ПІС СІРЕРНЕҢ ХАДАБЫС
07.02.2018
Хабарлар
Ағбаңда митинг ирткен. Аның ӧӧн пӧгіні -Хакасия Россияның олимпиецтерінең хада полчатханын кӧзідері.
РОССИЯНЫҢ КОМАНДАЗЫН ХЫСХЫ ОЛИМП ОЙЫННАРЫНДА АРАЛАСТЫРБАС ӰЧӰН, ХАЙДАҒ ЛА ПОЛЗА КӦЙТІКТЕНІСТЕР САҒЫН ТААП АЛЧАЛАР. ПІРЕЕДЕ ИСТЕРГЕ ДЕЕ ТӰӰЛІСТІГ ПІЛДІРІБІСЧЕ. ОЛОХ ТУСТА ХАЗНАБЫСТАҢ ТОҒЫР ЧАЗЫТТЫҒ КӰРЕЗІГ ТОХТАБИНЧА. АМДЫ, АРЫҒЛИ ПОЛБАСТА, ЧОННАРНЫ ПІРІКТІРЧЕТКЕН, ЫНАҒЛАСТЫРЧАТХАН ПІР ДЕЕ ПЫРОЗЫ ЧОХ СПОРТТЫ ПОЛИТИКАА ЧАҒЫН ТАРТЫП АЛДЫЛАР. ЧЕ, ХАЙДИ ДАА СІРЕНЗЕЛЕР, ПІСТІ ТІЗЕККЕ ТӰЗІР ПОЛБАСТАР. ТИККЕ ЛЕ СІРЕНЧЕЛЕР.
АНДАҒ ДАА ПОЛЗА, АЛТЫНЗАРХЫ КОРЕЯДА ИРТЕР ХЫСХЫ ОЛИМП ОЙЫННАРЫНДА РОССИЯНЫҢ КӰСТІГ КОМАНДАЗЫ АРАЛАСПАС, АЛЫНҶА СПОРТСМЕННЕР ЛЕ УСТАРЫН СЫНИРЛАР. ХАЗНАБЫСТЫҢ ФЛАГЫ ДАА ЧОХ ПОЛАР. ОЛАРҒА ТЫҢ СИДІК ЧУҒАРЫ ІДӦК ТЕЕ ПІЛДІСТІГ - СПОРТТЫҢ ХЫСХЫ КӦРІМНЕРІНҶЕ ИРТЧЕТКЕН ОЛИМП ОЙЫННАРЫНЫҢ МАРИИНДА ПРАЙЗЫ ДАА ПІСТІҢНЕРДЕҢ ТОҒЫР ПОЛАРҒА ХАРАЗАР.
Аннаңар хазнабыстың чуртағҷылары, пістің олимпиецтернін кӧңнілерін кӧдірерге харазып, аймах-пасха чӧрімнер пастапчалар, митингтер иртірчелер. Ағбанда полған митингте чоох тутхан Олимп ойыннарының хысхы спорт кӧрімнерінің мариинда ікі хати араласхан Пётр Макарчук. Аның чооғынаң, Олимп ойыннарында араласханы кізінің чуртазындағы иң чарых спорт ӱлӱкӱні полып хаҷанға даа халча. Тиктең нимес саблығ кӱресчі Али Алиев тилекейнің пис хати чемпионы полған алтын медальларын Олимп ойыннарының чиңісчізі полған пір алтын медальға сала даа ікінҷілес чох орназыбызарҷыхпын тіҷең полған.
Ідӧк чоох тутханнар санында полған ниик атлетикаҷа чоннар аразындағы класстығ спорт узы Вадим Трунов. Ол, Россияның піріктірілген командазына кіріп, кинектер аразында иртірілчеткен Паралимпиадаа олох тоғырланыстар сылтаанда пар полбин салған. Чир-суғҷыбысха ол хомзыныстығ кӱннерні ам даа сағысха кирерге сидік пілдірчеткен, чӱрексініп, чоохтан полбин, тохтабысчатхан. Вадимнін кӧрізінең, мындағ пір чӧпнең, тӧӧй сағыснаң иртірілчеткен митингтер пістің олимпиецтерге туза полар, марығлар алнында кӧңнілерін кӧдірер, чиңіс тударға кӧӧктірер.
Ағбанда митинг городтың Чиңіс паркында ирткен. Соох кӱн дее полза, илееде кізі чыыл парған. Уламох чииттернің ӧткін хайынчатханнары харахха тасталчатхан. Ооллар паза хыстар «Хакасия сірернең хада!», «Олимп ойыннарынаң чиңіснең айланыңар!» паза даа пасха сӧстер хысхырысчатханнар. Пірее организацияларның, учреждениелернін тоғынҷылары плакаттығ, транспаранттығ килглептірлер.
Чиңіс паркында таныстар толдыра. Хайзынаң даа чоохтас, прайзының пір тоой сағыс - хазнабыстаң тоғыр андағ чарлалбаан кӱрезіг парчатханда, хада-пірге поларға кирекпіс. Хакасияның спорт министрінің пастағы орынҷызы полып ӱр чыллар тоғынған Артём Асочаковнаң пу хомзыныстығ тоғырланыстаңар чоохтас турчатханыбыста, олаңай кӱресче саблығ спорт узы Лилия Каскаракова таныстарынзар иртібіскен. Ӱр ниместең оларға спорт чоннар аразындағы ынархасты хайди тыытчатхан наңар чоохтап пастабысхан. Тилекейнің коп аймах хазналарында харбасхан кӱресчі киртістіг кӧзідімнер ағыл турған. Чииттер аны хынып исчеткеннер.
Мына чон алнынзар Россияның Журналисттер пірігізінің Хакасиядағы пӧлиинің кнезі Ольга Ширковец сыхты. Ӱр чыллар ӧткін хабарҷы полған кізі чон алнында чоохтанарға тазых парған. Мында даа ол килістіре, чӱрек тибіретчеткен чалыннығ сӧстер таап турған. Анан митингте араласхан кізілернің, Хакасияның прай чуртағҷыларының адынаң Россияның олимпиецтерінең хада полчатханыбыстаңар, чиңіске кӧӧктірчеткенібістеңер, сидік туста сыдамах тудынарға алғапчатханыбыстаңар айланысты тыыда хығырған. Аның ӱчӱн хол кодірерге сурынғанда, чӱзерлеп кізі прай хазна чуртағҷыларынаң хада пір тӧӧй сағыстығ, тыныстығ полчатханын кӧзіткен. Холларын тӱзірбин ӱр турғаннар.
9 февральда Алтынзархы Кореяда хысхы спорт кӧрімнерінҷе теестегі Олимп ойыннары пасталча. Оң ползын чир-суғҷыларыбысха, хатығ харбазығ-марығларда чиңіс тутсыннар, сидік туста тӧдір пазынмазыннар. Піс оларнаң хадабыс.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы