чахсы паза чапсых ла киректернең сағыста халзын. Олар наа чидіглерге чит турарға тӧстег ползыннар паза піске кӱс хоссыннар.
Наа чыл хараазын піс хаҷан даа иң чағын кізілерібіснең хада поларға кӱстенчебіс. Іҷе-пабаларыбысха хайығ салчабыс, арғыстарыбыснаң хада ӧрінчебіс, палаларыбысха часка алғапчабыс. Анзы Наа чыл хараа ла полбазын, ӱлӱкӱн чылии килер чыл тооза піснең хада парзын. Прайзына пик хазых, хыныс паза Наа чыл хайхастарын алғапчабыс!
В.М.ЗИМИН, Хакасияның пазы -Хакасияның Правительство кнезі
В.Н.ШТЫГАШЕВ, Хакасияның Ӧӧркі Чӧп кнезі
Хакасияның аарлығ чуртағҷылары!
Чылығ алғыстапчам сірерні Наа 2018 чылнаң!
Пу ӱлӱкӱн чахсы ізеністернең, сағынған сағыстар толарын паза чуртаста чарых алызығлар поларын сағирынаң палғалыстығ. Піс киртінчебіс паза ізенчебіс, ол париған 2017 чылның хыринда хай-хай тӱзімніг, ізестіг паза амыр поларына. Анымҷохтасчатхан чылда пісті ӧріндірген прай нимелер чағдапчатхан чылда узарадылзын.
Наа 2018 чылда турғызылған прай пӧгіннер толзын, прай сағынған сағыстар чуртасха кирілзін. Пу чыл сірернің чуртыңарға толдыра ӧрініс ағылзын, кӧп часкалығ кӱннер сыйлазын.
Прай чӱреемнең 2018 чыл пістің хынчатхан Республикаа, пістің илбек Россияа чидіглер паза ӧңненіс чылы ползын тіп алғапчам. Пістің пірге полғаныбыс паза таңдағызына ізенізібіс улам тыып турзын.
Сірерге паза туған-чағыннарыңа хайхастығ наа чыл кӧңніліг, пик хазыхтығ, амыр паза чахсы чуртастығ поларға, удур-тӧдір пілізіп паза ынағ чуртирға алғапчам! Наа чылда оң ползын!
Н.С.МАКСИМОВА, Россияның Хазна Думазының депутады
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы