ХОЛА МЕДАЛЬҒА ТУРЫСХАН
02.02.2018
Хабарлар
Барнаулда ирткен тиксі Россия синiндегi турнирде Хакасиядаң ікі кӱресчі араласхан.
Алтай крайының кінінде самбоҷа СССР-ның саблығ тренері, Барнаул городтың аарластығ гражданині В.М.Метелицаның хумартхызына чарыдылған тиксі Россия синіндегі турнир пастағызын на иртірілді. Ол ідӧк Алтайдағы самбо кіні тӧстелгеннең пеер пір чыл толчатханына чарыдылған. Арға-мӧрій улуғлар аразында ирткен.
Барнаулзар хазнабыстың аймах регионнарынаң 150 артиинаң самбист чыылысхан. Оларның санында полғаннар тренер Геннадий Аевтің ӱгренҷілері. Дмитрий Васильев 90 кг кӧдірімде харбасхан, Александр Воробьев иң аар кӧдірімде марығласхан.
Арға-мӧрій тузында хомай нимес тимненіс кӧзіткен Александр Воробьев. Ол, иң аар кӧдірімде харбазып, хола медаль алған.
Аар чуххан Дмитрий Васильевке. 90 кг кӧдірімде 24 самбист полған. Прайзы даа спорт устары. Ол ам даа чиит, спорт узына кандидат. Пірдең, тиксі Россия синіндегі турнирде аралазарға даа киліспеен. Кӱресчі позының кӧдірімінде пизінҷі орынға ла сығып алған.
- Ооллар Барнаулзар марыга постарының машиназынаң чӧргеннер. Піс, тренерлер, оларга чолга ахча таап пиргебіс, - чоохтапча кӱресчілернің тренері Геннадий Аев.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы