ХАРАХ ОДЫН ИМНИРІНДЕ УЛУҒ ХОЗЫМ ИТКЕН
23.01.2018
Хабарлар
Республиканың офтальмология имнег туразының ӧӧн имҷізі Любовь КАРАМЧАКОВА
Чыылығда республиканың хазых хайраллаҷаң министерствозының кізілері, офтальмология имнег туразының тоғынҷылары, Антонина Ивановна Шалгынованаң хада тоғынған имҷілер араласханнар. Олар Антонина Шалгынованың чуртазын паза ол харах одын имнирінде хайдағ улуғ хозым иткенін сағысха киргеннер. Республикада микрохирургия тӧстелгеннеңер паза Хакасияда олған хирургиязын тилідерінеңер чоох апарғаннар. Чыылығның араласчылары, республикадағы офтальмология имнег туразының ӧӧн имҷізі полған Антонина Ивановнаны улуғлап, пір минута сым турғаннар.
Антонина Шалгынова 1945 чылда, Ағбандағы национальнай школаны тоозыбызып, Томсктағы имнег институдынзар ӱгренерге кірген. Институтты тоозып, 1952 чылдаң сығара Хакасияда чонның хазиин хайраллап, имег киреенде 37 чыл азыра істен салған, оларның 34 чылын харах имҷізі полған. Хакас облазының офтальмология имнег туразының ӧӧн имҷізі полып, 1964 чылдаң 1984 чылға теере істенген.
Харах имнеҷең диспансернең устап, ол офтальмология службазын тилідер программаны чуртасха кирген. Аның устаанынаң олған офтальмология службазы тӧстелген, аймахтарда олған офтальмология кабинеттері азылған, харах одын имнеҷең ӧнетін олған садтары тоғынып пастааннар. Харахты лазернең паза звуковой микрохирургиянаң имнеҷең методиканы чуртасха кирген, хайзынаң амғы туста республиканың имнег туразында тузаланчалар. Антонина Ивановна Істеніс Хызыл Знамязы орденнең сыйыхтатхан, «СССР-ның хазых хайраллаҷаң отличнигі» атха турысхан паза Хакас Республиканың саблығ имҷізі полған.
Антонина Ивановнанаң хада тоғынған кізілер таныхтапчалар, ол тоғысха прай кӱзін пирҷең, пасхаларын ідӧк тоғынарға кӧӧктірҷең. Кізілерні киртіндіріп, чӧптеп алҷаң оңдайлығ, улуғ пілістіг имҷі полған. Кізее айап, паарсап пілҷең паза позын хаҷан даа турыстығ тудынҷаң. Ол андағ пӧзік устығ имҷі полбаан полза, аның имнег киреенде иділген тоғыстары мындағ синге читпесчік, неке.
Республиканың офтальмология имнег туразының ӧӧн имҷізі Любовь Алексеевна Карамчакова сағыстарынаң ӱлескен:
- Имнег туразынзар тоғынарға килгенімде, Антонина Ивановна тынағда полған. Аннаңар имҷі чіли хада тоғынарға киліспеен, че службаның танығлығ конференцияларына тимненер тоғыстарны хада апарғабыс. Пастағы танығлығ конференция Хакасияның офтальмология службазына 70 чыл толғанына чарыдылған.
Іҷе-пабазына хынызын читіріп паза оларны улуғлап, ол Шалгыновтар родына чарыдылған улуғ книга, пазып, сығарыбысхан. Книгада Шалгыновтар родының кізілерінің сомнары пиріл парған, пу родтаңар алғым пазыл парған. Таныхтирға кирек, читі тӧліне читіре материаллар чыып алған. Ол тыс пілбес кізі полған, тынаға сығып, ідӧк нинҷе-де монография сығарыбысхан. Олар Хакасияда харах одын имнирінде хайдағ тоғыстар апарылғанына чарыдылғаннар. Ол позынаңар пазарға хынмаҷаң, ӧӧнінде имҷілердеңер, медсестралардаңар пасхан. Пірдеезін ундубин, сағысха киріп, хайдағ чылларда тоғынғаннарын прай таныхтап салған. Антонина Ивановна кізілернең хаҷан даа иптіг паза амыр чоохтасчаң. Андағ кізідең паза специалисттең кӧп нимее ӱгреніп аларға чарир. Улуғ хомзынысха, мин аннаң асхынах тоғынғам.
Мындағ чылығ сӧстернең сағысха киргеннер Антонина Шалгынованы хада тоғынған имҷілер паза аны танаан кізілер. Аның республикада имнег киреене хозым иткеніне Хакасия чуртағҷыларының паза имҷілернің алғыстары тоозылбинча.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы